ଶାହରୁଖ ଓ ଗୌରୀଙ୍କୁ ହାଇକୋର୍ଟଙ୍କ ସମନ, ମାନହାନି ମାମଲାରେ ୨ କୋଟି ଟଙ୍କାର କ୍ଷତିପୂରଣ ଦାବି

ନୂଆଦିଲ୍ଲୀ ୦୯।୧୦; ବଲିଉଡ୍ ଅଭିନେତା ଶାହରୁଖ ଖାନ ଏବଂ ତାଙ୍କ ପତ୍ନୀ ଗୌରୀ ଖାନଙ୍କୁ ଦିଲ୍ଲୀ ହାଇକୋର୍ଟଙ୍କ ସମନ । ମାନହାନି ମାମଲାରେ ୨ କୋଟି ଟଙ୍କାର କ୍ଷତିପୂରଣ ଦାବି କଲେ ଆବେଦନକାରୀ ସମୀର ୱାଙ୍ଖଡେ। ଦିଲ୍ଲୀ ହାଇକୋର୍ଟ ବୁଧବାର ଅଭିନେତା ଶାହରୁଖ ଖାନ, ତାଙ୍କ ପତ୍ନୀ ଗୌରୀ ଖାନଙ୍କ କମ୍ପାନୀ ରେଡ୍ ଚିଲିଜ୍ ଏଣ୍ଟରଟେନମେଣ୍ଟ ଏବଂ ଓଟିଟି ପ୍ଲାଟଫର୍ମ ନେଟଫ୍ଲିକ୍ସକୁ ସମନ ଜାରି କରିଛନ୍ତି। କୋର୍ଟ କିଙ୍ଗ୍ ଖାନଙ୍କୁ ଜବାବ ଦାଖଲ କରିବାକୁ ୭ ଦିନ ସମୟ ଦେଇଛନ୍ତି। ମାମଲାର ପରବର୍ତ୍ତୀ ଶୁଣାଣି ଅକ୍ଟୋବର ୩୦ରେ ହେବ।

​​​​​​​ସମୀର ୱାଙ୍ଖେଡେ ତାଙ୍କ ଆବେଦନରେ ଅଭିଯୋଗ କରିଛନ୍ତି ଯେ, ସେପ୍ଟେମ୍ବର ୧୮ ତାରିଖରେ ମୁକ୍ତିଲାଭ କରିଥିବା ୱେବ୍ ସିରିଜ୍ "ଦି ବାଡ୍ସ ଅଫ୍ ବଲିଉଡ୍" ଦ୍ୱାରା ତାଙ୍କ ପ୍ରତିଷ୍ଠା କ୍ଷୁର୍ଣ୍ଣ ହୋଇଛି । ଏହି ଶୋ’ଟି ଶାହରୁଖ ଖାନଙ୍କ ପ୍ରଯୋଜନା ସଂସ୍ଥା, ରେଡ୍ ଚିଲିଜ୍ ଏଣ୍ଟରଟେନମେଣ୍ଟ ଦ୍ୱାରା ପ୍ରଯୋଜିତ ହୋଇଥିଲା ଏବଂ ନେଟଫ୍ଲିକ୍ସରେ ଷ୍ଟ୍ରିମ୍ ହୋଇଥିଲା। ଧାରାବାହିକର ଏକ ଚରିତ୍ର ତାଙ୍କୁ ଜଣେ ଏନସିବି ଅଧିକାରୀ ଭାବରେ ଚିତ୍ରଣ କରିବାକୁ ଚେଷ୍ଟା କରୁଛି ଏବଂ ତାଙ୍କୁ ଯେଉଁ ଦୃଶ୍ୟରେ ଦର୍ଶାଯାଇଛି । ଯାହା ତାଙ୍କର ମାନ ହାନି କରିଛି । ପୂର୍ବତନ ଏନସିବି ଅଧିକାରୀ ଶୋ’ର ବିଷୟବସ୍ତୁକୁ ମାନହାନିଜନକ ଘୋଷଣା କରିବାକୁ କୋର୍ଟଙ୍କୁ ଅନୁରୋଧ କରିଛନ୍ତି ଏବଂ ୨ କୋଟି କ୍ଷତିପୂରଣ ଦାବି କରିଛନ୍ତି।

ୱାଙ୍ଖେଡେ ଦାବି କରିଛନ୍ତି ଯେ, ଶୋ ପ୍ରସାରିତ ହେବା ପରେ, ସେ ସୋସିଆଲ ମିଡିଆରେ ଅନେକ ଅପମାନଜନକ ପ୍ରତିକ୍ରିୟାର ସମ୍ମୁଖୀନ ହୋଇଥିଲେ, ଯାହା ତାଙ୍କ ସାର୍ବଜନୀନ ଭାବମୂର୍ତ୍ତିକୁ ଗୁରୁତର ଭାବରେ କ୍ଷତି ପହଞ୍ଚାଇଥିଲା। ତାଙ୍କ ମତରେ, ଶୋ’ଟି କେବଳ ମିଥ୍ୟା ନୁହେଁ ବରଂ ତାଙ୍କ ବୃତ୍ତିଗତ ସଚ୍ଚୋଟତା ଉପରେ ମଧ୍ୟ ପ୍ରଶ୍ନ ଉଠାଇଥାଏ। ତାଙ୍କ ମାନହାନି ଆବେଦନରେ ସେ ଆହୁରି କହିଛନ୍ତି ଯେ, କୌଣସି ସୃଜନଶୀଳ କିମ୍ବା ଫିଲ୍ମିକ କଳ୍ପନାର ଆବରଣ ତଳେ ଜଣେ ବ୍ୟକ୍ତିଙ୍କ ପ୍ରତିଛବିକୁ ବିକୃତ କରାଯାଇପାରିବ ନାହିଁ। ଶୋ’ରେ ତାଙ୍କ ନାମ କିମ୍ବା ପରିଚୟ ସିଧାସଳଖ ବ୍ୟବହାର କରାଯାଇ ନପାରେ, କିନ୍ତୁ ଦର୍ଶକଙ୍କ ପାଇଁ ଏହା ସ୍ପଷ୍ଟ ଯେ ଚରିତ୍ରଟି ତାଙ୍କ ଦ୍ୱାରା ଅନୁପ୍ରାଣିତ। ପ୍ରାରମ୍ଭିକ ଶୁଣାଣି ସମୟରେ, ଦିଲ୍ଲୀ ହାଇକୋର୍ଟ ସମସ୍ତ ପ୍ରତିପକ୍ଷଙ୍କୁ ନୋଟିସ୍ ଜାରି କରି ୭ ଦିନ ମଧ୍ୟରେ ଜବାବ ଦେବାକୁ ନିର୍ଦ୍ଦେଶ ଦେଇଥିଲେ। କୋର୍ଟ ଅକ୍ଟୋବର ୩୦ ତାରିଖରେ ପରବର୍ତ୍ତୀ ଶୁଣାଣି କରିବେ ।