ପାଟଣା ୧୫।୪: ପ୍ରବାଦ ପୁରୁଷ ବିଜୁ ବାବୁଙ୍କ ପ୍ରତି ଅସମ୍ମାନ । ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତି ପୋଡ଼ିଦେଲେ ଯୁବକ । ବଲାଙ୍ଗିର ପାଟଣାଗଡ଼ ପର୍ଶୁରାମ ଛକରେ ସ୍ଥାପିତ ହୋଇଥିବା ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ଢ଼ଙ୍କାଯାଇଥିବା ପ୍ରତିମୂର୍ତ୍ତିକୁ ପୋଡ଼ି ଦେଲେ ଯୁବକ । ସଂପୃକ୍ତ ଯୁବକକୁ ଅଟକ ରଖି ପଚରାଉଚରା କରୁଛି ପୋଲିସ ।

ସୂଚନାଯୋଗ୍ୟ ଯେ, ମଙ୍ଗଳବାର ସକାଳୁ ସକାଳୁ ପାଟଣାଗଡ଼ ନିକଟରେ ଥିବା ବଥର୍ଲା ଗ୍ରାମର ଜଣେ ଯୁବକ ବିଜୁ ବାବୁଙ୍କ ପ୍ରତିମୂର୍ତ୍ତି ଢଙ୍କାଯାଇଥିବା ଜରିରେ ନିଆଁ ଲଗାଇ ଦେଇଥିଲେ । ଫଳରେ ପ୍ରତିମୂର୍ତ୍ତିଟି ହୁତ ହୁତ ହୋଇ ଜଳିବାକୁ ଲାଗିଥିଲା । ଏ ନେଇ ଖବର ପାଇ ପାଟଣାଗଡ଼ ପୋଲିସ ଘଟଣାସ୍ଥଳରେ ପହଞ୍ଚି ନିଆଁକୁ ଲିଭାଉଥିବା ଦେଖିବାକୁ ମିଳିଥିଲା । ତେବେ ଉକ୍ତ ଯୁବକ ଜଣେ ଦିବ୍ୟାଙ୍ଗ ବୋଲି ଜଣାପଡ଼ିଛି । ତାଙ୍କ ମାନସିକ ସ୍ଥିତି ଠିକ୍ ନାହିଁ ବୋଲି କୁହାଯାଉଛି । ସଂପୃକ୍ତ ଯୁବକଙ୍କୁ ଧରି ପାଟଣାଗଡ଼ ଥାନାରେ ଅଟକ ରଖି ପଚରାଉଚରା ଜାରି ରଖିଛି ପୋଲିସ ।

ଗତ ଦୁଇ ବର୍ଷ ତଳେ ପାଟଣାଗଡ଼ର ପୂର୍ବତନ ବିଧାୟକ ସରୋଜ ମେହେର ବିବାଦୀୟ ସ୍ଥାନରେ ବିଜୁ ପଟ୍ଟନାୟକଙ୍କ ପ୍ରତିମୂର୍ତ୍ତି ସ୍ଥାପନକୁ ନେଇ ବିବାଦୀୟ ହୋଇଥିଲେ । ପୂର୍ବରୁ ସେହି ସ୍ଥାନରେ ଭଗବାନ ପର୍ଶୁରାମଙ୍କ ଫଟୋ ରଖି ପୂଜାର୍ଚ୍ଚନା କରାଯାଉଥିଲା । ପରେ ସେହି ସ୍ଥାନରେ ବିଜୁ ବାବୁଙ୍କ ପ୍ରତିମୂର୍ତ୍ତି ସ୍ଥାପନ କରାଯାଇଥିଲା । ସେହି ମାମଲା ଏବେ କୋର୍ଟରେ ବିଚାରାଧୀନ ରହିଛି ।

You Can Read:

ରାଜ୍ୟରେ ନିଯୁକ୍ତି ପାଇବେ ୨,୫୦୦ ଗୃହରକ୍ଷୀ, ଅନୁମୋଦନ ଦେଲେ ମୁଖ୍ୟମନ୍ତ୍ରୀ