ନୂଆଦିଲ୍ଲୀ ୦୬।୦୮: ୨୯ ଜୁଲାଇ ରାତିର ସମୟ । ଭୁଶୁଡ଼ିଲା ୧୧୦୦ ବର୍ଷ ପୁରୁଣା ପିରାମିଡ୍ । ଏବେ ଖେଳିଯାଇଛି ଭୟର ବାତାବରଣ । ଲୋକଙ୍କ ବିଶ୍ବାସ ମାଡି ଆସିବ ବିପଦ । ପ୍ରବଳ ବର୍ଷା କାରଣରୁ ଘଟିଛି ଅଘଟଣ । ଏହା କେବଳ ଐତିହାସିକ ଐତିହ୍ୟର କ୍ଷତି ନୁହେଁ ବରଂ ଆଗାମୀ ଭବିଷ୍ୟତର ଏକ ବିପଦପୂର୍ଣ୍ଣ ଚେତାବନୀ ମଧ୍ୟ।
ମେକ୍ସିକୋର ମିଚୋଆକାନ ରାଜ୍ୟରେ ଅବସ୍ଥିତ ଏହି ପିରାମିଡ । ଏହା ୧୫ ମିଟର ଉଚ୍ଚ ଅର୍ଥାତ୍ ପ୍ରାୟ ୫୦ ଫୁଟ ପଥର ପିରାମିଡ । ଏହାକୁ ପ୍ରବଳ ବର୍ଷା ଏବଂ କ୍ରମାଗତ ଖରାପ ପାଗ ନଷ୍ଟ କରିଦେଇଛି । ଏହା ମିଚୋଆକାନ ରାଜ୍ୟ ସଭ୍ୟତାର ସର୍ବୋତ୍ତମ ସଂରକ୍ଷିତ ସ୍ମାରକୀ ମଧ୍ୟରୁ ଅନ୍ୟତମ । ମେକ୍ସିକୋରେ ବାସ କରୁଥିବା ସ୍ଥାନୀୟ ପୁରେପେଚା ସମ୍ପ୍ରଦାୟର ଆଦିବାସୀ ଲୋକମାନେ ଏହି ଘଟଣାକୁ ଅଭିଶପ୍ତ ମାନିଥାନ୍ତି । ଏପରି ଘଟଣାକୁ ବିପର୍ଯ୍ୟୟ, ବିଦେଶୀ ଆକ୍ରମଣ କିମ୍ବା ପ୍ରାକୃତିକ ବିପର୍ଯ୍ୟୟର ସଙ୍କେତ ଭାବରେ ସେମାନେ ମାନିଥାଏ ।
ଐତିହାସିକମାନଙ୍କ ମତରେ ପୁରେହପେଚା ଜନଜାତି ଏହି ୟାକାଟା ପିରାମିଡକୁ ସେମାନଙ୍କର ଦେବତା କୁରିକୱେରୀଙ୍କୁ ଖୁସି କରିବା ପାଇଁ ମାନବ ବଳି ଦେବା ପାଇଁ ବ୍ୟବହାର କରୁଥିଲେ । କିଛି ଲୋକ ଏହି ପିରାମିଡର ଧ୍ୱଂସକୁ ବିଶ୍ୱରେ ଆସୁଥିବା ଏକ ବଡ଼ ବିପର୍ଯ୍ୟୟର ସଙ୍କେତ ବୋଲି କହିଛନ୍ତି । ଯାହା ସ୍ଥାନୀୟ ଲୋକଙ୍କ ମଧ୍ୟରେ ଚିନ୍ତା ବଢାଇଛି । ତାରିଆକ୍ୱିରି ଆଲଭାରେଜ୍ ନାମକ ଜଣେ ବ୍ୟକ୍ତି କହିଛନ୍ତି ଯେ ତାଙ୍କ ପୂର୍ବପୁରୁଷମାନେ ଇହୁଆଟଜିୟୋରେ ପିରାମିଡ୍ ଧ୍ୱଂସକୁ ବିପର୍ଯ୍ୟୟର ସଙ୍କେତ ଭାବରେ ଭବିଷ୍ୟବାଣୀ କରିଥିଲେ ।
ତାଙ୍କ ଅନୁସାରେ ମେକ୍ସିକୋରେ ବିଦେଶୀ ବିଜେତାଙ୍କ ଆଗମନ ପୂର୍ବରୁ ସମାନ ଘଟଣା ଘଟିଥିଲା। ଏବେ ପ୍ରଶ୍ନ ଆସୁଛି ଏହାକୁ କାହିଁକି କୁହାଯାଏ ଅଶୁଭ ସଙ୍କେତ ? ପୁରେହପେଚା ସଂସ୍କୃତି ଆଜି ମଧ୍ୟ ଜୀବିତ ଅଛି । ସେମାନଙ୍କ ବଂଶଧରମାନେ ଏହି ଐତିହ୍ୟକୁ ନିଜର ପରିଚୟ ଭାବରେ ମାନିଥାଆନ୍ତି । ପିରାମିଡ୍ ଧ୍ୱଂସକୁ ଅଶୁଭ ସଙ୍କେତ କହିବା ପଛରେ ସ୍ଥାନୀୟ ସାଂସ୍କୃତିକ ଏବଂ ଐତିହାସିକ ବିଶ୍ୱାସ ରହିଛି । ଏହି ଘଟଣାର ବୈଜ୍ଞାନିକ କାରଣ ହେଉଛି ଜଳବାୟୁ ପରିବର୍ତ୍ତନ ଏବଂ ପ୍ରବଳ ବର୍ଷା।
ମେକ୍ସିକୋର ନ୍ୟାସନାଲ୍ ଇନଷ୍ଟିଚ୍ୟୁଟ୍ ଅଫ୍ ଆନ୍ଥ୍ରୋପୋଲୋଜି ଆଣ୍ଡ୍ ହିଷ୍ଟ୍ରି (INAH) କହିଛି ଯେ ପିରାମିଡ୍ର ଛଅ ପାହାଚ ବିଶିଷ୍ଟ ସ୍ତର, ବାହ୍ୟ କାନ୍ଥ ଏବଂ ମୂଳ ଗଠନ ପୂର୍ବରୁ ଖରାପ ଅବସ୍ଥାରେ ଥିଲା। ଏହା ପୂର୍ବରୁ ଦେଶ ୩୦ ବର୍ଷ ମଧ୍ୟରେ ସବୁଠାରୁ ଖରାପ ମରୁଡ଼ିର ସମ୍ମୁଖୀନ ହୋଇଥିଲା। ଗରମ ଏବଂ ମରୁଡ଼ି ଯୋଗୁଁ ପିରାମିଡ୍ରେ ଫାଟ ସୃଷ୍ଟି ହୋଇଥିଲା।
ପାଣି ସେଗୁଡ଼ିକ ଭିତରକୁ ଲିକ୍ ହେବା ଆରମ୍ଭ କରିଥିଲା ଏବଂ ଶେଷରେ ଗଠନର ଭୁଶୁଡ଼ିବା ନିଶ୍ଚିତ ହୋଇଥିଲା। ବିଶେଷଜ୍ଞମାନେ କହିଛନ୍ତି ଯେ ପରିବର୍ତ୍ତିତ ଜଳବାୟୁ ଯୋଗୁଁ ସାରା ବିଶ୍ୱରେ ଏପରି ଘଟଣା ବୃଦ୍ଧି ପାଇବ। INAH ଅଧିକାରୀମାନେ ଏବେ ପିରାମିଡ୍ ମରାମତି କରିବାରେ ବ୍ୟସ୍ତ। ସେମାନେ ଏହାକୁ ମେକ୍ସିକୋର ଏକ ସାଂସ୍କୃତିକ ଐତିହ୍ୟ ବୋଲି କହି ଯଥାଶୀଘ୍ର ଢାଞ୍ଚାକୁ ସ୍ଥିର କରିବାକୁ ଚେଷ୍ଟା କରୁଛନ୍ତି।
