ଭାଗଲପୁର ୨୦/୦୩: ପାଣି ପାଇଁ ଗଡ଼ିଲା ମୁଣ୍ଡ । ବିହାର ଭାଗଲପୁରରୁ ନଜର ଆସିଛି ଏପରି ଅଭାବନୀୟ ଘଟଣା । କେନ୍ଦ୍ରମନ୍ତ୍ରୀ ନିତ୍ୟାନନ୍ଦ ରାୟଙ୍କ ଭଣଜା ବିଶ୍ୱଜିତ ଯାଦବଙ୍କୁ ଦିବାଲୋକରେ ଗୁଳି କରି ହତ୍ୟା କରାଯାଇଛି । ଏହି ଗୁଳିକାଣ୍ଡ ନିତ୍ୟାନନ୍ଦ ରାୟଙ୍କ ଦୁଇ ଭଣଜାଙ୍କ ମଧ୍ୟରେ ହୋଇଛି ।
ଏଥିରେ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣଙ୍କୁ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଛି । ସ୍ଥାନୀୟ ପୋଲିସ କହିବା ମୁତାବକ ନିତ୍ୟାନନ୍ଦ ରାୟଙ୍କ ଦୁଇ ଭଣଜା ବିଶ୍ୱଜିତ୍ ଓ ଜୟଜିତଙ୍କ ମଧ୍ୟରେ ପାଣି ପାଇଁ କଳି ହୋଇଥିଲା । ଏହି କଳି ଏତେ ଉଗ୍ରରୂପ ନେଇଥିଲା କି, ଦୁଇଜଣ ପରସ୍ପରକୁ ଗୁଳି ଚଳାଇଥିଲେ । ଏହି ଗୁଳିକାଣ୍ଡରେ ବିଶ୍ୱଜିତଙ୍କର ମୃତ୍ୟୁ ହୋଇଥିବା ବେଳେ ଜୟଜିତ ଓ ତାଙ୍କ ମାଆ ହିନା ଦେବୀ ଗୁରୁତର ଆହତ ହୋଇ ମେଡିକାଲରେ ଭର୍ତ୍ତି ହୋଇଛନ୍ତି ।
କହିବାକୁ ଗଲେ ବିଶ୍ୱଜିତ ଓ ଜୟଜିତ ଗୋଟିଏ ଘରେ ରହୁଥିଲେ । ଉଭୟ ଚାଷ କରି ନିଜର ଗୁଜରାଣ ମେଣ୍ଟାଉଥିଲେ । ପାଇପ୍ ପାଣିକୁ ନେଇ ଉଭୟଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା । ପ୍ରଥମେ ଜୟଜିତ ବିଶ୍ୱଜିତଙ୍କ ଉପରେ ଗୁଳି ଚଳାଇଥିଲା । ଜବାବରେ ବିଶ୍ୱଜିତ ମଧ୍ୟ ଗୁଳି ଚଳାଇଥିଲା । ଉଭୟଙ୍କୁ ମେଡିକାଲ ନିଆଯାଉଥିବା ବେଳେ ରାସ୍ତାରେ ବିଶ୍ୱଜିତଙ୍କର ମୃତ୍ୟୁ ହୋଇଛି ଓ ଜୟଜିତ ଚିକିତ୍ସାଧୀନ ଅଛନ୍ତି ।
