ପରଲୋକରେ ବିଶିଷ୍ଟ କଣ୍ଠଶିଳ୍ପୀ ଗୀତା ପଟ୍ଟନାୟକ, ଚିକିତ୍ସାଧୀନ ଅବସ୍ଥାରେ ଶେଷ ନିଶ୍ବାସ ତ୍ୟାଗ

କଟକ: ପରଲୋକରେ ବିଶିଷ୍ଟ କଣ୍ଠଶିଳ୍ପୀ ଗୀତା ପଟ୍ଟନାୟକ। ରବିବାର ସନ୍ଧ୍ୟାରେ କଟକର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ଘଟିଛି। ଗୁରୁବାର ଏକ କାର୍ଯ୍ୟକ୍ରମରେ ଯୋଗ ଦେଇଥିବା ବେଳେ ହଠାତ୍ ତାଙ୍କର ବ୍ରେନ୍ ଷ୍ଟ୍ରୋକ୍ ହୋଇଥିଲା। ଯାହାପରେ ତାଙ୍କୁ କଟକର ଏକ ଘରୋଇ ହସ୍ପିଟାଲରେ ଚିକିତ୍ସା ପାଇଁ ଭର୍ତ୍ତିକ କରାଯାଇଥିଲା। ହେଲେ ରବିବାର ସନ୍ଧ୍ୟା ୬.୧୮ ମିନିଟରେ ତାଙ୍କର ଦେହାନ୍ତ ହୋଇଥିବା ପରିବାର ଲୋକଙ୍କ ସୂତ୍ରରୁ ଜଣାପଡ଼ିଛି । ଅଭିଜିତ୍ ମଜୁମଦାର ଓ ହ୍ୟୁମାନ ସାଗରଙ୍କ ପରେ ପ୍ରସିଦ୍ଧ କଣ୍ଠଶିଳ୍ପୀ ଗୀତା ପଟ୍ଟନାୟକଙ୍କ ପରଲୋକରେ ଓଲିଉଡରେ ଶୋକର ଛାୟା ଖେଳି ଯାଇଛି।

ସୂଚନାଥାଉକି, ଓଡ଼ିଆ ଚଳଚ୍ଚିତ୍ର ସମେତ ଅନେକ ଆଧୁନିକ ଗାଇଛନ୍ତି ଗୀତା ପଟ୍ଟନାୟକ। ୧୯୭୦ ଦଶକରୁ ଗୀତା ପଟ୍ଟନାୟକ ଓଡ଼ିଆ ସଙ୍ଗୀତରେ ଏକ ପ୍ରମୁଖ ସ୍ୱର ହୋଇଆସିଛନ୍ତି, ବିଶେଷକରି ପ୍ରସିଦ୍ଧ ଗାୟକ ଅକ୍ଷୟ ମହାନ୍ତିଙ୍କ ନିର୍ଦ୍ଦେଶନାରେ ଅନେକ ଲୋକପ୍ରିୟ ଗୀତ ଭେଟିଦେଇଥିଲେ। ତାଙ୍କର ଅବଦାନ ଓଡ଼ିଆ ଚଳଚ୍ଚିତ୍ର ଏବଂ ଅଣ-ଫିଲ୍ମ ସଙ୍ଗୀତ ଉପରେ ଏକ ସ୍ଥାୟୀ ପ୍ରଭାବ ପକାଇଛି।

ତାଙ୍କର କିଛି ଲୋକପ୍ରିୟ ଗୀତ ମଧ୍ୟରେ ରହିଛି "ଏମିତି ପୁଅକୁ ମୁଁ ବାହା ହୁଏନ୍ତି", "ବାହା ମୁଁ ହେବି", "ମୋ ଦେହରେ" ଏବଂ "ଏ ଦୁନିଆରେ କେହି ନା କେହି", "ଯୌତୁକ ନବ", "ନାଗରରେ ମୋର" ଏବଂ "ତୋ ବଇଂଶୀ" ଭଳି ଲୋକପ୍ରିୟ ଡୁଏଟ୍।