ନୂଆଦିଲ୍ଲୀ 11/04 : ବୁଲଗେରିଆର ଭବିଷ୍ୟବକ୍ତା ବାବା ଭେଙ୍ଗା। ନିଜର ଭବିଷ୍ୟବାଣୀ ପାଇଁ ସାରା ବିଶ୍ୱରେ ଜଣାଶୁଣା। ପୁଣି ଥରେ ଖବରର ଶିରୋନାମାରେ ବାବା ଭେଙ୍ଗା । ତାଙ୍କର ଅନେକ ଭବିଷ୍ୟବାଣୀ ପୂର୍ବରୁ ସତ୍ୟ ପ୍ରମାଣିତ ହୋଇସାରିଛି। ଏବେ 2025 ସହ ଜଡିତ କିଛି ଭବିଷ୍ୟବାଣୀ ମଧ୍ୟ ସତ୍ୟ ହେବାକୁ ଯାଉଛି। ସେ ଭବିଷ୍ୟବାଣୀ କରିଥିଲେ ଯେ 2025 ମସିହାରେ ବିଶ୍ୱ ଏକ ବଡ଼ ଆର୍ଥିକ ବିପର୍ଯ୍ୟୟର ସମ୍ମୁଖୀନ ହେବ। ଯାହା ଏବେ ସତ ହୋଇଛି। ଏକଥା କହିବାର ଅର୍ଥ ଟ୍ରମ୍ପଙ୍କ ଶୁଳ୍କ ଯୋଗୁଁ ବିଶ୍ୱ ସ୍ତରରେ ଆର୍ଥିକ ଅସ୍ଥିରତା ଦେଖାଦେଇଛି। ସେଥିପାଇଁ ବାବା ଭେଙ୍ଗାଙ୍କ ଭବିଷ୍ୟବାଣୀକୁ ଟ୍ରମ୍ପଙ୍କ ଟାରିଫ ସହ ଯୋଡ଼ା ଯାଇଛି। ଏବେ ଭୟ, ଏହା ପ୍ରକୃତରେ ବିଶ୍ୱକୁ ଆର୍ଥିକ ମାନ୍ଦାବସ୍ଥା ଆଡ଼କୁ ନେଇଯିବନି ତ।
ଟ୍ରମ୍ପ୍ ପ୍ରତ୍ୟେକ ଦେଶ ଏବଂ ଭୂଭାଗ ଉପରେ ବିଶାଳ ଶୁଳ୍କ ଘୋଷଣା କରିବା ପରଠାରୁ, ବଜାରରେ ହଇଚଇ ସୃଷ୍ଟି ହୋଇଛି। ବୈଷୟିକ ମାନ୍ଦାବସ୍ଥାର ଭୟ ମଧ୍ୟରେ ସୋମବାର ସାରା ବିଶ୍ୱର ଷ୍ଟକ୍ ବଜାରରେ ଭୁଶୁଡ଼ି ପଡ଼ିଛି । 1987 ପରେ ଏହା ସବୁଠାରୁ ଖରାପ ସ୍ଥିତି ବୋଲି ଆଶା କରାଯାଉଛି। ଟ୍ରମ୍ପ୍ ଏପ୍ରିଲ ୫ ତାରିଖରେ ୧୦ ପ୍ରତିଶତର ଏକ ମୂଳ ଶୁଳ୍କ ଲଗାଇବା ପରେ ଏଭଳି ସ୍ଥିତି ଉପୁଜିଛି । ଟ୍ରମ୍ପ ଏହାକୁ ଐତିହାସିକ ପଦକ୍ଷେପ କହିବା ସହିତ "ମୁକ୍ତି ଦିବସ" ସହ ତୁଳନା କରିଥିଲେ।
ଟ୍ରମ୍ପଙ୍କ ପଦକ୍ଷେପ ଯୋଗୁଁ ଚୀନ୍ ଏବଂ ୟୁରୋପୀୟ ସଂଘ ପ୍ରତିଶୋଧମୂଳକ ଶୁଳ୍କ ଲଗାଇବାକୁ ବାଧ୍ୟ ହୋଇଛନ୍ତି । ପ୍ରଥମେ ବେଜିଂ ଆମେରିକୀୟ ସାମଗ୍ରୀ ଉପରେ 34 ପ୍ରତିଶତ ଶୁଳ୍କ ଲଗାଇଥିଲେ । ଏହା ପରେ ଆମେରିକା ପ୍ରଶାସନ ଚୀନ୍ ଉପରେ 50 ପ୍ରତିଶତ ରେସିପ୍ରୋକାଲ୍ ଟ୍ୟାକ୍ସ ଲଗାଇଥିଲେ । ଆମେରିକା ଓ ଚୀନ୍ ମଧ୍ୟରେ ଏହି ବାଣିଜ୍ୟ ଯୁଦ୍ଧ ଦିନକୁ ଦିନ ଜଟିଳ ହେବାରେ ଲାଗିଛି । ଚୀନ୍ ଶୁକ୍ରବାର ଆମେରିକୀୟ ଉତ୍ପାଦ ଉପରେ ଟାରିଫକୁ ୮୪%ରୁ କରି ୧୨୫%କୁ ବୃଦ୍ଧି କରିଛି । ସେପଟେ ଆମେରିକା ମଧ୍ୟ ଯେସାକୁ ତେସା ଶୁଳ୍କକୁ ଆହୁରି ବଢ଼ାଦେଇ ୧୪୫% କରିଛି ।
ଚୀନର ଅର୍ଥ ମନ୍ତ୍ରାଳୟ କହିଛି ଯେ, ଆମେରିକାର ଏହି ଅତ୍ୟଧିକ ଟାରିଫ ଆନ୍ତର୍ଜାତୀୟ ବାଣିଜ୍ୟ ନିୟମ ଓ ଅର୍ଥନୈତିକ ନୀତିର ଗୁରୁତର ଉଲ୍ଲଂଘନ। ଏହାକୁ ସେମାନେ "ଏକପାଖିଆ ଧମକ" ଓ "ଜବରଦସ୍ତି" ବୋଲି କହିଛନ୍ତି । ତେବେ ଚୀନ ଘୋଷଣା କରିଛି ଯେ ଯଦି ଆମେରିକା ଏତିକିରେ ନ ଅଟକି ତା’ର ନୀତି ଜାରି ରଖେ ତେବେ ଚୀନ ମଧ୍ୟ ଚୁପ୍ ବସିବ ନାହିଁ। ଏହା ବିରୁଦ୍ଧରେ ଅଧିକ ପ୍ରତିଶୋଧମୂଳକ ପଦକ୍ଷେପ ଗ୍ରହଣ କରିବ।
ଟ୍ରମ୍ପଙ୍କ ଟାରିଫ ଓ୍ବାର ବିଶ୍ୱ ଅର୍ଥନୀତିରେ ଅସ୍ଥିରତା ସୃଷ୍ଟି କରିଛି । ବିଶେଷ କରି ଆମେରିକା ଶେୟାର ବଜାରରେ ତୀବ୍ରଗତିରେ ହ୍ରାସ ପାଉଛି । ସବୁଠାରୁ ବଡ କଥା ହେଉଛି ଆମେରିକୀୟ ଡଲାର ସ୍ୱିସ ଫ୍ରାଙ୍କ ତୁଳନାରେ ୧୦ ବର୍ଷରେ ସର୍ବନିମ୍ନ ସ୍ତରକୁ ଖସିଆସିଛି। ଏହି ବାଣିଜ୍ୟ ଯୁଦ୍ଧର ପ୍ରଭାବ କେବଳ ଚୀନ ଓ ଆମେରିକା ମଧ୍ୟରେ ସୀମିତ ନାହିଁ। ଏହା ବିଶ୍ୱ ଅର୍ଥନୀତି, ଯୋଗାଣ ଶୃଙ୍ଖଳା ଏବଂ ଉପଭୋକ୍ତା ମୂଲ୍ୟ ଉପରେ ଗଭୀର ପ୍ରଭାବ ପକାଇଛି ।
ତେବେ ଲୋକମାନେ ଏସବୁକୁ ବାବା ଭେଙ୍ଗାଙ୍କ ଭବିଷ୍ୟବାଣୀର ଯୋଡ଼ିଛନ୍ତି। ଯଦିଓ ବାବାଙ୍କ ଭବିଷ୍ୟବାଣୀର କୌଣସି ସରକାରୀ ରେକର୍ଡ ନାହିଁ, ତଥାପି ଅନେକ ଅଛନ୍ତି ଯେଉଁମାନେ ବାବା ଭେଙ୍ଗାଙ୍କୁ ବିଶ୍ୱାସ କରନ୍ତି। କାହିଁକିନା ବାବା ଭେଙ୍ଗାଙ୍କ ଅନେକ ଭବିଷ୍ୟବାଣୀ ସତ ହୋଇଛି। ଯେମିତି କି ୯/୧୧ ମୁମ୍ବାଇ ଆଟାକ୍ ହେଉକି ରାଜକୁମାରୀ ଡାଏନାଙ୍କ ମୃତ୍ୟୁ ଭଳି ଘଟଣା । 2025 ମିଆଁମାର ଭୂମିକମ୍ପକୁ ନେଇ ମଧ୍ୟ ଭବିଷ୍ୟବାଣୀ କରିଥିଲେ, ଯାହା ସତ ହୋଇଛି । ଏବେ ବାବା ଭେଙ୍ଗାଙ୍କ ଟାରିଫ୍ ଭବିଷ୍ୟବାଣୀ ସମସ୍ତଙ୍କୁ ଚିନ୍ତାରେ ପକାଇ ଦେଇଛି ।
