ବିଧାନସଭା ଶୀତ ଅଧିବେଶନ ଶେଷ, ହେଲେ ଜାରି ରହିଛି ଶିକ୍ଷକଙ୍କ ଆନ୍ଦୋଳନ

ଭୁବନେଶ୍ଵର: ବିଧାନସଭା ଶୀତ ଅଧିବେଶନ ଶେଷ ହୋଇଥିଲେ ବି ଶେଷ ହୋଇନି ଶିକ୍ଷକଙ୍କ ଆନ୍ଦୋଳନ। ଡିସେମ୍ବର ୩୧ ଯାଏ ଅଧିବେଶନ ଚାଲିବ ବୋଲି ସ୍ଥିର ହୋଇଥିଲା। କିନ୍ତୁ ୧୮ଟି କାର୍ଯ୍ୟ ଦିବସ ପୂର୍ବରୁ ଗୃହକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବୀ ଘୋଷଣା କରାଯାଇଛି। ଗୃହ ସିନା ବନ୍ଦ ହୋଇଗଲା ହେଲେ ବନ୍ଦ ହେଉନି ଲୋୟର ପିଏମ୍ଜିରେ ଚାଲିଥିବା ଆନ୍ଦୋଳନ। ପ୍ରାଥମିକ ଶିକ୍ଷକଙ୍କ ପରେ ଆନ୍ଦୋଳନକୁ ଓହ୍ଲାଇଛନ୍ତି କନିଷ୍ଠ ଶିକ୍ଷକ।

ସରିଲା ବିଧାନସଭା। ସରିଲାନି ଆନ୍ଦୋଳନ। ବିଧାନସଭା ଅଧିବେଶନ ଶେଷ ହୋଇଥିଲେ ବି ଜାରି ରହିଛି ଶିକ୍ଷକଙ୍କ ଆନ୍ଦୋଳନ। ଦାବି ପୂରଣ ପାଇଁ ଲୋୟର ପିଏମ୍ଜିରେ ଧାରଣା, ନାରାବାଜି ଜାରି। ପ୍ରାଥମିକ ଶିକ୍ଷକଙ୍କ ପରେ ଆନ୍ଦୋଳନରେ କନିଷ୍ଠ ଶିକ୍ଷକ। ଚାକିରି ନିୟମିତ କିରବା ଦାବିରେ ହଲ୍ଲାବୋଲ କରୁଛନ୍ତି ହଜାର ହଜାର ଶିକ୍ଷକ।

ପ୍ରାଥମିକ ଶିକ୍ଷା ବ୍ୟବସ୍ଥାରେ ସାରା ରାଜ୍ୟରେ ୧୩ ହଜାରରୁ ଅଧିକ କନିଷ୍ଠ ଶିକ୍ଷକ ଠିକା କର୍ମଚାରୀ ଭାବେ କାମ କରୁଛନ୍ତି। ଏମାନଙ୍କୁ ନିୟମିତ କରିବା ପାଇଁ ଗତ ଅଗଷ୍ଟ ୨୨ରେ ଘୋଷଣା କରିଥିଲେ ରାଜ୍ୟ ସରକାର । ଏହା ଭିତରେ ୪ ମାସ ବିତିଥିଲେ ବି କୌଣସି ସରକାରୀ ନିର୍ଦ୍ଦେଶନାମା ବାହାରିଲାନି। ଯାହାକୁ ନେଇ ରାସ୍ତାକୁ ଓହ୍ଲାଇଛନ୍ତି କନିଷ୍ଠ ଶିକ୍ଷକ। ଦାବି ପୂରଣ ନହେବା ଯାଏ ଆନ୍ଦୋଳନ ଜାରି ରହିବ ବୋଲି ଚେତାବନୀ ଦେଇଛନ୍ତି ।

ସେହିପରି ୫ ଦଫା ଦାବିରେ ଅହୋରାତ୍ର ଧାରଣାରେ ବସିଛନ୍ତି ଓଡ଼ିଶା ସ୍କୁଲ କଲେଜ ଶିକ୍ଷକ ଓ କର୍ମଚାରୀ ସମନ୍ବୟ ସମିତି। ରାଜ୍ୟରେ ଥିବା ୧୯୪ ଟି ବିଦ୍ୟାଳୟକୁ ଅନୁଦାନ ପ୍ରଦାନ ଦାବିରେ ୧୦ ହଜାରରୁ ଅଧିକ ଶିକ୍ଷକ ଶିକ୍ଷୟିତ୍ରୀ ଆନ୍ଦୋଳନରେ ବସିଛନ୍ତି। କେବଳ ବିଦ୍ୟାଳୟ ନୁହେଁ ଯେଉଁ ମହାବିଦ୍ୟାଳୟ ମଧ୍ୟ ଅନୁଦାନ ଯୋଗ୍ୟ ତାକୁ ମଧ୍ୟ ଅନୁଦାନ ଦେବା ପାଇଁ ସଂଘ ଦାବି କରିଛି।

ସ୍କୁଲ ଛାଡ଼ି ବାରମ୍ବାର ଶିକ୍ଷକମାନଙ୍କ ଧାରଣା ଓ ଆନ୍ଦୋଳନକୁ ନେଇ କଡ଼ା ଆଭିମୁଖ୍ୟ ରଖିଛନ୍ତି ବିଦ୍ୟାଳୟ ଓ ଗଣିଶିକ୍ଷା ମନ୍ତ୍ରୀ। ଶିକ୍ଷକଙ୍କ ନ୍ୟାର୍ଯ୍ୟ ଦାବିକୁ ସରକାର ବିଚାର କରୁଛନ୍ତି। କିନ୍ତୁ ଆନ୍ଦୋଳନ ମାଧ୍ୟମରେ ଚାପ ପକାଇଲେ କୌଣସି ପ୍ରଭାବ ପଡିବନି ବୋଲି ମନ୍ତ୍ରୀ ଶୁଣାଇ ଦେଇଛନ୍ତି । ବିଶୃଙ୍ଖଳା ଆଚରଣ କଲେ କିମ୍ବା ନିର୍ଦ୍ଦେଶ ନମାନିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାବନୀ ଦେଇଛନ୍ତି।

ଶିକ୍ଷକଙ୍କ ଦାବି ସଂପର୍କରେ ଅନୁଧ୍ୟାନ କରିବାକୁ ନିକଟରେ ସରକାର ଏକ କମିଟି ଗଠନ କରିଛନ୍ତି। ଶିକ୍ଷକଙ୍କ ଅଭିଯୋଗ ଶୁଣି କମିଟି ୬ ମାସ ମଧ୍ୟରେ ରିପୋର୍ଟ ଦେବ। ରିପୋର୍ଟ ଅନୁସାରେ ସରକାର ନିଷ୍ପତ୍ତି ନେବେ ବୋଲି ଘୋଷଣା କରିଛନ୍ତି । ଏହା ପରେ ବି ଶିକ୍ଷକମାନେ ଦାବି ହାସଲ ପାଇଁ ଜାରି ରଖିଛନ୍ତି ଆନ୍ଦୋଳନ।