ମୁମ୍ବାଇ ୧୭।୩: ବମ୍ବେ ହାଇକୋର୍ଟ ସୋମବାର ଆଦାନୀ ସମୂହ ଚେୟାରମ୍ୟାନ ଗୌତମ ଆଦାନୀ ଓ ମ୍ୟାନେଜିଂ ଡାଇରେକ୍ଟର ରାଜେଶ ଆଦାନୀଙ୍କୁ ୩୮୮ କୋଟି ଟଙ୍କାର ବଜାର ନିୟମ ଉଲ୍ଲଂଘନ ମାମଲାରେ ବଡ଼ ଆଶ୍ୱସ୍ତି ଦେଇଛନ୍ତି। ଉଲ୍ଲେଖଯୋଗ୍ୟ ଯେ କୋର୍ଟ ଏହି ମାମଲାରେ ଉଭୟଙ୍କୁ ମୁକ୍ତ କରିଦେଇଛନ୍ତି। ଏହି ରାୟ ସେହି ମକଦ୍ଦମାର ନିଷ୍ପତ୍ତିରେ ଆସିଛି ଯେଉଁଥିରେ ସିରିୟସ ଫ୍ରଡ ଇନଭେଷ୍ଟିଗେସନ ଅଫିସ (ଏସଏଫଆଇଓ) ୨୦୧୨ ମସିହାରେ ଆଦାନୀ ଏଣ୍ଟରପ୍ରାଇଜର୍ସ ଲିମିଟେଡ(ଏଇଏଲ) ଓ ଏହାର ପ୍ରମୋଟରଙ୍କ ବିରୋଧରେ ମାମଲା ରୁଜୁ କରିଥିଲେ।
ଏସଏଫଆଇଓ ଅଭିଯୋଗ ଫର୍ଦ୍ଦରେ ଗୌତମ ଆଦାନୀ ଓ ରାଜେଶ ଆଦାନୀଙ୍କ ବିରୋଧରେ ଅପରାଧିକ ଷଡ଼ଯନ୍ତ୍ର ଓ ଠକେଇର ଗୁରୁତର ଅଭିଯୋଗ ଆଣିଥିଲେ। ଏହି ମାମଲାରେ ଗୌତମ ଆଦାନୀ ଓ ରାଜେଶ ଆଦାନୀ ୨୦୧୯ ମସିହାରେ ହାଇକୋର୍ଟରେ ଆବେଦନ ଦାଖଲ କରି ସେସନସ କୋର୍ଟର ଆଦେଶକୁ ଚ୍ୟାଲେଞ୍ଜ କରିଥିଲେ, ଯେଉଁଥିରେ ସେମାନଙ୍କୁ ମାମଲାରୁ ମୁକ୍ତ କରିବାକୁ ସେସନସ୍ କୋର୍ଟ ମନା କରିଦେଇଥିଲେ। ତେବେ ସୋମବାର ବିଚାରପତି ଜଷ୍ଟିସ୍ ଆର.ଏନ.ଲଡ୍ଡାଙ୍କ ଏକକ ପୀଠ ସେସନସ କୋର୍ଟଙ୍କ ଆଦେଶକୁ ଖାରଜ କରିଦେବା ସହ ଉଭୟ ଉଦ୍ୟୋଗପତିଙ୍କୁ ମାମଲାରୁ ମୁକ୍ତ କରିଦେଇଛନ୍ତି।
ଉଲ୍ଲେଖଯୋଗ୍ୟ ଯେ ଡିସେମ୍ବର ୨୦୧୯ରେ ହାଇକୋର୍ଟ ସେସନସ କୋର୍ଟଙ୍କ ଆଦେଶ ଉପରେ ରହିତାଦେଶ ଜାରି କରିଥିଲେ। ଯାହାକୁ ପରେ ସମୟ ସମୟରେ ସମ୍ପ୍ରସାରଣ କରାଯାଇଥିଲା। ଉଲ୍ଲେଖଯୋଗ୍ୟ ଯେ ଏସଏଫଆଇଓ ୨୦୧୨ ମସିହାରେ ୧୨ ଜଣଙ୍କ ବିରୋଧରେ ବଜାର ନିୟମ ଉଲ୍ଲଂଘନର ଅଭିଯୋଗରେ ଚାର୍ଜସିଟ୍ ଦାଖଲ କରିଥିଲେ। ଏଥିରେ ଏଇଏଲର ଚେୟାରମ୍ୟାନ ଗୌତମ ଆଦାନୀ ଓ ମ୍ୟାନେଜିଂ ଡାଇରେକ୍ଟର ରାଜେଶ ଆଦାନୀଙ୍କ ନାମ ମଧ୍ୟ ଥିଲା। ତେବେ ମେ ୨୦୧୪ରେ ମୁମ୍ବାଇର ଏକ ମାଜିଷ୍ଟ୍ରେଟ୍ କୋର୍ଟ ଗୌତମ ଆଦାନୀ ଓ ରାଜେଶ ଆଦାନୀଙ୍କୁ ଏହି ମାମଲାରେ ନିର୍ଦ୍ଦୋଷ ଘୋଷଣା କରିଥିଲେ।
ମାଜିଷ୍ଟ୍ରେଟ୍ କୋର୍ଟର ଏହି ଆଦେଶକୁ ଏସଏଫଆଇଓ ସେସନସ୍ କୋର୍ଟରେ ଚ୍ୟାଲେଞ୍ଜ କରିଥିଲା। ଫଳରେ ନଭେମ୍ବର ୨୦୧୯ରେ ସେସନସ କୋର୍ଟ ମାଜିଷ୍ଟ୍ରେଟ୍ କୋର୍ଟର ରାୟକୁ ଅଗ୍ରାହ୍ୟ କରିଦେଇଥିଲେ ଓ ଏସଏଫଆଇଓଙ୍କ ଯାଞ୍ଚ ରିପୋର୍ଟକୁ ଆଧାର କରି ଏଇଏଲ ଉପରେ ଅବୈଧ ଲାଭ ଅର୍ଜନର ଅଭିଯୋଗ ଆଣିଥିଲେ। ତେବେ ଗୌତମ ଆଦାନୀ ଓ ରାଜେଶ ଆଦାନୀ ସେସନସ କୋର୍ଟଙ୍କ ରାୟକୁ ହାଇକୋର୍ଟରେ ଚ୍ୟାଲେଞ୍ଜ କରିଥିଲେ। ଏବେ ହାଇକୋର୍ଟଙ୍କ ରାୟ ପରେ ଆଦାନୀଙ୍କୁ ବେଶ୍ ଆଶ୍ୱସ୍ତି ମିଳିଛି।
