ମାତ୍ର ୯୪ ରନ୍ ପଛରେ ବିରାଟ କୋହଲି, ନ୍ୟୁଜିଲାଣ୍ଡ ବିପକ୍ଷରେ କରିପାରନ୍ତି ବିଶାଳ ରେକର୍ଡ

ନୂଆଦିଲ୍ଲୀ: ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ ଜାନୁଆରୀ ୧୧ ତାରିଖରୁ ଆରମ୍ଭ ହେବାକୁ ଯାଉଛି। ସିରିଜର ପ୍ରଥମ ମ୍ୟାଚ୍ ଭଦୋଦରାର ବିସିଏ ଷ୍ଟାଡିୟମରେ ଖେଳାଯିବ। ଏହି ମ୍ୟାଚରେ ବିରାଟ କୋହଲି ଏବଂ ରୋହିତ ଶର୍ମା ପୁଣି ଥରେ ଆକ୍ସନରେ ନଜର ଆସିବେ।

ଗତ ବର୍ଷ ଶେଷ ଆଡ଼କୁ କୋହଲି ଉତ୍କୃଷ୍ଟ ଫର୍ମରେ ଥିଲେ। ସେ ଦକ୍ଷିଣ ଆଫ୍ରିକା ବିପକ୍ଷରେ ଦିନିକିଆ ସିରିଜରେ ଦୁଇଟି ଶତକ ଏବଂ ଅର୍ଦ୍ଧଶତକ ହାସଲ କରିଥିଲେ। ଏହା ପରେ, ବିଜୟ ହଜାରେ ଟ୍ରଫିରେ କୋହଲି (୧୩୧, ୭୭) ଚମତ୍କାର ପ୍ରଦର୍ଶନ କରିଥିଲେ। ନୂଆ ବର୍ଷରେ ମଧ୍ୟ କୋହଲି ଏହି ଫର୍ମ ଜାରି ରଖିବାକୁ ଚେଷ୍ଟା କରିବେ।

ନ୍ୟୁଜିଲାଣ୍ଡ ବିପକ୍ଷରେ ପ୍ରଥମ ଦିନିକିଆରେ ବିରାଟଙ୍କ ପାଖରେ ଇତିହାସ ରଚିବାର ସୁଯୋଗ ଅଛି। ସେ ସଚିନ ତେନ୍ଦୁଲକରଙ୍କ ରେକର୍ଡ ଭାଙ୍ଗିପାରନ୍ତି । ଦିନିକିଆରେ ନ୍ୟୁଜିଲାଣ୍ଡ ବିପକ୍ଷରେ ବିରାଟ କୋହଲି ଭାରତ ପାଇଁ ସର୍ବାଧିକ ରନ୍ ସ୍କୋରର ହେବାକୁ ମାତ୍ର ୯୪ ରନ୍ ଦୂରରେ ଅଛନ୍ତି। ସେ ଏପର୍ଯ୍ୟନ୍ତ ୩୩ ଇନିଂସରେ ୫୫.୨୨ ହାରରେ ୧୬୫୭ ରନ୍ କରିଛନ୍ତି।

ଏହି ସମୟ ମଧ୍ୟରେ କୋହଲି ଛଅଟି ଶତକ ଏବଂ ୯ଟି ଅର୍ଦ୍ଧଶତକ ହାସଲ କରିଛନ୍ତି। ସଚିନ ତେନ୍ଦୁଲକର ନ୍ୟୁଜିଲାଣ୍ଡ ବିପକ୍ଷରେ ୪୧ ଇନିଂସରେ ୪୬.୦୫ ହାରରେ ୧୭୫୦ ରନ୍ କରିଥିଲେ । ଏଥିରେ ୫ଟି ଶତକ ଏବଂ ୮ଟି ଅର୍ଦ୍ଧଶତକ ଅନ୍ତର୍ଭୁକ୍ତ। ବୀରେନ୍ଦ୍ର ସେୱାଗ ଏହି ତାଲିକାରେ ତୃତୀୟ ସ୍ଥାନରେ ଅଛନ୍ତି । ସେ ନ୍ୟୁଜିଲାଣ୍ଡ ବିପକ୍ଷରେ ମାତ୍ର ୨୩ ଇନିଂସରେ ୫୨.୫୯ ହାରରେ ୧୧୫୭ ରନ୍ କରିଥିଲେ।

ନ୍ୟୁଜିଲାଣ୍ଡ ବିପକ୍ଷରେ ଦିନିକିଆରେ ସର୍ବାଧିକ ରନ୍ ସ୍କୋରର (ଭାରତୀୟ)

ସଚିନ ତେନ୍ଦୁଲକର - ୧୭୫୦ ରନ୍‌

ବିରାଟ କୋହଲି - ୧୬୫୭ ରନ୍‌

ବୀରେନ୍ଦ୍ର ସେୱାଗ - ୧୧୫୭ ରନ

ମହମ୍ମଦ ଅଝାରୁଦ୍ଦିନ - ୧୧୧୮ ରନ୍‌

ସୌରଭ ଗାଙ୍ଗୁଲି - ୧୦୭୯ ରନ୍

ବିରାଟ କୋହଲି ତାଙ୍କ ଚମତ୍କାର ଦିନିକିଆ କ୍ୟାରିୟରରେ ଆହୁରି କିଛି ମାଇଲଖୁଣ୍ଟ ହାସଲ କରିପାରିବେ। ସେ ଅନ୍ତର୍ଜାତୀୟ କ୍ରିକେଟରେ ୨୮,୦୦୦ ରନ୍ ପୂରଣ କରିବା ପାଇଁ ମାତ୍ର ୨୫ ରନ୍ ଦୂରରେ ଅଛନ୍ତି। ସମସ୍ତ ଫର୍ମାଟରେ ଦ୍ୱିତୀୟ ସର୍ବାଧିକ ରନ୍ ସ୍କୋରର ହେବା ପାଇଁ ସେ କେବଳ ୪୨ ରନ୍ ଦୂରରେ ଅଛନ୍ତି। ସେ ଏପର୍ଯ୍ୟନ୍ତ ସମସ୍ତ ଫର୍ମାଟରେ ୫୫୬ ମ୍ୟାଚ୍ ଖେଳି ୫୨.୫୮ ହାରରେ ୨୭,୯୭୫ ରନ୍ କରିଛନ୍ତି, ଯେଉଁଥିରେ ୮୪ ଶତକ ଏବଂ ୧୪୫ ଅର୍ଦ୍ଧଶତକ ଅନ୍ତର୍ଭୁକ୍ତ।

ଅନ୍ତର୍ଜାତୀୟ କ୍ରିକେଟରେ ସର୍ବାଧିକ ରନ

ସଚିନ ତେନ୍ଦୁଲକର: ୩୪୩୫୭ ରନ୍‌

କୁମାର ସାଙ୍ଗାକାରା: ୨୮୦୧୬ ରନ୍‌

ବିରାଟ କୋହଲି: ୨୭୯୭୫ ରନ୍‌

ରିକି ପଣ୍ଟିଂ: ୨୭୪୮୩ ରନ୍‌

ସନଥ ଜୟସୁରିଆ: ୨୫୯୫୭ ରନ୍