ଲରେନ୍ସ ବିଷ୍ନୋଇ ଗ୍ୟାଙ୍ଗର ପରିଚୟ ଦେଇ ଗାୟକଙ୍କୁ ହତ୍ୟା ଧମକ, ‘୧୫ଲକ୍ଷ ଟଙ୍କା ନଦେଲେ ମୃତ୍ୟୁ ନିଶ୍ଚିତ

ନୂଆଦିଲ୍ଲୀ ୨୭।୧୦; ହିମାଚଳ ପ୍ରଦେଶର ଲୋକପ୍ରିୟଗାୟକ ତଥା "ମେରା ଭୋଲା ହେ ଭଣ୍ଡାରି" ଫେମ୍ ହଂସରାଜ ରଘୁବଂଶୀ । ବର୍ତ୍ତମାନ ତାଙ୍କ ପରିବାରକୁ ହତ୍ୟା ଧମକ ମିଳିଛି। ଏଥିସହିତ ଦାଦାବଟି ବାବଦକୁ ୧୫ ଲକ୍ଷ ଟଙ୍କା ମଧ୍ୟ ଦାବି କରାଯାଇଛି। ଗାୟକ ରଘୁବଂଶୀଙ୍କୁ ଧମକ ଦେଇଥିବା ବ୍ୟକ୍ତି ନିଜକୁ ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇ ଗ୍ୟାଙ୍ଗ ସହିତ ଜଡିତ ଥିବା ନେଇ କହିଛି । ଏନେଇ ହଂସରାଜ ରଘୁବଂଶୀଙ୍କ ବ୍ୟକ୍ତିଗତ ସୁରକ୍ଷାକର୍ମୀ ବିଜୟ କଟାରିଆ ଅଭିଯୋଗ କରି କହିଛନ୍ତି। ଏହି ଅଭିଯୋଗ ଆଧାରରେ ଜିରକପୁର ପୋଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।

ପ୍ରାରମ୍ଭିକ ତଦନ୍ତରେ ପୋଲିସ ହଂସରାଜ ରଘୁବଂଶୀଙ୍କୁ ହତ୍ୟା ଧମକ ଦେଇଥିବା ଅଭିଯୁକ୍ତକୁ ମଧ୍ୟପ୍ରଦେଶର ଉଜ୍ଜୈନର ବାସିନ୍ଦା ରାହୁଲ କୁମାର ନାଗଡେ ଭାବରେ ଚିହ୍ନଟ କରିଛି। ଅଭିଯୋଗ ଅନୁଯାୟୀ, ରାହୁଲ କୁମାର ନାଗଡେ ପ୍ରଥମେ ୨୦୨୧-୨୨ ମସିହାରେ ଉଜ୍ଜୈନର ଶ୍ରୀ ମହାକାଳ ମନ୍ଦିରରେ ହଂସରାଜ ରଘୁବଂଶୀଙ୍କୁ ଭେଟିଥିଲା।

ଅଭିଯୁକ୍ତ ରାହୁଲ ଗାୟକଙ୍କ ପତ୍ନୀ, ମା ଏବଂ ପରିବାରର ଅନ୍ୟ ସଦସ୍ୟଙ୍କୁ ହତ୍ୟା କରିବାକୁ ଫୋନରେ କଲ କରି ହ୍ୱାଟ୍ସଆପରେ ବାର୍ତ୍ତା ପଠାଇ ଧମକ ଦେଇଛି। ସେ ନିଜକୁ ଲରେନ୍ସ ବିଷ୍ନୋଇର ଜଣେ ସହଯୋଗୀ ଭାବରେ ପରିଚୟ ଦେବା ସହିତ ଗୋଲ୍ଡୀ ବରାର ଗ୍ୟାଙ୍ଗ ସହିତ ସମ୍ପର୍କ ଥିବା ନେଇ ଦାବି କରିଛି। ଅଭିଯୋଗ ଅନୁଯାୟୀ, ରାହୁଲ ୧୫ଲକ୍ଷ ଟଙ୍କା ଦାବି କରିଛି। ଏହି ଟଙ୍କା ନ ଦେଲେ ସେ ହଂସରାଜ ରଘୁବଂଶୀଙ୍କ ସମଗ୍ର ପରିବାରକୁ ହତ୍ୟା କରିବ ବୋଲି ‌ ଧମକ ଦେଇଛି।