ନୂଆଦିଲ୍ଲୀ: ୨୦୨୫ ମାର୍ଚ୍ଚ ୧୧ ଅର୍ଥାତ ଆଜିଠୁ ଠିକ୍ ଦୁଇ ବର୍ଷ ପରେ ୨୦୨୭ ମାର୍ଚ୍ଚ ୧୧ରେ ଟେଷ୍ଟ କ୍ରିକେଟ୍କୁ ପୂରିବ ୧୫୦ ବର୍ଷ। ଏହି ଉପଲକ୍ଷେ ଅଷ୍ଟ୍ରେଲିଆର ମେଲବର୍ଣ୍ଣ କ୍ରିକେଟ୍ ଗ୍ରାଉଣ୍ଡରେ ୨୦୨୭ ମାର୍ଚ୍ଚ ୧୧ରୁ ୧୫ ତାରିଖ ପର୍ଯ୍ୟନ୍ତ ପାରମ୍ପରିକ ପ୍ରତିଦ୍ଵନ୍ଦ୍ଵୀ ଅଷ୍ଟ୍ରେଲିଆ ଓ ଇଂଲଣ୍ଡ ମଧ୍ୟରେ ପିଙ୍କ ବଲ୍ ଡେ ନାଇଟ୍ ଟେଷ୍ଟ ଖେଳାଯିବ। ମଙ୍ଗଳବାର କ୍ରିକେଟ୍ ଅଷ୍ଟ୍ରେଲିଆ ଏହାର ଘୋଷଣା କରିଛି। ବୋର୍ଡ କହିଛି ଯେ, ଏହି ଐତିହାସିକ ମ୍ୟାଚ୍ ଇଂଲଣ୍ଡ ଓ ଅଷ୍ଟ୍ରେଲିଆ ମଧ୍ୟରେ ପ୍ରଥମ ଦିବାରାତ୍ର ଟେଷ୍ଟ ହେବ। ଏହା କୌଣସି ମହାମୁକାବିଲାଠୁ କମ ନୁହେଁ କାରଣ ଦୁଇ ଦେଶ କ୍ରିକେଟ୍ରେ ସର୍ବଦା ପରସ୍ପରର ତୀବ୍ର ପ୍ରତିଦ୍ଵନ୍ଦ୍ଵୀ ରହି ଆସିଛନ୍ତି।
ଏହି ଐତିହାସିକ ଷ୍ଟାଡିୟମରେ ୧୮୭୭ରେ ଅଷ୍ଟ୍ରେଲିଆ ଓ ଇଂଲଣ୍ଡ ମଧ୍ୟରେ ପ୍ରଥମ ଟେଷ୍ଟ ମ୍ୟାଚ୍ ଖେଳାଯାଇଥିଲା। ଏହା ପରେ ୧୯୭୭ରେ ସେହି ଏମସିଜିରେ ଦୁଇ ଦଳ ମଧ୍ୟରେ ଶତାବ୍ଦୀ ଟେଷ୍ଟ ମ୍ୟାଚ୍ ଆୟୋଜନ କରାଯାଇଥିଲା। ଏହି ଦୁଇ ମ୍ୟାଚ୍କୁ ଅଷ୍ଟ୍ରେଲିଆ ଜିତି ନେଇଥିଲା। କ୍ରିକେଟ୍ ଅଷ୍ଟ୍ରେଲିଆ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଟଡ ଗ୍ରୀନବର୍ଗ କହିଛନ୍ତି, ୧୫୦ତମ ବର୍ଷ ପୂର୍ତ୍ତି ଉପଲକ୍ଷେ ଆୟୋଜିତ ହେବାକୁ ଥିବା ଏହି ଟେଷ୍ଟ ମ୍ୟାଚ୍ ବେଶ ଆକର୍ଷଣୀୟ ଓ ସ୍ମରଣୀୟ ରହିବ।
Also read: ୟୁଜବେନ୍ଦ୍ର ଚହଲ ସହ ଫଟୋ ରିଷ୍ଟୋର କଲେ ଧନଶ୍ରୀ ବର୍ମା, ୟୁଜର୍ସ କହିଲେ-ଇର୍ଷା ହେଉଛି…
ସେ କହିଛନ୍ତି, ଏହି ମ୍ୟାଚ୍ ଯେମିତି ଅଧିକରୁ ଅଧିକ ଦର୍ଶକଙ୍କ ଉପସ୍ଥିତିରେ ଖେଳାଯିବ ସେ ନେଇ ସ୍ଵତନ୍ତ୍ର ବ୍ୟବସ୍ଥା କରାଯିବ। ଦର୍ଶକଙ୍କୁ ଏହି ମ୍ୟାଚ୍ରେ ଭିନ୍ନ ଆନନ୍ଦ ମିଳିବ। ଅଷ୍ଟ୍ରେଲିଆ ନଭେମ୍ବରରେ ଇଂଲଣ୍ଡ ବିପକ୍ଷ ୨୦୨୫-୨୬ ଆସେସ୍ ସିରିଜ୍ର ଆୟୋଜକ ରହିଛି। ଉଲ୍ଲେଖନୀୟ ଅଷ୍ଟ୍ରେଲିଆ ଏ ପର୍ଯ୍ୟନ୍ତ ୧୩ ଦିବାରାତ୍ର ଟେଷ୍ଟ ମ୍ୟାଚ୍ର ଆୟୋଜନ କରି ସାରିଛି, ଯେଉଁଥିରୁ ୧୨ଟି ମ୍ୟାଚ୍ ଅଷ୍ଟ୍ରେଲିଆ ସପକ୍ଷରେ ଯାଇଛି ଏଥିରୁ ୮ଟି ମ୍ୟାଚ୍ ଆଡିଲେଡ୍ରେ ଖେଳା ଯାଇଛି। ତେବେ ଅଷ୍ଟ୍ରେଲିଆ ବିପକ୍ଷ ଉକ୍ତ ମ୍ୟାଚ୍କୁ ସ୍ମରଣୀୟ କରିବା ପାଇଁ ଇଂଲଣ୍ଡ ପୂରା ଉଦ୍ୟମ କରିବ।
