ଗାଁରେ କାହାରି ଘରେ ନାହିଁ କବାଟ ତଥାପି ହୁଏନି ଚୋରି, ସମସ୍ତଙ୍କ ଦୁଆରକୁ ଜଗି ରହିଛନ୍ତି ମାଆ

ପଟ୍ଟାମୁଣ୍ଡାଇ: ଗାଁରେ ଶହ ଶହ ଘର। କିନ୍ତୁ କୌଣସି ନାହିଁ କବାଟ। ବଡ଼ କଥା ହେଉଛି ଏହି ଗାଁରେ କେବେ ହୁଏନି ଚୋରି। ସେଥିପାଇଁ ସେହି ଗାଁକୁ କେବେ ଯାଇ ନାହିଁ ପୋଲିସ୍। କଥାଟା ଶୁଣି ଆଶ୍ଚର୍ଯ୍ୟ ଲାଗୁଥିଲେ ବି ପୂରା ସତ।  ଗାଁ ଲୋକଙ୍କର ବିଶ୍ୱାସ ରହିଛି, ଠାକୁରାଣୀ ମା’ ଖରାଖାଇ କବାଟ ଭଳି ଜଗି ରହିଛନ୍ତି ସମସ୍ତଙ୍କ ଦୁଆରକୁ। ସେମିତି ନା ଚୋରକୁ ଡର ନା ଚୋରିକୁ। କବାଟ ଠିଆ ମେଲା।  

କେନ୍ଦ୍ରାପଡ଼ା ଜିଲ୍ଲାର ରାଜକନିକା ସଦର ମହକୁମାର ସିଆଳିଆ ଗାଁ। କଟକ-ଚାନ୍ଦବାଲି ରାସ୍ତାର ପୂର୍ବ ଦିଗକୁ ୩କିଲୋମିଟର ଗଲେ ପଡ଼େ ଏଇ କବାଟ ନଥିବା ଗାଁ। ଆଗରୁ ଏହି ଗାଁରେ ୬୦ ରୁ ୭୦ ପରିବାରଙ୍କ ଛୋଟବଡ଼ ଚାଳଛପର ଘର ଗୁଡ଼ିକ ଲମ୍ବି ରହିଥିବା ବେଳେ ଏବେ ଯୁଗ ସହ ତାଳ ଦେଇ ଚାଳ ଘର ସବୁ ଧୀରେ ଧୀରେ କୋଠାରେ ପରିଣତ ହେଲାଣି। ଏବେ ଗାଁରେ ୬୦୦ରୁ ଉର୍ଦ୍ଧ୍ବ ଲୋକ ବସବାସ କରୁଥିବା ସିଆଳିଆ ଗାଁରେ ଏବେ ବି କାହା ଘରେ ନାହିଁ କବାଟ। ଲୋକଙ୍କ ବିଶ୍ୱାସ ଗାଁର ଶେଷମୁଣ୍ଡରେ ଥିବା ପ୍ରସିଦ୍ଧ ଗ୍ରାମଦେବତୀ ମା’ ଖରାଖାଇ ଗାଁକୁ ଜଗିଛନ୍ତି। ମା’ଙ୍କର ରହିଛି ଅନେକ ମହିମା।  କି ଖରା କି ବର୍ଷା ସବୁ ସମୟରେ ମା’ ଖରାଖାଇ ସେମିତି ଖୋଲା ଆକାଶ ତଳେ ପୂଜା ପାଉଛନ୍ତି। ସେଥି ପାଇଁ ମା’ଙ୍କ ନାମ ଖରାଖାଇ ଠାକୁରାଣୀ ରହିଛି।  ଠାକୁରାଣୀଙ୍କ ଉପରେ ଭରସା ରଖି  ଗାଁରେ କାହାରି ଘରେ କବାଟ ନାହିଁ କି ଦୁଆର ବନ୍ଦ ନାହିଁ। କି ଧନୀ କି ଗରିବ ସମସ୍ତେ ଏହି ଆଦର୍ଶ ପରମ୍ପରାର ଅନୁଗାମୀ। ଏହି ଗାଁରେ କୌଣସି ଦିନ ବାଦବିବାଦ କିମ୍ବା ସାମୟିକ ଭାବେ କଳହ ଦେଖାଦେଲେ ତାହା ସେହି ଗାଁରେ ହିଁ ହୁଏ ସମାଧାନ।

ଓଡ଼ିଶାରେ ଏମିତି ଗାଁ...ଯାହାକୁ ଆମେ ବିରଳ ବୋଲି କହି ପାରିବା। କିନ୍ତୁ ବଡ଼ ଦୁଃଖର ବିଷୟ ଯେ, ଆଜି ପର୍ଯ୍ୟନ୍ତ ପର୍ଯ୍ୟଟନ ସ୍ଥାନ ଭାବରେ ଏହି ଗାଁର ନାଁ ନାହିଁ। ତେବେ ଏଭଳି ଗାଁ ମହାରାଷ୍ଟ୍ରର ସନି ସିଗ୍ନାପୁରରେ ବି ରହିଛି। ଯେଉଁଠି ଗାଁରେ କବାଟ ନାହିଁ। ମହାରାଷ୍ଟ୍ର ସରକାର ସେଠାରେ ଥିବା ଗାଁକୁ ପର୍ଯ୍ୟଟନର ମାନ୍ୟତା ଦେଇ ଏହାର ପ୍ରଚାର ପ୍ରସାର କରାଇଥିବାରୁ ପ୍ରତିଦିନ ୪୦ ହଜାରରୁ ଅଧିକ ପର୍ଯ୍ୟଟକ ସେହି ଗାଁକୁ ଦେଖିବାକୁ ଯାଇଥାନ୍ତି। ହେଲେ ଓଡ଼ିଶା ସରକାର ଏହି ସିଆଳିଆ ଗାଁକୁ ପର୍ଯ୍ୟଟନ ଗାଁ ହିସାବରେ ଗ୍ରହଣ ନ କରିବାରୁ ଦୀର୍ଘଦିନ ଧରି ରାଜକନିକା ଅଞ୍ଚଳରେ ତୀବ୍ର ଅସନ୍ତୋଷ ଦେଖାଦେଇଛି।

ତେବେ ଏହି କବାଟ ନ ଥିବା ଗାଁ ଶିଆଳିଆକୁ ପର୍ଯ୍ୟଟନର ମାନ୍ୟତା ଦେବା ସହିତ ଆନୁଷଙ୍ଗିକ ଭିତ୍ତିଭୂମିର ବ୍ୟବସ୍ଥା କଲେ କେନ୍ଦ୍ରାପଡ଼ା ଜିଲାର ପର୍ଯ୍ୟଟନର ବିକାଶ ଅଧିକ ହୋଇପାରିବ ବୋଲି ସାଧାରଣରେ କୁହାଯାଇଛି।