ମୁମ୍ବାଇ: ମାର୍ଚ୍ଚ ୨୨ରେ ଆଇପିଏଲ୍ ୨୦୨୫ର ଶୁଭାରମ୍ଭ ହେବାକୁ ଯାଉଛି। ଏହା ପୂର୍ବରୁ ଗୁରୁବାର ସବୁ ଦଳର ଅଧିନାୟକଙ୍କ ବୈଠକ ଅନୁଷ୍ଠିତ ହୋଇଛି। ବିସିସିଆଇର ମୁଖ୍ୟାଳୟ ମୁମ୍ବାଇରେ ଏହି ବୈଠକ ବସିଥିଲା। ଏଥର ଆଇପିଏଲ୍ରେ ଅନେକ ନିୟମରେ ପରିବର୍ତ୍ତନ ଘଟିଛି। ବୋଲରଙ୍କୁ ନେଇ ଗୁରୁତ୍ଵପୂର୍ଣ୍ଣ ନିଷ୍ପତ୍ତି ନିଆଯାଇଛି। ବିସିସିଆଇ ବଲ୍ରେ ଲାଳ ବ୍ୟବହାର ଉପରେ ଲାଗିଥିବା କଟକଣାକୁ ହଟାଇ ଦେଇଛି। ଏବେ ବୋଲର ମ୍ୟାଚ୍ରେ ବଲ୍ ଉପରେ ଲାଳ ଲଗାଇ ପାରିବେ। ଏହା ସହିତ ଅନେକ ନିୟମରେ ପରିବର୍ତ୍ତନ ଘଟିଛି।
Also read: ଚହଲ ଓ ଧନଶ୍ରୀଙ୍କ ଛାଡ଼ପତ୍ର ଉପରେ ବାଜିଲା କୋର୍ଟଙ୍କ ମୋହର, ୪ ବର୍ଷର ବୈବାହିକ ଜୀବନରେ ପଡ଼ିଲା ପୂର୍ଣ୍ଣଛେଦ
କ୍ରିକବଜର ଖବର ମୁତାବକ ବୈଠକରେ ଅନେକ ଗୁରୁତ୍ଵପୂର୍ଣ୍ଣ ନିଷ୍ପତ୍ତି ନିଆଯାଇଛି। କରୋନା ସମୟରେ ସ୍ଥିତିକୁ ଦୃଷ୍ଟିରେ ରଖି ବିସିସିଆଇ ଆଇପିଏଲ୍ରେ ବଲ୍ରେ ଲାଳ ବ୍ୟବହାର ଉପରେ କଟକଣା ଲଗାଇଥିଲା। କିନ୍ତୁ ଆଜି ଏହା ଉପରୁ କଟକଣା ହଟାଇ ଦେଇଛି। ଏହା ବାଦ୍ ମ୍ୟାଚ୍ରେ ଦ୍ଵିତୀୟ ବଲ୍କୁ ନେଇ ନିୟମରେ ପରିବର୍ତ୍ତନ ହୋଇଛି। ନୂଆ ନିୟମ ଅନୁଯାୟୀ, ମ୍ୟାଚ୍ରେ ଦ୍ଵିତୀୟ ବୋଲର ଦ୍ଵିତୀୟ ଇନିଂସର ୧୧ତମ ଓଭର ପରେ ଆସିବ। ଏହି ନିୟମ ରାତିରେ କାକରକୁ ଦୃଷ୍ଟିରେ ରଖି ନିଆଯାଇଛି।
ବିସିସିଆଇର ଶୀର୍ଷ ଅଧିକାରୀ କହିଛନ୍ତି, ବଲ୍ ଉପରେ ଲାଳ ନ ଲଗାଇ ପାରିବା କଟକଣାକୁ ହଟାଇ ଦିଆଯାଇଛି। ଅଧିକାଂଶ ଅଧିନାୟକ ଏହାରି ସପକ୍ଷରେ ମତ ବାଢିଛନ୍ତି। କରୋନା ପୂର୍ବରୁ ବଲ୍ରେ ଲାଳ ଲଗାଇବା ସାଧାରଣ କଥା ଥିଲା। ଏବେ କରୋନାର ବିପଦ ଟଳି ସାରିଛି। ତେଣୁ ଆଇପିଏଲ୍ରେ ବଲ୍ରେ ଲାଳ ଲଗାଇବା ଉପରେ ଲାଗିଥିବା କଟକଣା ହଟାଇବାରେ କୌଣସି ଅସୁବିଧା ନାହିଁ।
ଆଇସିସି ଚାମ୍ପିଅନ୍ସ ଟ୍ରଫି ସମୟରେ ଭାରତର ଅନୁଭବୀ ଦ୍ରୁତ ବୋଲର ମହମ୍ମଦ ଶାମି କହିଥିଲେ ଯେ, ବଲ୍ରେ ଲାଳ ଲଗାଇବାର ଆବଶ୍ୟକତା ରହିଛି। ନଚେତ୍ ଏହା ସଂପୂର୍ଣ୍ଣ ବ୍ୟାଟରଙ୍କ ପକ୍ଷରେ ରହିଯିବ। ଦକ୍ଷିଣ ଆଫ୍ରିକାର ଭର୍ଣ୍ଣନ ଫିଲାଣ୍ଡର ଓ ନ୍ୟୁଜିଲାଣ୍ଡର ଟିମ୍ ସାଉଦି ମଧ୍ୟ ଏହାର ସମର୍ଥନ କରିଥିଲେ। ଏହା ପୂର୍ବରୁ କରୋନା ସମୟରେ ଆଇସିସି ପ୍ରଥମେ ବଲ୍ରେ ଲାଳ ଲଗାଇବା ଉପରେ କଟକଣା ଲଗାଇଥିଲା।
