କଂଗ୍ରେସ ବିଧାୟକଙ୍କ ଚୋରି ସାମଗ୍ରୀ ଉଦ୍ଧାର ପାଇଁ ବାଚସ୍ପତିଙ୍କୁ ଚିଠି : ସୁନା ଚେନ୍‌, ଘଣ୍ଟା, ପ୍ୟାଣ୍ଟ, ସାର୍ଟ ଫେରାଇବାକୁ ଉଲ୍ଲେଖ

ଭୁବନେଶ୍ବର ୧୮।୯: ବିଧାନସଭାରେ ଚୋରି ସାମଗ୍ରୀ ଫେରାଇବାକୁ ବାଚସ୍ପତିଙ୍କୁ କଂଗ୍ରେସର ଚିଠି । ବାଚସ୍ପତିଙ୍କୁ ଚିଠି ଲେଖିଲେ କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ । ସୁନା ଚେନ୍‌, ଘଣ୍ଟା, ପ୍ୟାଣ୍ଟ, ସାର୍ଟ ଆଦି ଚୋରି ସାମଗ୍ରୀ ଫେରାଇବାକୁ ଚିଠିରେ ଉଲ୍ଲେଖ । ଗତ ମାର୍ଚ୍ଚ ୨୬ ତାରିଖ ରାତି ୨ଟା ୩୦ରେ ଗୃହ ଭିତରେ ଏଭଳି ଘଟଣା ଘଟିଥିବା ଦର୍ଶାଇଲେ ।

ସୂଚନାଯୋଗ୍ୟ ଯେ, ଗତ ବିଧାନସଭା ଅଧିବେଶନ ଚାଲିଥିବା ବେଳେ ନାରୀ ନିର୍ଯାତନା ବୃଦ୍ଧି ସଂପର୍କରେ କଂଗ୍ରେସ ବିଧାୟକ ମାନେ ଏକ ବିଧାନସଭା ତଦନ୍ତ କମିଟି ଗଠନ ଦାବି କରିବାକୁ ନେଇ ବିଧାନସଭାରୁ ନିଲମ୍ବିତ ହୋଇଥିଲେ । ଅଗଣତାନ୍ତ୍ରିକ ଊପାୟରେ  ନିଲମ୍ବିତ ହୋଇଥିବା ବିଧାୟକ ମାନେ ତା ୨୬.୯.୨୫ ରିଖରେ ରାତି ୨ଟା ୩୦ ମିନିଟ୍ ସମୟରେ ପବିତ୍ର ବିଧାନସଭା ଗୃହ ମଧ୍ୟକୁ ପ୍ରବେଶ କରିବା ବେଳେ ବିଧାନସଭାର ସୁରକ୍ଷାକର୍ମୀଙ୍କ ଆକ୍ରୋଶର ଶିକାର ହୋଇଥିଲେ । ସେହି ସମୟରେ କିଛି ଅସାମାଜିକ ତତ୍ତ୍ବ ବିଧାୟକ ମାନଙ୍କ ଘଣ୍ଟା, ସୁନା ଚେନ୍ ଓ ବ୍ୟାଗ୍‌ରେ ଥିବା କିଛି ଗୁରୁତ୍ବପୂର୍ଣ୍ଣ କାଗଜପତ୍ର ସହ ପ୍ୟାଣ୍ଟ-ସାର୍ଟ ମଧ୍ୟ ଚୋରି କରିନେଇଥିବା ଅଭିଯୋଗ ବାଚସ୍ପତିଙ୍କ ନିକଟରେ କରାଯାଇଥିଲା ।

ଗୁରୁବାର ମୌସୁମୀ ବିଧାନସଭା ଆରମ୍ଭ ହୋଇଛି । ଗତ ବିଧାନସଭା ଅଧିବେଶନରେ ଚୋରି ହୋଇଥିବା ଜିନିଷ ପାଇବା ପାଇଁ କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡାମ ପୁନଶ୍ଚ ବାଚସ୍ପତିଙ୍କୁ ପତ୍ର ଲେଖିଛନ୍ତି । ଚିଠିରେ ସେ ଉଲ୍ଲେଖ କରିଛନ୍ତି ଯେ ଚୋରି ହୋଇଥିବା ଜିନିଷ ଏ ପର୍ଯ୍ୟନ୍ତ ମିଳିପାରି ନାହିଁ କିମ୍ବା ସେ ସଂପର୍କରେ ବିଧାନସଭା କାର୍ଯ୍ୟାଳୟ ପକ୍ଷରୁ କୌଣସି ସୂଚନା ପ୍ରଦାନ କରାଯାଇ ନାହିଁ । ତେଣୁ ଚୋରି ହୋଇଥିବା ଜିନିଷପତ୍ରର ତୁରନ୍ତ ଊଦ୍ଧାର ପାଇଁ ଉଚିତ ପଦକ୍ଷେପ ନେବାକୁ ସେ ବାଚସ୍ପତିଙ୍କ ଦୃଷ୍ଟି ଆକର୍ଷଣ କରିଛନ୍ତି ।