ନୂଆଦିଲ୍ଲୀ,୧୯/୫: ୨୦୨୪ ନିର୍ବାଚନରେ ବଢ଼ୁଛି ବୟାନବାଜି । କଂଗ୍ରେସ ଦଳ ମଧ୍ୟରେ ପରସ୍ପର ବିରୋଧୀରେ ବୟାନବାଜି ତେଜିବାରେ ଲାଗିଛି । ଯାହାକୁ ନେଇ ଦଳର ଅଧ୍ୟକ୍ଷ ମଲିକାର୍ଜୁନ ଖଡ୍ଗେ ଦଳୀୟ ସାଂସଦ ଅଧୀର ରଞ୍ଜନ ଚୌଧୁରୀଙ୍କୁ ଚରମବାଣୀ ଶୁଣାଇଛନ୍ତି । ଖଡଗେ କହିଛନ୍ତି, ଯେଉଁମାନେ ଦଳର ହାଇକମାଣ୍ଡଙ୍କୁ ଅମାନ୍ୟ କରିବେ ତାଙ୍କୁ ଦଳରୁ ବାହାର ରାସ୍ତା ଦେଖାଇ ଦିଆଯିବ ।
ଖଡଗେ କହିଛନ୍ତି, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ତଥା ଟିଏମ୍ସି ସୁପ୍ରିମୋ ମମତା ବାନାର୍ଜୀ ସ୍ପଷ୍ଟ କରିଛନ୍ତି ସେ ଇଣ୍ଡିଆ ମେଣ୍ଟକୁ ବାହାରୁ ସମର୍ଥନ କରିବେ । ଅତୀତରେ ଏଭଳି ହୋଇଛି । କଂଗ୍ରେସ ନେତୃତ୍ୱାଧୀନ ୟୁପିଏ ସରକାର ବେଳେ ବାମପନ୍ଥୀ ଦଳ ବାହାରୁ ସମର୍ଥନ କରିଥିଲେ । ନିକଟରେ ମମତା ଏକଥା ମଧ୍ୟ କହିଛନ୍ତି କି ଇଣ୍ଡିଆ ମେଣ୍ଟ ସରକାରରେ ସାମିଲ ହେବେ । ଏଥରୁ ଗୋଟିଏ କଥା ସ୍ପଷ୍ଟ ହୋଇଛି କି ସେ ଇଣ୍ଡିଆ ମେଣ୍ଟ ସହ ଅଛନ୍ତି । ଅଧୀର ରଞ୍ଜନ ଏହା ଉପରେ ନିଷ୍ପତ୍ତି ନେବାକୁ କେହି ନୁହନ୍ତି । ହାଇକମାଣ୍ଡ ଓ ଦଳର ଶୀର୍ଷ ନେତୃତ୍ୱ ଏହି ପ୍ରସଙ୍ଗରେ ନିଷ୍ପତ୍ତି ନେବେ । କିନ୍ତୁ ଯେଉଁମାନେ ହାଇକମାଣ୍ଡଙ୍କ ନିଷ୍ପତ୍ତିକୁ ଗ୍ରହଣ କରିବେ ନାହିଁ ସେମାନଙ୍କୁ ଦଳରୁ ବିତାଡିତ କରାଯିବ ।
ନିକଟରେ ନିର୍ବାଚନ ପ୍ରଚାର ବେଳେ ମମତା କହିଥିଲେ ପଶ୍ଚିମବଙ୍ଗରେ ସେ ଏକାକୀ ଲଢ଼ୁଥିଲେ ମଧ୍ୟ ଇଣ୍ଡିଆ ମେଣ୍ଟ ସହ ଅଛନ୍ତି । ଯଦି ଇଣ୍ଡିଆ ମେଣ୍ଟ କ୍ଷମତାସୀନ ହେବ ତେବେ ଟିଏମ୍ସି ଏହାକୁ ବାହାରୁ ସମର୍ଥନ କରିବ । ଏହା ଉପରେ ପ୍ରତିକ୍ରିୟା ପ୍ରକାଶ କରି ଅଧୀର ରଞ୍ଜନ କହିଥିଲେ ମମତାଙ୍କ ଉପରେ ଆଦୌ ବିଶ୍ୱାସ ନାହିଁ । ସେ ଇଣ୍ଡିଆ ମେଣ୍ଟ ଛାଡି ପଳାଇଛନ୍ତି । ବିଜେପି ସହିତ ମିଶି ମେଣ୍ଟ କରିପାରନ୍ତି । ଲୋକସଭାରେ ବିରୋଧୀ ଦଳ ନେତା ଥିବା ଅଧୀର ରଞ୍ଜନ ପଶ୍ଚିମବଙ୍ଗର ବରହମପୁର ଆସନରୁ ଲଢ଼ୁଛନ୍ତି । ସେ ପଶ୍ଚିମବଙ୍ଗ ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ମଧ୍ୟ ରହିଛନ୍ତି । ଖଡ୍ଗେଙ୍କ ବୟାନ ପରେ ଅଧୀର ରଞ୍ଜନ ନିଜର ପ୍ରତିକ୍ରିୟା ରଖିଛନ୍ତି । ମୁର୍ସିଦାବାଦର ବରହମପୁର ଠାରେ ଗଣମାଧ୍ୟମକୁ କହିଛନ୍ତି, କଂଗ୍ରେସକୁ ଶେଷ କରିଦେବାକୁ ଚାହୁଁଥିବା ଜଣେ ନେତାଙ୍କୁ ସେ ସ୍ୱାଗତ କରିବେ ନାହିଁ । ମମତାଙ୍କ ସହିତ ତାଙ୍କର କୌଣସି ବ୍ୟକ୍ତିଗତ ଶତ୍ରୁତା ନାହିଁ । ଏହା କେବଳ ତାଙ୍କ ବିଚାରଧାରାର ବିରୋଧୀ । ଯେଉଁ ବ୍ୟକ୍ତି କଂଗ୍ରେସର ବିନାଶ କଥା ଚିନ୍ତା କରୁଛନ୍ତି ତାଙ୍କୁ ସେ କେବେହେଲେ ଗ୍ରହଣ କରିପାରିବେ ନାହିଁ ବୋଲି ଅଧୀର କହିଥିଲେ ।
