ଭାରତରେ ପେଟ୍ରୋଲ ପମ୍ପ ସଂଖ୍ୟାରେ ରେକର୍ଡ ସଂଖ୍ୟକ ବୃଦ୍ଧି, ଆମେରିକା- ଚୀନ ପରେ ତୃତୀୟ ସବୁଠୁ ବଡ଼ ଫୁଏଲ ନେଟଓ୍ବର୍କ

ନୂଆଦିଲ୍ଲୀ: ଦେଶରେ ୧ ଲକ୍ଷରୁ ଅଧିକ ପେଟ୍ରୋଲ ପମ୍ପ ସହ ଭାରତ ଦୁନିଆର ତୃତୀୟ ସବୁଠୁ ବଡ଼ ଫୁଏଲ ରିଟେଲ ମାର୍କେଟ ହୋଇଛି। ପେଟ୍ରୋଲିୟମ ପ୍ଲାନିଂ ଆଣ୍ଡ୍ ଆନାଲିସିସ୍ ସେଲ୍ (PPAC)ର ରିପୋର୍ଟ ଅନୁସାରେ, ନଭେମ୍ବର ଶେଷ ସୁଦ୍ଧା ଦେଶରେ ପେଟ୍ରୋଲ ପମ୍ପ ସଂଖ୍ୟା ୧, ୦୦, ୨୬୬ରେ ପହଞ୍ଚିଛି।

ସୂଚନା ଅନୁସାରେ, ଜାତୀୟ ରାଜପଥ ଏବଂ ଗ୍ରାମୀଣ ଅଞ୍ଚଳରେ ବଢ଼ୁଥିବା ଚାହିଦାକୁ ପୂରଣ କରିବା ପାଇଁ ସରକାର ଏବଂ ଘରୋଇ କମ୍ପାନିମାନେ ଗତ ଏକ ଦଶନ୍ଧିରେ ସେମାନଙ୍କର ନେଟଓ୍ବର୍କକୁ ପ୍ରାୟ ଦୁଇଗୁଣା କରିଛନ୍ତି। ବର୍ତ୍ତମାନ ସବୁଠୁ ଅଧିକ ପେଟ୍ରୋଲ ପମ୍ପ ଥିବା ଦେଶଙ୍କ ମଧ୍ୟରେ ୧ ନମ୍ବରରେ ରହିଛି ଆମେରିକା। ତା’ ପଛକୁ ରହିଛି ଚୀନ।

ଆମେରିକାରେ ସବୁଠୁ ଅଧିକ ପେଟ୍ରୋଲ ପମ୍ପ

ସୂଚନାଥାଉକି, ଦୁନିଆରେ ସବୁଠୁ ବଡ଼ ପେଟ୍ରୋଲ ପମ୍ପ ନେଟଓ୍ବର୍କ ଆମେରିକାରେ ରହିଛି। ଅବଶ୍ୟ ଆମେରିକାରେ ବର୍ତ୍ତମାନ କେତେ ପେଟ୍ରୋଲ ପମ୍ପ ରହିଛି ? ତାହାର ନିର୍ଦ୍ଦିଷ୍ଟ ତଥ୍ୟ ମିଳିପାରିନାହିଁ। କିନ୍ତୁ ୨୦୨୪ର ଏକ ରିପୋର୍ଟ ଅନୁସାରେ ଦେଶରେ ରିଟେଲ ପେଟ୍ରୋଲ ପମ୍ପର ସଂଖ୍ୟା ୧,୯୬, ୬୪୩ ରହିଥିଲା। ସେବେଠାରୁ କିଛି ପମ୍ପ ବନ୍ଦ ମଧ୍ୟ ହୋଇଥିବ।

ସେହିଭଳି ଗତ ବର୍ଷର ଏକ ରିପୋର୍ଟ ଅନୁସାରେ ଚୀନ୍ରେ ପେଟ୍ରୋଲ ପମ୍ପ ସଂଖ୍ୟା ୧, ୧୫, ୨୨୮ ଥିଲା। ୩୦,୦୦୦ରୁ ଅଧିକ ପମ୍ପ ସହ ଚୀନ୍ କମ୍ପାନି ଚାଇନା ପେଟ୍ରୋକେମିକାଲ୍ସ କର୍ପୋରେସନ (ସିନୋପେକ) ସହ ସେଠିକାର ସବୁଠୁ ବଡ଼ ରିଟେଲର । ହେଲେ ଭାରତର IOCର ନେଟଓ୍ବର୍କ (୪୧, ୬୬୪) ସିନୋପେକ ଠାରୁ ମଧ୍ୟ ଅଧିକ ବଡ଼।

୧୦ ବର୍ଷରେ ପେଟ୍ରୋଲ ପମ୍ପର ସଂଖ୍ୟା ୨ ଗୁଣ

ଦେଶରେ ପେଟ୍ରୋଲ ପମ୍ପ୍ର ନେଟଓ୍ବର୍କ ଖୁବ୍ ଦ୍ରୁତ ଭାବରେ ବଢ଼ୁଛି। ୨୦୧୫ରେ ଭାରତରେ ମୋଟ ୫୦, ୪୫୧ ପେଟ୍ରୋଲ ପମ୍ପ ଥିଲା, ଯାହା ଏବେ ୨୦୨୫ ଶେଷ ସୁଦ୍ଧା ବଢ଼ି ୧ ଲକ୍ଷରୁ ଅଧିକ ହୋଇଛି। ଏହି ବିସ୍ତାରରେ ସରକାରୀ କମ୍ପାନିଙ୍କ ସହ ଘରୋଇ କମ୍ପାନି ମଧ୍ୟ ନିଜର ଯୋଗଦାନ ବଢ଼ାଇଛନ୍ତି। ଘରୋଇ କମ୍ପାନିରଙ୍କ ମାର୍କେଟ ସେୟାର ୨୦୧୫ରେ କେବଳ ୫.୯% ଥିଲା। ଯାହା ଏବେ ବଢ଼ି ୯.୩% ହୋଇଛି।

ଭାରତରେ ସରକାରୀ କମ୍ପାନିଙ୍କ ରହିଛି ୯୦% ପମ୍ପ

ଭାରତୀୟ ଫୁଏଲ ମାର୍କେଟ ଉପରେ ସାର୍ବଜନୀନ କ୍ଷେତ୍ର (PSU)ର କମ୍ପାନିଙ୍କ ଏକଛତ୍ରବାଦ ରହିଛି। ଇଣ୍ଡିଆନ ଅଏଲ (IOC), ଭାରତ ପେଟ୍ରୋଲିୟମ (BPCL) ଏବଂ ହିନ୍ଦୁସ୍ତାନ ପେଟ୍ରୋଲିୟମ (HPCL) ଭଳି ସରକାରୀ କମ୍ପାନିଙ୍କ ନିକଟରେ ୯୦%ରୁ ଅଧିକ ପେଟ୍ରୋଲ ପମ୍ପ ରହଛି। ତଥ୍ୟ ଅନୁସାରେ, ଇଣ୍ଡିଆନ ଅଏଲ ୪୧, ୬୬୪ ପେଟ୍ରୋଲ ପମ୍ପ ସହ ଦେଶର ସବୁଠୁ ବଡ଼ କମ୍ପାନି। ଏହା ପରେ BPCLର ୨୪, ୬୦୫ ଏବଂ HPCLର ୨୪,୪୧୮ ଷ୍ଟେସନ ଦେଶରେ ରହିଛି।

ଘରୋଇ କମ୍ପାନିରେ ନାୟରା ଏନର୍ଜୀ ସବୁଠୁ ଆଗରେ

ପ୍ରାଇଭେଟ ସେକ୍ଟରେ ରୁଷର ରୋଜନେଫ୍ଟ ସମର୍ଥିତ ‘ନାୟରା ଏନର୍ଜି ଲିମିଟେଡ’ ସବୁଠୁ ବଡ଼ ଖେଳାଳି ହୋଇ ଉଭା ହୋଇଛି। ନାୟରା ପାଖରେ ବର୍ତ୍ତମାନ ୬,୯୨୧ ପେଟ୍ରୋଲ ପମ୍ପ ରହିଛି। ସେହିଭଳି ରିଲାଲନ୍ସ ଇଣ୍ଡଷ୍ଟ୍ରିଜ ଏବଂ ବିପି (bp) ଜଏଣ୍ଟ ଭେଞ୍ଚର ପାଖରେ ୨,୧୧୪ ପମ୍ପର ନେଟଓ୍ବର୍କ ରହିଛି। ସେହିଭଳି ଶେଲ (Shell)ର ମଧ୍ୟ ଭାରତରେ ୩୪୬ ପେଟ୍ରୋଲ ପମ୍ପ ରହିଛି।