ସେମି ଫାଇନାଲ୍ ରେସରେ ରହିବା ପାଇଁ ଭାରତକୁ ଦରକାର ବଡ଼ ପରିବର୍ତ୍ତନ, ଏହି ଖେଳାଳିଙ୍କୁ ଦେବାକୁ ପଡ଼ିବ ବଳିଦାନ

ନୂଆଦିଲ୍ଲୀ: ଦକ୍ଷିଣ ଆଫ୍ରିକାଠୁ ମିଳିଥିବା ଶୋଚନୀୟ ପରାଜୟ ଟିମ୍ ଇଣ୍ଡିଆର ସେମି ଫାଇନାଲ୍ ଆଶାକୁ ବଡ଼ ଝଟକା ଦେଇଛି। ଆଉ ଭାରତର କଟା ଘାରେ ଚୂନ ମାରିଛି ଜିମ୍ବାଓ୍ଵେ ବିପକ୍ଷରେ ଓ୍ଵେଷ୍ଟଇଣ୍ଡିଜର ୧୦୭ ରନର ବିଶାଳ ବିଜୟ। ଫଳରେ ସୁପର-୮ର ଗ୍ରୁପ-୧ରେ ସେମି ଫାଇନାଲ୍ ଦୌଡ଼ରେ ବହୁତ ପଛେଇ ଯାଇଛି ଭାରତ। ଯଦି ଟିମ୍ ଇଣ୍ଡିଆକୁ ପ୍ରତ୍ୟାବର୍ତ୍ତନ କରିବାର ଅଛି ତେବେ ଜିମ୍ବାଓ୍ଵେ ବିପକ୍ଷରେ ଦଳକୁ ଦରକାର ବିଶାଳ ବିଜୟ। ଏଥିପାଇଁ ଭାରତକୁ ନିଜର ବ୍ୟାଟିଂକୁ ସୁଧାରିବାକୁ ପଡ଼ିବ।

କାରଣ ପୂରା ଟୁର୍ଣ୍ଣାମେଣ୍ଟରେ ଏ ପର୍ଯ୍ୟନ୍ତ ଭାରତୀୟ ବ୍ୟାଟର ନିଜର ଶତ ପ୍ରତିଶତ ପ୍ରଦର୍ଶନ କରି ପାରି ନାହାନ୍ତି। ତେଣୁ ପୂର୍ବତନ କ୍ରିକେଟ୍ ଏବଂ ବର୍ତ୍ତମାନର କ୍ରିକେଟ୍ ସମୀକ୍ଷକ ଇରଫାନ ପଠାନ ସୂର୍ଯ୍ୟକୁମାର ଯାଦବ ଓ ଗୌତମ ଗମ୍ଭୀରଙ୍କୁ ବ୍ୟାଟିଂ କ୍ରମରେ ପରିବର୍ତ୍ତନର ଉପାୟ ଦେଇଛନ୍ତି।

Also read: ଟିମ୍ ଇଣ୍ଡିଆ ପାଇଁ ଅସଲ ନିଷ୍ପତ୍ତି ନେବାର ସମୟ, ଜିମ୍ୱାଓ୍ୱେ ବିପକ୍ଷରେ କିଏ କରିବ ଓପନିଂ ?

ପଠାନଙ୍କ କହିବା କଥା ଭାରତକୁ ନମ୍ବର ୩ ଏବଂ ୪ କ୍ରମରେ ପରିବର୍ତ୍ତନର ଆବଶ୍ୟକତା ରହିଛି। ଆହତ ସମସ୍ୟାରୁ ମୁକୁଳି ଫେରିଥିବା ତିଳକ ବର୍ମା ସେହି ଫର୍ମରେ ନଜର ଆସି ନାହାନ୍ତି ଯେଉଁଥି ପାଇଁ ସେ ପରିଚିତ। ତିଳକ ନମ୍ବର ୩ରେ ବ୍ୟାଟିଂ କରୁଥିବାରୁ ଟପ୍-୩ରେ ତିନି ଜଣ ବାମହାତୀ ବ୍ୟାଟର ରହୁଛନ୍ତି। ଇଶାନ କିଶନ ଓ ଅଭିଷେକ ଶର୍ମା ଓପନିଂ କରୁଛନ୍ତି। ଏମିତିରେ ଇରଫାନ ପଠାନ ସୂର୍ଯ୍ୟକୁମାର ଯାଦବଙ୍କୁ ପୁଣି ଥରେ ନମ୍ବର-୩ରେ ଖେଳିବାକୁ ପରାମର୍ଶ ଦେଇଛନ୍ତି।

ଏମିତିରେ ତିଳକ ବର୍ମାଙ୍କୁ ନମ୍ବର-୩ ସ୍ଥାନ ପାଇଁ ବଳିଦାନ ଦେବାକୁ ପଡ଼ିବ। ତିଳକ ଦକ୍ଷିଣ ଆଫ୍ରିକା ଗସ୍ତରେ ଅଧିନାୟକ ସୂର୍ଯ୍ୟକୁମାର ଯାଦବଙ୍କଠୁ ତିନି ନମ୍ବର ସ୍ଥାନ ମାଗିଥିଲେ। ଉକ୍ତ ଗସ୍ତରେ ସେ ଲଗାତାର ଦୁଇଟି ଶତକ ମାରିଥିଲେ। ତିଳକ ନମ୍ବର ୩ରେ ଦମଦାର ପ୍ରଦର୍ଶନ ମଧ୍ୟ କରିଛନ୍ତି। ମାତ୍ର ଟି-୨୦ ବିଶ୍ଵକପରେ ସେ ଲୟରେ ନାହାନ୍ତି।

Also read: ଜିମ୍ୱାଓ୍ୱେ ବିରୋଧରେ ଦରକାର ୧୦୦ ରନ୍ର ବିଜୟ, ନହେଲେ ବିଶ୍ୱକପ୍ରୁ ବିଦା ହେବ ଭାରତ ! ଅଭିଷେକଙ୍କ ଫର୍ମ୍ ବଡ ଚିନ୍ତା

ଇରଫାନ ପଠାନ କହିଛନ୍ତି, ସୂର୍ଯ୍ୟଙ୍କୁ ନମ୍ବର ୩ରେ ବ୍ୟାଟିଂ କରିବା ଉଚିତ୍। କାରଣ ଲଗାତାର ତିନି ବାମହାତୀ ବ୍ୟାଟର ବ୍ୟାଟିଂ ପାଇଁ ଆସୁଥିବାରୁ ବିରୋଧୀ ବୋଲରଙ୍କ ରଣନୀତିକୁ ଏହା ସୁହାଉଛି। ତେଣୁ ଏଥିରେ ପରିବର୍ତ୍ତନ କରାଯିବାର ଆବଶ୍ୟକତା ରହିଛି।

ସୂର୍ଯ୍ୟକୁମାର ଯାଦବ ଟି-୨୦ ଅନ୍ତର୍ଜାତୀୟରେ ଭାରତ ପାଇଁ ନମ୍ବର ୩ରେ ବ୍ୟାଟିଂ କରି ୩୨ଟି ମ୍ୟାଚରେ ୩୨ ହାରରେ ଏବଂ ୧୫୮.୬୬ ଷ୍ଟ୍ରାଇକ ରେଟରେ ୮୬୪ ରନ କରିଛନ୍ତି। ଏଥିରେ ଗୋଟିଏ ଶତକ ଓ ଛଅ ଅର୍ଦ୍ଧଶତକ ସାମିଲ୍।