ନିର୍ବାଚନ ଇସ୍ତାହାରରେ କେତେ ପ୍ରତିଶ୍ରୁତି ଦେଇଥିଲା ବିଜେପି, ଏଥିରେ କେତେ ସଫଳ ନୂଆପଡାବାସୀ ସମୀକ୍ଷା କରିବେ

ଭୁବନେଶ୍ବର ୬।୧୧: ନୂଆପଡା ଉପନିର୍ବାଚନ ପ୍ରସଙ୍ଗରେ ବିଜେଡିର ସୁଶାସନ, ବିଜେପି ସରକାରର ପ୍ରତିଶ୍ରୁତି ପ୍ରତାରଣାକୁ ନେଇ ବିଜେଡିର ସାମ୍ବାଦିକ ସମ୍ମିଳନୀ । ବିରୋଧୀ ଦଳ ଉପନେତା ପ୍ରସନ୍ନ ଆଚାର୍ଯ୍ୟ କହିଛନ୍ତି, ବିଜେଡି ୨୪ ବର୍ଷ ନବୀନ ପଟ୍ଟନାୟକଙ୍କ ନେତୃତ୍ୱରେ ରାଜ୍ୟକୁ ସୁଶାସନ ଦେଇଛନ୍ତି । ଓଡ଼ିଶାର ଲୋକେ ସ୍ୱପ୍ନ ଦେଖିଥିଲେ ବର୍ତ୍ତମାନ ସରକାରକୁ ନେଇ । ନିର୍ବାଚନ ଇସ୍ତାହାରରେ କେତେ ପ୍ରତିଶ୍ରୁତି ଦେଇଥିଲା ବିଜେପି । ଏଥିରେ କେତେ ସଫଳ ହୋଇଛନ୍ତି ନୂଆପଡାବାସୀ ସମୀକ୍ଷା କରିବେ । ଓଡ଼ିଶାରେ ୩୨ ବର୍ଷ ତଳେ ଯେଉଁ ଅବସ୍ଥା ମହିଳାଙ୍କ ଥିଲା ସେଥିରେ ସୁଧାର ଆଣିବାକୁ ପ୍ରୟାସ କରାଯାଇଥିଲା । ପଞ୍ଚାୟତିରାଜ ବ୍ୟବସ୍ଥାରେ ମହିଳାଙ୍କ ପାଇଁ ସଂରକ୍ଷଣ ହୋଇଥିଲା । ଏହାପରେ ମହିଳା ଜାଗରଣ ଚାଲିଛି । ବିଜେପି ସରକାର ଏହି ପ୍ରକ୍ରିୟାକୁ ଆଗକୁ ନେବେ ବୋଲି ଆଶା ଥିଲା । କିନ୍ତୁ ରିପୋର୍ଟ କାର୍ଡ ଦେଖିଲେ ଲାଜ ଲାଗୁଛି । ଓଡ଼ିଶାରେ ମହିଳାଙ୍କ ଅବସ୍ଥା କ’ଣ ବୋଲି ପ୍ରଶ୍ନ କରିଛି ବିଜେଡି । ପ୍ରତିଦିନ ଓଡ଼ିଶାରେ ୧୫ ଜଣ ମହିଳାଙ୍କ ସହ ଦୁଷ୍କର୍ମ ହେଉଛି । ବିଜେପି ସରକାର ସମୟରେ ୧୬ ମାସ ସରକାର ମଧ୍ୟରେ ୪ ହଜାର ଦୁଷ୍କର୍ମ ହୋଇସାରିଲାଣି ।  ରିପୋର୍ଟ ହୋଇନଥିବା କେଶ ଆହୁରି ରହିଛି । ଏହା ବର୍ତ୍ତମାନ ମହିଳା ଜାଗରଣର ସଦ୍ୟତମ ଉଦାହରଣ । ମହିଳା ବିରୋଧୀ ଅନ୍ୟ ନିର୍ଯାତନା ୪୦ ହଜାର । କିନ୍ତୁ ଏ ସରକାର ମହିଳା ଜାଗରଣର କଥା କହୁଛନ୍ତି । ଏ ସରକାର ସବୁ ଚୁରମାର କରିଦେଲେ । ଯେଉଁ ପ୍ରତିଶ୍ରୁତି ଦେଇଥିଲେ ପାଳନ କଲେ ନାହିଁ ।

୧୭ ଲକ୍ଷ ଲକ୍ଷପତି ଦିଦି ତିଆରି ହୋଇଛି ବୋଲି କହୁଛନ୍ତି । ଏହାର ସଂଜ୍ଞା କ’ଣ ବୁଝି ହେଉନାହିଁ । ସୁଭଦ୍ରା ଯୋଜନାରେ ବାର୍ଷିକ ୫୦ ହଜାର ଦେବେ କହୁଥିଲେ ଏବେ ପାଞ୍ଚ ବର୍ଷରେ ୫୦ ହଜାର ଦେଉଛନ୍ତି । ଯାହାକି ଦୈନିକ ୨୮ ଟଙ୍କା ୩୦ ପଇସା ପଡୁଛି । ତେଣୁ ଲକ୍ଷପତି ଦିଦିର ସଂଜ୍ଞା ଅର୍ଥଶାସ୍ତ୍ରୀମାନଙ୍କୁ ଖୋଜିବାକୁ ପଡିବ । ଚାଷୀଙ୍କୁ ସରକାର ୮୦୦ ଟଙ୍କା ଇନପୁଟ ସବ୍‌ସିଡି ଦେଉଥିବା କହୁଛନ୍ତି । କିନ୍ତୁ ଚାଷୀ ପଞ୍ଜିକରଣର ନୂଆ ନୀତି ଆରମ୍ଭ କରିଦେଲେ । ଫଳରେ ବହୁ ଚାଷୀ ପଞ୍ଜିକରଣରୁ ବଞ୍ଚିତ । ଯାହା ଫଳରେ ବହୁ ଚାଷୀ ମଣ୍ଡିରେ ଧାନ ବିକି ପାରିବେ ନାହିଁ । ତେଣୁ ଏହା ଚାଷୀ ପୋଷଣ ନୀତି ନା ଚାଷୀ ମାରଣ ନୀତି ବୋଲି ପ୍ରଶ୍ନ କରିଛି ଦଳ । ୩୫୦୦ ବାର୍ଧକ୍ୟ ଭତ୍ତା ଦେବେ କହିଥିଲେ । ଏବେ ଏହା ବିଫଳ । ବିଏସକେୱାଇକୁ ବନ୍ଦ କଲେ । ତେଣୁ ଲୋକେ ହଇରାଣ । ପୁଞ୍ଜିନିବେଶ ପ୍ରଚାର ହେଉଛି କିନ୍ତୁ କେତେ ପୁଞ୍ଜିନିବେଶ ହୋଇଛି ବୋଲି ପ୍ରଶ୍ନ ହୋଇଛି । ସରକାର ପ୍ରହେଳିକା ତିଆରି କରୁଛନ୍ତି । ସେପଟେ ନିରପେକ୍ଷ ନିର୍ବାଚନ ହେଉ ବୋଲି ଦାବି ହୋଇଛି । ନିର୍ବାଚନ କମିଶନ ସରକାରଙ୍କ ଶାଖା ଭାବେ ବକ୍ତବ୍ୟ ଦେଉଛନ୍ତି । ସ୍ଵଚ୍ଛ ନିର୍ବାଚନ କରିବା ନେଇ ସ୍ପଷ୍ଟ କରନ୍ତୁ ବୋଲି ଦାବି କରିଛି ଦଳ ।