ରେଭେନ୍ସାରେ ବିପଦ ସଙ୍କୁଳ ଶ୍ରେଣୀଗୃହ : ରାସ୍ତାରେ ବସି ପାଠ ପଢିଲେ ଛାତ୍ରଛାତ୍ରୀ, ଅଧ୍ୟାପକ ନେଲେ କ୍ଲାସ୍

କଟକ ୬।୧୧: ରେଭେନ୍ସା ବିଶ୍ୱବିଦ୍ୟାଳୟରେ ବିକଳ ଚିତ୍ର । ରାସ୍ତାରେ ବସି ପାଠ ପଢିଲେ ଛାତ୍ରଛାତ୍ରୀ । ଏପରିକି ବିଭାଗୀୟ ଅଧ୍ୟାପକ ମଧ୍ୟ ନେଲେ କ୍ଲାସ୍ । ଏଭଳି ଦୃଶ୍ୟ ରେଭେନ୍ସାର ନିକଟ ଅତୀତରେ ହୋଇ ନଥିଲା ବେଳେ ଓଡ଼ିଆ ବିଭାଗର ୟୁଜି ଦ୍ୱିତୀୟ ବର୍ଷ ଛାତ୍ରଛାତ୍ରୀ ଆପଣେଇଛନ୍ତି ଏପରି ପଦକ୍ଷେପ । ବିପଦ ସଂକୁଳ ଅବସ୍ଥାରେ ଶ୍ରେଣୀ ଗୃହ ଥିବାରୁ ସେଠାରେ ପାଠ ପଢିବା ଜୀବନ ସହ ଖେଳିବା ସହ ସମାନ ବୋଲି ଛାତ୍ରଛାତ୍ରୀ କହିଛନ୍ତି ।

ଦୀର୍ଘ ୨୦ ଦିନରୁ ଉର୍ଦ୍ଧ୍ବ ସମୟ ଧରି ଅଭିଯୋଗ କରି ଆସୁଥିଲେ ସୁଦ୍ଧା କୌଣସି ଠୋସ୍ ପଦକ୍ଷେପ ଗ୍ରହଣ କରାନଯିବାରୁ ରାସ୍ତା ଉପରେ ପାଠ ପଢି ଏକପ୍ରକାର ଦାବି ଜଣାଇଛନ୍ତି ବିଭାଗୀୟ ଛାତ୍ରଛାତ୍ରୀ । ଅନ୍ୟପଟେ ଏହି ଘଟଣାରେ ବର୍ଷାକୁ ଦୋଷ ଲଦିବା ସହ ଶୀଘ୍ର ଶ୍ରେଣୀ ଗୃହ ମରାମତି ହେବା ନେଇ ପ୍ରତିକ୍ରିୟା ରଖିଛନ୍ତି ରେଭେନ୍ସା କର୍ତ୍ତୃପକ୍ଷ ।