ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଓ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଭେଟିଲେ ବାୟୁସେନା ମୁଖ୍ୟ ମାର୍ଶଲ ଅମର ପ୍ରୀତ ସିଂହ। ସେ ରବିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିଛନ୍ତି ଗୁରୁତ୍ୱପୂର୍ଣ୍ଣ ଆଲୋଚନା କରିଥିବା ଜଣାପଡ଼ିଛି। କେବଳ ବାୟୁସେନା ନୁହେଁ, ପିଏମ ମୋଦୀ ତିନି ସେନା(ଜଳ ସ୍ଥଳ ଓ ଆକାଶ) ବାହିନୀର ମୁଖ୍ୟଙ୍କ ସହ ସାକ୍ଷାତ କରିଛନ୍ତି। ପହଲଗାମ ଆକ୍ରମଣ ପରେ ପାକିସ୍ତାନ ବିରୁଦ୍ଧରେ ସାମରିକ କାର୍ଯ୍ୟାନୁଷ୍ଠାନ ନେବା ପାଇଁ ଆଲୋଚନା କରାଯାଉଥିବା ସୂଚନା ମିଳିଛି।
ଏପ୍ରିଲ ୨୨ ତାରିଖରେ ପହଲଗାମ ଆତଙ୍କବାଦୀ ଆକ୍ରମଣ ଘଟିବା ପରେ ପ୍ରଧାନମନ୍ତ୍ରୀ ମୋଦୀ ୨୬ ଏପ୍ରିଲରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ସହ ଆଲୋଚନା କରିଥିଲେ। ଏଥିସହିତ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ, ପ୍ରତିରକ୍ଷା ମୁଖ୍ୟ (ସିଡିଏସ୍) ଜେନେରାଲ ଅନିଲ ଚୌହାନ ଏବଂ ଅନ୍ୟାନ୍ୟ ସଶସ୍ତ୍ର ବାହିନୀ ମୁଖ୍ୟଙ୍କ ସହ ଏକ ଗୁରୁତ୍ୱପୂର୍ଣ୍ଣ ବୈଠକ କରିଥିଲେ। ଦେଢ଼ ଘଣ୍ଟାର ଏହି ବୈଠକରେ ପ୍ରଧାନମନ୍ତ୍ରୀ ମୋଦୀ ପାକିସ୍ତାନ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ସଶସ୍ତ୍ର ବାହିନୀକୁ ସମସ୍ତ ସରକାରୀ କଟକଣାରୁ ମୁକ୍ତ କରିଥିଲେ ବୋଲି କୁହାଯାଉଛି।
ଫାଇଲ ଫଟୋ
ପଢ଼ନ୍ତୁ-‘ପରମାଣୁ ଅସ୍ତ୍ର ସହ ସବୁ ଶକ୍ତି ଲଗାଇଦେବୁ’: ଋଷ୍ରେ ଅବସ୍ଥାପିତ ପାକ୍ ରାଷ୍ଟ୍ରଦୂତଙ୍କ ଧମକ
ପାକିସ୍ତାନ ବିରୁଦ୍ଧରେ ସାମରିକ କାର୍ଯ୍ୟାନୁଷ୍ଠାନ ନେବାର ସମ୍ଭାବନା ମଧ୍ୟରେ, ସେନା ମୁଖ୍ୟ ଜେନେରାଲ ଦ୍ୱିବେଦୀ ଏପ୍ରିଲ ୩୦ ତାରିଖରେ ପ୍ରଧାନମନ୍ତ୍ରୀ ମୋଦିଙ୍କୁ ତାଙ୍କ ୭, ଲୋକ କଲ୍ୟାଣ ମାର୍ଗସ୍ଥିତ ବାସଭବନରେ ଭେଟିଥିଲେ। ବୈଦେଶିକ ମନ୍ତ୍ରୀ ଏସ ଜୟଶଙ୍କର ଏବଂ ଏନଏସଏ ଡୋଭାଲ ମଧ୍ୟ ବୈଠକରେ ଯୋଗ ଦେଇଥିଲେ।
ସେହିପରି ମେ ୩ ତାରିଖ ସନ୍ଧ୍ୟା ୬ ଟାରେ ନୌସେନା ମୁଖ୍ୟ ଆଡମିରାଲ ଦିନେଶ ତ୍ରିପାଠି ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଥିଲେ। ଏହି ବୈଠକ ଗୋଟିଏ ଘଣ୍ଟା ଧରି ଚାଲିଥିଲା। ଏହାପରେ ଆଜି ଦିନ ୧୨ ଟାରେ ବାୟୁସେନା ମୁଖ୍ୟ ଏୟାର ଚିଫ୍ ମାର୍ଶଲ ଏପି ସିଂହ ମଧ୍ୟ ପ୍ରଧାନମନ୍ତ୍ରୀଙ୍କୁ ଭେଟି ୪୦ ମିନିଟ୍ ପାଇଁ ଆଲୋଚନା କରିଛନ୍ତି।
ପହଲଗାମ ହତ୍ୟାକାଣ୍ଡକୁ ନେଇ ଭାରତ ଏବଂ ପାକିସ୍ତାନ ମଧ୍ୟରେ ବଢ଼ୁଥିବା ଉତ୍ତେଜନା ମଧ୍ୟରେ, ଅର୍ଡନାନ୍ସ ଫ୍ୟାକ୍ଟ୍ରି ବୋର୍ଡ ତୁରନ୍ତ ପ୍ରଭାବରୁ ସମସ୍ତ କର୍ମଚାରୀଙ୍କ ଛୁଟି ବାତିଲ କରିଛି। ସାରା ଦେଶରେ ପ୍ରତିରକ୍ଷା ପ୍ରସ୍ତୁତି ବୃଦ୍ଧି ପାଉଥିବା ବେଳେ ବୋର୍ଡ ଏହି ପଦକ୍ଷେପ ନେଇଛି।
ସୂଚନା ଥାଉକି ଡାଇରେକ୍ଟର ଅପ୍ ଅର୍ଡନାନ୍ସ ବା ଅସ୍ତ୍ରଶସ୍ତ୍ର ନିର୍ଦ୍ଦେଶାଳୟ (ସମନ୍ୱୟ ଏବଂ ସେବା) ଭାରତ ସରକାରଙ୍କ ପ୍ରତିରକ୍ଷା ମନ୍ତ୍ରଣାଳୟର ପ୍ରତିରକ୍ଷା ଉତ୍ପାଦନ ବିଭାଗ ଅଧୀନରେ ଆସୁଥିବା ଏକ ପ୍ରାଧିକରଣ। ଏହାର ପ୍ରାଥମିକ କାର୍ଯ୍ୟ ହେଉଛି ସରକାରୀ ଅସ୍ତ୍ରଶସ୍ତ୍ର ଉତ୍ପାଦନ ସାର୍ବଜନୀନ କମ୍ପାନୀଗୁଡ଼ିକର ପରିଚାଳନା, ନିର୍ଦ୍ଦେଶ ଦେବା ଏବଂ ସମନ୍ୱୟ ସ୍ଥାପନ କରିବା। ସରକାର ଏମାନଙ୍କ ଛୁଟି ବାତିଲ କରିବା ଅର୍ଥ ଆଗକୁ କିଛି ବଡ଼ ଧରଣର ଯୋଜନା ହେବାର ସମ୍ଭାବନା ରହିଛି।
ପଢନ୍ତୁ- ଜମ୍ମୁ-କାଶ୍ମୀର ରାମବନରେ ଦୁର୍ଘଟଣା, ଖାଇକୁ ଖସିଲା ସେନା ବାହନ, ୩ ଯବାନ ନିହତ
