ବିଜୟ ଚଉକା ବେଳେ ଖସିଗଲା ଷ୍ଟମ୍ପ୍ ବେଲ୍, ଆରସିବିର ଜିତିବାକୁ ନେଇ ଉଠିଲା ଦ୍ୱନ୍ଦ୍ୱ...

ନୂଆଦିଲ୍ଲୀ,୦୬|୦୨ : ଇତିହାସ ରଚିଛି ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ । ମହିଳା ପ୍ରିମିୟର ଲିଗରେ ଟିମ୍ ଲଗାତାର ଦ୍ୱିତୀୟ ଥର ହୋଇଛି ଚାମ୍ପିଅନ୍ । ଦିଲ୍ଲୀ କ୍ୟାପିଟାଲ୍ସକୁ ହରାଇଛି ଟିମ୍ । ଭଦୋଦରା କ୍ରିକେଟ୍ ଗ୍ରାଉଣ୍ଡରେ ୬ ଓ୍ୱିକେଟରେ ମ୍ୟାଚ୍ ଜିତି ନେଇଛି ସ୍ମୃତି ମନ୍ଧନାଙ୍କ ଟିମ୍ । ତେବେ ମୁକାବିଲାର ଶେଷରେ ଦେଖିବାକୁ ମିଳିଥିଲା ହାଇଭୋଲଟେଜ୍ ଡ୍ରାମା ।

ଜିତିବା ପାଇଁ ଦରକାର ଥିଲା ୮ ରନ୍ । ହାତରେ ୪ ବଲ୍ । ବ୍ୟାଟିଂ କରୁଥିଲେ ଆରସିବିର ବ୍ୟାଟର ରାଧା ଯାଦବ । ପ୍ରଥମ ବଲରେ ଚଉକା ଲଗାଇଥିଲେ ରାଧା । ଏହାପରେ ତିନି ବଲରୁ ୪ ରନ୍ । ତୃତୀୟ ବଲରେ ବଡ ସଟ୍ ଖେଳିଥିଲେ ସେ । କିନ୍ତୁ ଏହି ସମୟରେ କିପିଂ କରୁଥିବା ଦିଲ୍ଲୀ କ୍ୟାପିଟାଲ୍ସର କିପର ଲିଜେରି ଲି ଷ୍ଟମ୍ପରୁ ବେଲକୁ ଖସାଇ ଦେଇଥିଲେ । ଅର୍ଥାତ ଚଉକା ଲଗାଇବା ବେଳେ ଷ୍ଟମ୍ପରୁ ବେଲ୍ ଖସି ଯାଇଥିଲା ।

ତେବେ ଏହା ଚଉକା ହେବ ନା ନାହିଁ ତାକୁ ନେଇ ଉଠିଥିଲା ଦ୍ୱନ୍ଦ୍ୱ । ହେଲେ ଅମ୍ପାୟାର ଏହି ବଲକୁ ବୈଧ ବୋଲି କହିଥିଲେ । ତେବେ ବ୍ୟାଟର ହିଟ୍ ଓ୍ୱିକେଟ୍ ହୋଇଛନ୍ତି ନା ନାହିଁ ତାହା ମଧ୍ୟ ପରଖିଥିଲେ ଅମ୍ପାୟାର । ତେବେ ରାଧା ହିଟ୍ ଓ୍ୱିକେଟ୍ ହୋଇନଥିଲେ ।

ଶେଷ ଓଭରରେ ୧୦ ରନ୍

ଶେଷ ଓଭରରେ ବିଜୟ ପାଇଁ ଆରସିବିକୁ ୧୦ ରନ୍ ଦରକାର ଥିଲା । କ୍ରିଜରେ ଥିଲେ ରାଧା ଯାଦବ ଏବଂ ନାଦିନ୍ କ୍ଲର୍କ୍ । ଦିଲ୍ଲୀ ପାଇଁ ବୋଲିଂ କରୁଥିଲେ ଶ୍ରୀ ଚରାନି । ପ୍ରଥମ ଦୁଇଟି ବଲରେ ଶ୍ରୀ ଦୁଇଟି ସିଙ୍ଗଲ୍ ଦେଇଥିଲେ । ଏବେ ୪ ବଲରେ ୮ ରନ୍ ଦରକାର ଥିଲା । ଯାହା ଦିଲ୍ଲୀକୁ ସାମାନ୍ୟ ବିଜୟ ଆଶା ପ୍ରଦାନ କରିଥିଲା । ତେବେ ତୃତୀୟ ବଲରେ ରାଧା ଏକ ଦମଦାର ଚଉକା ଲଗାଇଥିଲେ । ଯାହା ଦିଲ୍ଲୀର ସ୍ୱପ୍ନକୁ ଧୂଳିସାତ କରିଦେଇଥିଲା । ଏହାପରେ ଅର୍ଥାତ ତୃତୀୟ ବଲରେ ମଧ୍ୟ ସେ ଏକ ଚଉକା ଲଗାଇଥିଲେ । ଲଗାତାର ଦୁଇଟି ଚଉକା ଲଗାଇବାରୁ ଆରସିବି ବିଜୟ ହୋଇ ଇତିହାସ ରଚିଥିଲା ।