Auction IPL 2026 : IPL 2026 ନିଲାମରେ ବିକ୍ରି ହୋଇଥିବା 7 ସବୁଠୁ ମହଙ୍ଗା ଖେଳାଳି, KKR ଦୁଇ ଖେଳାଳିଙ୍କ ପାଇଁ ଖର୍ଚ୍ଚ କଲା 43.20 କୋଟି

ନୂଆଦିଲ୍ଲୀ: ଆବୁଧାବିରେ ସଂପନ୍ନ ହୋଇଛି IPL 2026 ମିନି ନିଲାମ। କିଛି ଖେଳାଳିଙ୍କ ଉପରେ ଟଙ୍କା ବର୍ଷା ହୋଇଥିବା ବେଳେ ଅନେକ ତାରକା ଖେଳାଳିଙ୍କ ପ୍ରତି କୌଣସି ଫ୍ରାଞ୍ଚାଇଜ ରୁଚି ଦେଖାଇ ନାହାନ୍ତି। କିନ୍ତୁ କିଛି ଏମିତି ଖେଳାଳି ଅଛନ୍ତି ଯାହାଙ୍କ ପାଇଁ ଦଳ ଗୁଡ଼ିକ କୋଟି କୋଟି ଟଙ୍କା ଖର୍ଚ୍ଚ କରିଛନ୍ତି। ଆଉ ସବୁଠାରୁ ମହଙ୍ଗା ଖେଳାଳି ହୋଇଛନ୍ତି କ୍ୟାମେରନ ଗ୍ରୀନ, ଯାହାଙ୍କୁ କୋଲକାତା ନାଇଟ୍ ରାଇଡର୍ସ 25.20 କୋଟିରେ କିଣିଛି। ସେ IPL ଇତିହାସର ସବୁଠାରୁ ମହଙ୍ଗା ବିଦେଶୀ ଖେଳାଳି ମଧ୍ୟ। KKR ମଧ୍ୟ ଶ୍ରୀଲଙ୍କାର ଦ୍ରୁତ ବୋଲର ମାଥିଶା ପାଥିରାନାଙ୍କ ପାଇଁ 18 କୋଟି ଖର୍ଚ୍ଚ କରିଛି। ଏପଟେ, ଚେନ୍ନାଇ ସୁପର କିଙ୍ଗସ୍ ଦୁଇ ଅନ୍ କ୍ୟାପ୍ ଖେଳାଳି, ପ୍ରଶାନ୍ତ ବୀର ଏବଂ କାର୍ତ୍ତିକ ଶର୍ମାଙ୍କ ପାଇଁ 28 କୋଟିରୁ ଅଧିକ ଖର୍ଚ୍ଚ କରିଛି। ଆସନ୍ତୁ ଜାଣିବା IPL 2026 ନିଲାମରେ ୭ ସବୁଠାରୁ ମହଙ୍ଗା ଖେଳାଳି କିଏ।

କ୍ୟାମେରନ ଗ୍ରୀନ – ୨୫.୨ କୋଟି

ଅଷ୍ଟ୍ରେଲୀୟ ବ୍ୟାଟର କ୍ୟାମେରନ ଗ୍ରୀନଙ୍କୁ କୋଲକାତା ନାଇଟ୍ ରାଇଡର୍ସ 25.20 କୋଟିରେ କିଣିଛି। KKR ବ୍ୟତୀତ, ଚେନ୍ନାଇ ସୁପର କିଙ୍ଗସ୍ ମଧ୍ୟ ତାଙ୍କୁ କିଣିବାକୁ ଆଗ୍ରହ ପ୍ରକାଶ କରିଥିଲା, କିନ୍ତୁ CSK ୨୫ କୋଟିର ନିଲାମ ଡକରା ପର୍ଯ୍ୟନ୍ତ ଯାଇ ଓହରି ଯାଇଥିଲା। ଗ୍ରୀନ୍ ଆଇପିଏଲ୍ ଇତିହାସରେ ସବୁଠାରୁ ମହଙ୍ଗା ବିଦେଶୀ ଖେଳାଳି ହୋଇଛନ୍ତି। ସେ ତାଙ୍କ ଦେଶର ଖେଳାଳି ମିଚେଲ୍ ଷ୍ଟାର୍କଙ୍କ ରେକର୍ଡ ଭାଙ୍ଗିଛନ୍ତି।

ମାଥିଶା ପାଥିରାନା - ୧୮ କୋଟି

କୋଲକାତା ନାଇଟ୍ ରାଇଡର୍ସ ଶ୍ରୀଲଙ୍କାର ଦ୍ରୁତ ବୋଲର ମାଥିଶା ପାଥିରାନାଙ୍କ ଉପରେ ଦ୍ୱିତୀୟ ସର୍ବାଧିକ ନିଲାମ ଲଗାଯାଇଥିଲା। ନିଲାମରେ KKR ପର୍ସରେ ସର୍ବାଧିକ ଅର୍ଥ ରାଶି ଥିଲା। ଦଳ ଏହି ଅର୍ଥକୁ ବଛା ବଛା ଖେଳାଳିଙ୍କ ପାଇଁ ଖର୍ଚ୍ଚ କରିଥିଲା। KKR ପାଥିରନାଙ୍କୁ ₹18 କୋଟିରେ କିଣିଛି। ଯାହା ତାଙ୍କୁ IPL ଇତିହାସରେ ସବୁଠାରୁ ଦାମୀ ଖେଳାଳି କରିଛି।

ପ୍ରଶାନ୍ତ ବୀର – ୧୪.୨ କୋଟି

ପ୍ରଶାନ୍ତ ବୀର ୟୁପି ଟି20 ଲିଗ୍ରେ ନୋଏଡା ସୁପର କିଙ୍ଗ୍ସ ପାଇଁ ଚମତ୍କାର ପ୍ରଦର୍ଶନ କରିଥିଲେ। ସେ ସୟଦ ମୁସ୍ତାକ ଅଲି ଟ୍ରଫିରେ ବ୍ୟାଟ୍ ଏବଂ ବଲ୍ ଉଭୟରେ ମଧ୍ୟ ଚମତ୍କାର ପ୍ରଦର୍ଶନ କରିଥିଲେ। ୭ଟି SMAT ମ୍ୟାଚ୍ରେ, ସେ 160 ଷ୍ଟ୍ରାଇକ୍ ରେଟ୍ରେ 192 ରନ୍ କରିଥିଲେ ଏବଂ 9ଟି ୱିକେଟ୍ ନେଇଥିଲେ। ରବୀନ୍ଦ୍ର ଜାଡେଜାଙ୍କ ବିଦାୟ ପରେ ଚେନ୍ନାଇ ସୁପର କିଙ୍ଗ୍ସ ସମାନ ବାମହାତୀ ଅଲରାଉଣ୍ଡର ସନ୍ଧାନରେ ଥିଲା। ଆଉ ଚେନ୍ନାଇର ଲକ୍ଷ୍ୟ ଏବେ ପୂରଣ ହୋଇଛି। ଚେନ୍ନାଇ ସୁପର କିଙ୍ଗସ୍ ଅନକ୍ୟାପଡ(ଅନ୍ତର୍ଜାତୀୟ ମ୍ୟାଚ୍ ଖେଳି ନ ଥିବା ଖେଳାଳି) ପ୍ରଶାନ୍ତଙ୍କୁ 14.20 କୋଟିରେ କିଣିଥିଲା। ଏହି ମିନି ନିଲାମରେ ତାଙ୍କର ମୂଳ ମୂଲ୍ୟ ୩୦ ଲକ୍ଷ ଟଙ୍କା ଥିଲା। ହାଇଦ୍ରାବାଦ ମଧ୍ୟ ତାଙ୍କୁ କିଣିବାକୁ ଆଗ୍ରହୀ ଥିଲା ଏବଂ ଦଳ ୧୪ କୋଟି ଟଙ୍କା ପର୍ଯ୍ୟନ୍ତ ନିଲାମ ଡାକିଥିଲା।

କାର୍ତ୍ତିକ ଶର୍ମା – ୧୪.୨ କୋଟି

ପ୍ରଶାନ୍ତ ବୀରଙ୍କ ସହିତ କାର୍ତ୍ତିକ ଶର୍ମାଙ୍କୁ ନେଇ ସନରାଇଜର୍ସ ହାଇଦ୍ରାବାଦ ଏବଂ ଚେନ୍ନାଇ ସୁପର କିଙ୍ଗସ୍ ମଧ୍ୟରେ ନିଲାମରେ କଡ଼ା ଟକ୍କର ଦେଖିବାକୁ ମିଳିଥିଲା। ଯେଉଁଥିରେ CSK ବାଜି ମାରି ନେଇଥିଲା। ହାଇଦ୍ରାବାଦ 14 କୋଟି ପର୍ଯ୍ୟନ୍ତ ନିଲାମ ଡାକିଥିଲା। ଏହା ପରେ ଚେନ୍ନାଇ ସୁପର କିଙ୍ଗସ୍ 14.20 କୋଟି ଟଙ୍କା ଦେଇ କାର୍ତ୍ତିକ ଶର୍ମାଙ୍କୁ ନିଜ ଦଳରେ ସାମିଲ କରିଛି।

ଆକିବ୍ ଦାର – ୮.୪ କୋଟି

ଭାରତୀୟ ଘରୋଇ କ୍ରିକେଟର ଉଦୀୟମାନ ଖେଳାଳି ଆକିବ ଦାର IPL ନିଲାମରେ ବିକ୍ରି ହୋଇଥିବା ମହଙ୍ଗା ଖେଳାଳିଙ୍କ ତାଲିକାରେ ସାମିଲ ହୋଇଛନ୍ତି। ଅଲରାଉଣ୍ଡର ଆକିବ୍ ଅଲି ଦାରଙ୍କ ବେସ ପ୍ରାଇସ୍ ମାତ୍ର 30 ଲକ୍ଷ ଥିଲା। ତାଙ୍କୁ କିଣିବା ପାଇଁ ସନରାଇଜର୍ସ ହାଇଦ୍ରାବାଦ ସହିତ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ପ୍ରତିଦ୍ଵନ୍ଦ୍ଵିତା ଦେଖିବାକୁ ମିଳିଥିଲା। ହାଇଦ୍ରାବାଦ 8.20 କୋଟି ନିଲାମ ଡାକିଥିବା ବେଳେ ଦିଲ୍ଲୀ ୮.୪୦ କୋଟି ଟଙ୍କାରେ ନିଜ ଦଳରେ ସାମିଲ୍ କରିବାରେ ସଫଳ ହୋଇଛି।

ରବି ବିଷ୍ନୋଇ – ୭.୨ କୋଟି

ରାଜସ୍ଥାନ ରୟାଲ୍ସ ରବି ବିଷ୍ନୋଇଙ୍କୁ 7.2 କୋଟି ଟଙ୍କାରେ କିଣିଛି। ତାଙ୍କର ବେସ ପ୍ରାଇସ୍ ୨ କୋଟି ଥିଲା। 25 ବର୍ଷୀୟ ବିଷ୍ନୋଇ ଗତ ଚାରି ସଂସ୍କରଣ ପାଇଁ ଲକ୍ଷ୍ନୌ ସୁପର ଜାଏଣ୍ଟସ୍ ପାଇଁ ଖେଳିଛନ୍ତି। ରାଜସ୍ଥାନ ରୟାଲ୍ସ ବିଷ୍ନୋଇଙ୍କ ତୃତୀୟ IPL ଟିମ୍। ଏହା ପୂର୍ବରୁ ସେ 2020 ଏବଂ 2021ରେ ପଞ୍ଜାବ କିଙ୍ଗ୍ସ ପାଇଁ ଖେଳିଥିଲେ।

ଭେଙ୍କଟେଶ୍ ଆୟର - ୭ କୋଟି ଟଙ୍କା

IPL 2026 ନିଲାମରେ, ଭେଙ୍କଟେଶ୍ ଆୟରଙ୍କୁ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋର କିଣିଛି। ତାଙ୍କ ପୂର୍ବତନ ଦଳ, KKR ମଧ୍ୟ ତାଙ୍କୁ ଦଳରେ ସାମିଲ୍ କରିବାକୁ ଚାହୁଁଥିଲା। କେକେଆର ୬.୮୦ କୋଟି ଟଙ୍କା ପର୍ଯ୍ୟନ୍ତ ଗଲା ପରେ ଓହରି ଯାଇଥିଲା। ଗତ ବର୍ଷ IPLରେ ଭେଙ୍କଟେଶ 23.75 କୋଟି ଟଙ୍କାରେ ବିକ୍ରି ହୋଇଥିଲେ। କିନ୍ତୁ ଏଥର, ଭେଙ୍କଟେଶ ଆୟରଙ୍କୁ ଆରସିବି ୭ କୋଟି ଟଙ୍କା ଦେଇ ନିଜ ଦଳରେ ସାମିଲ୍ କରିଛି।