କୋଲକାତା ନାଇଟ ରାଇଡର୍ସରେ ସାଂସଦ ପପୁ ଯାଦବଙ୍କ ପୁଅ, ୩୦ ଲକ୍ଷରେ କିଣିଲା ଟିମ୍

ନୂଆଦିଲ୍ଲୀ, ୧୭/୧୨:କୋଲକାତା ନାଇଟ୍ ରାଇଡର୍ସ ପାଇଁ ମଙ୍ଗଳବାର ଥିଲା ଏକ ବ୍ୟସ୍ତବହୁଳ ଦିନ । ଆଇପିଏଲର ମିନି ଅକ୍ସନରେ ୨୦୨୬ ସିଜିନ୍ ପାଇଁ ଟିମ୍ ୧୬ ଜଣ ଖେଳାଳିଙ୍କୁ କିଣିଛି । ଦଳ ସବୁଠୁ ଅଧିକ ଅର୍ଥ ରାଶି ଧରି ନିଲାମିରେ ଭାଗ ନେଇଥିଲା । ଅଷ୍ଟ୍ରେଲିଆନ ଅଳରାଉଣ୍ଡର କ୍ୟାମେରନ୍ ଗ୍ରୀନଙ୍କୁ କିଣି କେକେଆର ସମସ୍ତଙ୍କୁ ଚକିତ କରିଛି । ୨୫ କୋଟି ୨୦ ଲକ୍ଷ ଟଙ୍କାରେ ତାଙ୍କୁ କିଣାଯାଇଛି । ଅନ୍ୟ ୧୩ ଖେଳାଳିଙ୍କ ମଧ୍ୟରେ ସାର୍ଥକ ରଞ୍ଜନ ନାମକ ଜଣେ ଯୁବ ଖେଳାଳି ରହିଛନ୍ତି ।

ତେବେ ସାର୍ଥକ ହେଲେ ସାଂସଦ ତଥା ବରିଷ୍ଠ ରାଜନେତା ରାଜେଶ ରଞ୍ଜନ ବା ପପୁ ଯାଦବଙ୍କ ପୁଅ । ପପୁ ହେଲେ ବିହାରର ପୂର୍ଣ୍ଣିଆ ଲୋକସଭାର ସ୍ୱାଧିନ ସାଂସଦ ।ଏବେ ତାଙ୍କ ପୁଅ ସାର୍ଥକଙ୍କୁ କିଣିଛି କୋଲକାତା ନାଇଟ୍ ରାଇଡର୍ସ ।

ଦିଲ୍ଲୀ ପାଇଁ ଘରୋଇ କ୍ରିକେଟ୍ ଖେଳନ୍ତି ସାର୍ଥକ । ତାଙ୍କୁ କେକେଆର ୩୦ ଲକ୍ଷ ଟଙ୍କାରେ କିଣିଛି । ଯାହା ପରେ ନିଜେ ପପୁ ଖୁସି ହେବା ସହ ସୋସିଆଲ ମିଡିଆ ସାଇଟରେ ପୋଷ୍ଟ୍ କରିଛନ୍ତି । ସେ ଏକ୍ସରେ ଲେଖିଛନ୍ତି ଯେ, ପୁଅକୁ ଅନେକ ଅନେକ ଅଭିନନ୍ଦନ । ଭଲରେ ଖେଳ । ନିଜ ପରିଚୟ ନିଜେ ତିଆରି କର । ନିଜର ସବୁ ସ୍ୱପ୍ନ ସାକାର କର ।

ସାର୍ଥକଙ୍କ କ୍ୟାରିଅର

ଦିଲ୍ଲୀ ପାଇଁ ସାର୍ଥକ ୨ଟି ପ୍ରଥମ ଶ୍ରେଣୀ କ୍ରିକେଟ୍ ମ୍ୟାଚ୍, ୪ଟି ଲିଷ୍ଟ୍ ଏ ମ୍ୟାଚ୍, ୫ଟି ଟି୨୦ ମୁକାବିଲା ଖେଳିଛନ୍ତି । ପ୍ରଥମ ଶ୍ରେଣୀ କ୍ରିକେଟରେ ସେ ମୋଟ୍ ୨୮ ରନ୍ କରିଥିବା ବେଳେ ତାଙ୍କ ଆଭରେଜ୍ ରହିଛି ୯.୩୩ । ଲିଷ୍ଟ୍ ଏରେ ତାଙ୍କ ବ୍ୟାଟରୁ ବାହାରିଛି ୧୦୫ ରନ୍ ଏବଂ ଆଭରେଜ୍ ରହିଛି ୨୬.୨୫ । ଅନ୍ୟ ଦିଗରେ ଟି୨୦ ଫର୍ମାଟରେ ସେ ୬୬ ରନ୍ କରିଥିବା ବେଳେ ଆଭରେଜ୍ ରହିଛି ୧୩.୨୦ ।