ନୂଆଦିଲ୍ଲୀ: ବେଙ୍ଗାଲୁରୁର ଅତୁଲ ସୁଭାଷଙ୍କ ପରି ସ୍ତ୍ରୀ ନିର୍ଯାତନାର ଅଭିଯୋଗ କରି ଜୀବନ ହାରିଛନ୍ତି ନିଶାନ୍ତ ତ୍ରିପାଠୀ । ମୁମ୍ୱାଇର ବିଲେ ପାରଲେ ସ୍ଥିତ ସାହାରା ହୋଟେଲରେ ନିଶାନ୍ତ ଆତ୍ମହତ୍ୟା କରିଛନ୍ତି । ଏପରି ଚରମ ପଦକ୍ଷେପ ନେବା ପୂର୍ବରୁ ନିଶାନ୍ତ ହୋଟେଲ୍ ରୁମ୍ ବାହାର ‘Do Not Disturb’ ଲେଖିଥିଲେ, ଫଳରେ ରୁମକୁ ଅନ୍ୟ କେହି ଆସିପାରିବେ ନାହିଁ । ରୁମ୍ ବୁକିଂ ସମୟ ଶେଷ ହେବା ପରେ ହୋଟେଲ୍ ଷ୍ଟାଫ୍ କବାଟ ବାଡାଇଥିଲେ, କିନ୍ତୁ କୌଣସି ଜବାବ ମିଳିନଥିଲା । ମାଷ୍ଟର କି’ରେ କବାଟ ଖୋଲିବା ପରେ ନିଶାନ୍ତଙ୍କ ମୃତ ଦେହ ମିଳିଥିଲା । ନିଶାନ୍ତ ମୃତ୍ୟୁ ପୂର୍ବରୁ ଏକ ସୁଇସାଇଡ୍ ନୋଟ୍ ଲେଖିଥିଲେ, ଯେଉଁଥିରେ ପତ୍ନୀ ଓ ତାଙ୍କ ଶାଶୁଙ୍କୁ ନିଜ ମୃତ୍ୟୁ ପାଇଁ ଦାୟୀ କରିଛନ୍ତି । ନିଶାନ୍ତ ତ୍ରିପାଠୀ ପେଶାରେ ଜଣେ ଅଭିନେତା ଥିଲେ ।

ଏବେ ନିଶାନ୍ତଙ୍କ ମାଆ ନୀଲମ ଚତୁର୍ବେଦୀ ଏକ ଇମୋସନାଲ୍ ପୋଷ୍ଟ ଲେଖିଛନ୍ତି, ଯାହା ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି । ସେ ଫେସ୍‌ବୁକ୍‌ରେ ଏକ ପୋଷ୍ଟରେ କହିଛନ୍ତି, 'ମୁଁ ସାମାଜିକ କର୍ମୀ ଭାବେ ୪୬ ହଜାର ମହିଳାଙ୍କୁ ସାହାଯ୍ୟ କରିଛି, ଏଥିରୁ ୩୭ ହଜାର ମହିଳାଙ୍କୁ ନ୍ୟାୟ ଦେବାରେ ସଫଳ ହୋଇଛନ୍ତି । ମୁଁ ହଜାର ହଜାର ମହିଳାଙ୍କୁ ଆତ୍ମନିର୍ଭର ହେବା ପାଇଁ ଟ୍ରେନିଂ ଦେଇଛି । କିନ୍ତୁ ଆଜି ମୁଁ ନିଜେ ଭାଙ୍ଗି ପଡ଼ିଛି ଏବଂ ଏକ ଜୀଅନ୍ତା ଶବ ପାଲଟି ଯାଇଛି ।' ନୀଲମ ଲେଖିଛନ୍ତି ଯେ ମୁଁ ଭାବିଥିଲି ଯେ ମୋ ପୁଅ ଅନ୍ତିମ ସଂସ୍କାର କରିବ, କିନ୍ତୁ କଣ ଘଟିଗଲା । ମୋ ଝିଅ ପ୍ରାଚୀକୁ ଅନ୍ତିମ ସଂସ୍କାର କରିବାକୁ ପଡ଼ିଲା । ସେ ଲେଖିଛନ୍ତି ମୁଁ ଜୀବନରେ ଅନେକ ସଂଘର୍ଷ କରିଛି, କିନ୍ତୁ ଆଜି ଭାଙ୍ଗି ପଡ଼ିଛି । 

ନୀଲମ ଚତୁର୍ବେଦୀ ଲେଖିଛନ୍ତି, 'ମୋ ସମ୍ପତ୍ତି କେବଳ ଲୋକଙ୍କ ଭଲପାଇବା ଓ ସମ୍ମାନ ଥିଲା, ଯାହା ମୋତେ ଦେଶ-ବିଦେଶରେ ମିଳିଛି । ଦୁଇ ପିଲଙ୍କୁ ଏକାକୀ ପାଳିଛି ଓ ଏଥିପାଇଁ ମୁଁ ସବୁବେଳେ ଗର୍ବିତ । କିନ୍ତୁ ମୁଁ କେବେବି ଅଭିଯୋଗ କରିନଥିଲି, ବରଂ ଇଶ୍ୱରଙ୍କୁ ଧନ୍ୟବାଦ ଦେଇ ଆସୁଥିଲି । ମୁଁ କେବେ ବି ଭଗବାନଙ୍କ ନିକଟରେ ଅଭିଯୋଗ କରିନି । ମୋ ପୁଅ ନିଶାନ୍ତ-ମୋ ପାଇଁ ସବୁ କିଛି । ମୋର ଦୁଇ ପିଲା ମୋତେ ଅଧିକ ଭଲ ପାଉଥିଲେ, କିନ୍ତୁ ମୋ ପୁଅ ନିଶାନ୍ତ ମୋର ସାଙ୍ଗ, ମୋର ସହଯାତ୍ରୀ ଥିଲା । ସେ ମୋର ଶକ୍ତି ଥିଲା, ଯିଏ ମୋତେ ବଞ୍ଚିବା ଓ କାମ କରିବା ପାଇଁ ଉର୍ଜା ଦେଉଥିଲା । ମୋ ଜୀବନ ଏବେ ଶେଷ ହୋଇଯାଇଛି । ମୋ ପୁଅ ନିଶାନ୍ତ ମୋତେ ଛାଡ଼ି ଚାଲିଯାଇଛି । ମୁଁ ଏବେ ଜୀଅନ୍ତା ଶବ ପାଲଟିଯାଇଛି । ସେ ମୋର ଅନ୍ତିମ ସଂସ୍କାର କରିଥାନ୍ତା, କିନ୍ତୁ ମୁଁ ଆଜି ମୋ ପୁଅର ଦାହ ସତ୍କାର କରିଛି ।'