ଚୀନରୁ ୧୦୦୦ ଟେକ୍ ପଦବୀ ଭାରତକୁ ସ୍ଥାନାନ୍ତର କଲା ସିଟିଗ୍ରୁପ୍, H1B ଫି ବୃଦ୍ଧି ଓ ଟ୍ରମ୍ପଙ୍କ ବିଦେଶ ନୀତି ଯୋଗୁ ଆମେରିକୀୟ ବ୍ୟାଙ୍କ୍‌ର ନିଷ୍ପତ୍ତି

ନୂଆଦିଲ୍ଲୀ: ଆମେରିକାର ବଡ଼ ବ୍ୟାଙ୍କ ସିଟିଗ୍ରୁପ୍ ଚୀନରେ ଥିବା ଏହାର ଟେକ୍ନୋଲୋଜି କେନ୍ଦ୍ରରୁ ୩୫୦୦ କର୍ମଚାରୀଙ୍କୁ ଛଟେଇ କରିବାକୁ ନିଷ୍ପତ୍ତି ନେଇଛି। ସବୁଠୁ ବଡ଼ କଥା ହେଉଛି ଏଥିରୁ ପ୍ରାୟ ୧୦୦୦ଟି ଟେକ୍ ପଦବୀକୁ, ବ୍ୟାଙ୍କ ଭାରତର ଗ୍ଲୋବାଲ୍ କ୍ୟାପାବିଲିଟି ସେଣ୍ଟର୍ (GCC) ଗୁଡ଼ିକୁ ସ୍ଥାନାନ୍ତରିତ କରିଛି। ଏହା ବ୍ୟାଙ୍କର ଗ୍ଲୋବାଲ୍ ରିଷ୍ଟ୍ରକ୍ଚରିଂ (ପୁନରୁଦ୍ଧାର) ଯୋଜନାର ଅଂଶ ବୋଲି ଜଣାପଡ଼ିଛି। ଯାହା ସଂସ୍ଥାର ବିଭିନ୍ନ ଟେକ୍ ଅପରେସନ ଗୁଡ଼ିକୁ ଆହୁରି ସରଳ କରି ରିସ୍କ୍ ଏବଂ ଡାଟା ମ୍ୟାନେଜମେଣ୍ଟକୁ ଆହୁରି ଉନ୍ନତ କରିବାକୁ ଲକ୍ଷ୍ୟ ରଖିଛି।

ଏହି ସ୍ଥାନାନ୍ତରଣ ଟ୍ରମ୍ପ୍ ପ୍ରଶାସନର ନୂଆ H1B ଭିସା ନିୟମ ସହିତ ଜଡ଼ିତ । ନିକଟରେ ଟ୍ରମ୍ପ ନୂଆ H1B ଭିସା ଆବେଦନ ପାଇଁ ୧ ଲକ୍ଷ ଡଲାର ଫି ଲଗାଇଛନ୍ତି। ଫଳରେ ୱାଲ୍ ଷ୍ଟ୍ରିଟ୍ ଶସ୍ତା ପଡୁଥିବାରୁ ବ୍ୟାଙ୍କଗୁଡ଼ିକୁ ଭାରତର GCC ଉପରେ ଅଧିକ ନିର୍ଭରଶୀଳ କରିବାକୁ ବାଧ୍ୟ କରିଛି। ଯାହାଫଳରେ ଆଗକୁ ସ୍ଥାନୀୟ ନିଯୁକ୍ତି ଆହୁରି ଅଧିକ ବଢ଼ିବାର ସମ୍ଭାବନା ରହିଛି। ଅନ୍ତର୍ଜାତୀୟ ଗଣମାଧ୍ୟମ ବ୍ଲୁମବର୍ଗର ରିପୋର୍ଟ ଅନୁସାରେ,  H1B ଫି ବୃଦ୍ଧି ଆମେରିକୀୟ ବ୍ୟାଙ୍କଗୁଡ଼ିକୁ ଭାରତର GCC ଉପରେ ଅଧିକ ନିର୍ଭର କରିବାକୁ ଏବଂ ନୂଆ ଚାକିରିଗୁଡ଼ିକ ପାଇଁ ଅଧିକ ସ୍ଥାନୀୟଙ୍କୁ ନିଯୁକ୍ତ କରିବାକୁ ବାଧ୍ୟ କରିବ।

ସିଟିଗ୍ରୁପ୍ ପୁର୍ବରୁ ୨୦୨୫ ମସିହାରେ ଚୀନରେ ଥିବା ନିଜର ୩୫୦୦ ଚାକିରିରୁ ଛଟେଇ କରିବା ସହ ସେହି ଚାକିରି ଗୁଡ଼ିକୁ ଅନ୍ୟ ଟେକ୍ କେନ୍ଦ୍ରକୁ ସ୍ଥାନାନ୍ତରିତ କରିବା ନେଇ ଘୋଷଣା କରିଥିଲା। ତେବେ ବର୍ତ୍ତମାନ ବିଭିନ୍ନ ଘଟଣାକୁ ଦୃଷ୍ଟିରେ ରଖି ଭାରତ ସିଟି ବ୍ୟାଙ୍କର ପ୍ରମୁଖ ପସନ୍ଦ ଭାବେ ଉଭା ହୋଇଛି। ଏହି ରିଷ୍ଟ୍ରକଚରିଂରେ ବ୍ୟାଙ୍କ ଆମେରିକା, ଇଣ୍ଡୋନେସିଆ, ଫିଲିପାଇନ୍ସ୍ ଏବଂ ପୋଲାଣ୍ଡରେ ମଧ୍ୟ ନିଜ ଅପରେସନ ଗୁଡ଼ିକୁ କମାଇଛି ବୋଲି ଆନ୍ତର୍ଜାତୀୟ ଖବର ସରବରାହ ସଂସ୍ଥା ରଏଟର୍ସ ରିପୋର୍ଟ ପ୍ରକାଶ କରିଛି।

ସିଟିଗ୍ରୁପ୍ ବର୍ତ୍ତମାନ ସୁଦ୍ଧା ଭାରତରେ ପ୍ରାୟ ୩୩,୦୦୦ ଜଣଙ୍କୁ ନିଯୁକ୍ତି ଦେଇଛି। ଯେଉଁଥିରେ ମୁଖ୍ୟତଃ ବେଙ୍ଗଲୁରୁ, ଚେନ୍ନାଇ, ପୁନେ ଏବଂ ମୁମ୍ବାଇରେ ଅବସ୍ଥିତ GCC ଗୁଡ଼ିକ କାର୍ଯ୍ୟ କରୁଛନ୍ତି। ଇଣ୍ଡିଆର GCC ସଂସ୍ଥା ଗୁଡିକ ଦ୍ରୁତଗତି ବିକଶିତ ହେଉଛନ୍ତି। ବର୍ତ୍ତମାନ ଦେଶରେ ୧୭୬୦ଟି GCC ଅଛି, ଯାହା ୨୦୨୬ ମସିହା ସୁଦ୍ଧା ୨୦୦୦ରୁ ଅଧିକ ସଂଖ୍ୟାକୁ ବୃଦ୍ଧି ପାଇବ ବୋଲି ଅନୁମାନ କରାଯାଉଛି। ଏହି ଇଣ୍ଡଷ୍ଟ୍ରୀର ବର୍ତ୍ତମାନର ବଜାର ମୂଲ୍ୟ ୬୪ ବିଲିୟନ୍ ଡଲାର ହୋଇଥିବା ବେଳେ ୨୦୩୦ ସୁଦ୍ଧା ଏହା ୧୧୦ ବିଲିୟନ୍ ଡଲାରକୁ ପହଞ୍ଚିଯାଇପାରେ ବୋଲି ଅନୁମାନ କରାଯାଉଛି।

ଏହି ପରିବର୍ତ୍ତନ ଇଣ୍ଡିଆକୁ ଗ୍ଲୋବାଲ୍ ଟେକ୍ ଇକୋସିଷ୍ଟେମ୍‌ରେ ଅଧିକ ମଜବୁତ କରୁଛି, ଯେଉଁଠାରେ ପ୍ରୋଡକ୍ଟ୍ R&D, ଆନାଲିଟିକ୍ସ୍ ଏବଂ ଡିଜାଇନ୍ ଭଳି ଆଡଭାନ୍ସ୍ ଟେକ୍ନୋଲୋଜିରେ GCCଗୁଡ଼ିକ ନେତୃତ୍ୱ ଦେଉଛନ୍ତି। H1B ଫି ବୃଦ୍ଧି ଯୋଗୁଁ ମାର୍କିନ୍ ଟେକ୍ ଟାଲେଣ୍ଟ୍ ଉପରେ ନିର୍ଭରଶୀଳତା ହ୍ରାସ ପାଇବା ସହିତ, ଇଣ୍ଡିଆରେ ସ୍ଥାନୀୟ ନିଯୁକ୍ତି ବଢ଼ିପାରେ।