'ବିପଦରେ ଗଣତନ୍ତ୍ର ଏବଂ ଧର୍ମ ନିରପେକ୍ଷତା': ସମ୍ବିଧାନ ଦିବସରେ କଟାକ୍ଷ କଲେ ମମତା

ନୂଆଦିଲ୍ଲୀ, ୨୬/୧୧: ସମ୍ବିଧାନ ଦିବସରେ କେନ୍ଦ୍ର ସରକାରଙ୍କୁ ଟାର୍ଗେଟ୍ କରିଛନ୍ତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଯେତେବେଳେ ଗଣତନ୍ତ୍ର, ଧର୍ମ ନିରପେକ୍ଷତା ଏବଂ ସଙ୍ଘୀୟ ବ୍ୟବସ୍ଥା ବିପଦରେ ରହିଛି ସେତେବେଳେ ଏସବୁର ସୁରକ୍ଷା ଜରୁରୀ ବୋଲି ମମତା କହିଛନ୍ତି ।

ମମତା କହିଛନ୍ତି ଯେ, ସମ୍ବିଧାନକୁ ସମ୍ମାନ ଦେବା ନାଗିକଙ୍କ କର୍ତ୍ତବ୍ୟ । ଏହା ଭାରତର ମେରୁଦଣ୍ଡ । ଦେଶର ବିଭିନ୍ନତାକୁ ଏକସୂତ୍ରରେ ବାନ୍ଧିରଖିବାରେ ସମ୍ବିଧାନର ମହତ୍ୱପୂର୍ଣ୍ଣ ଭୂମିକା ରହିଛି । ଏହାସହ ସେ ସମ୍ବିଧାନ ପ୍ରଣେତା ଭୀମ ରାଓ ଆମ୍ବେଦକରଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରି କହିଛନ୍ତି ଯେ, ସମ୍ବିଧାନ ହେଉଛି ଭାରତର ମେରୁଦଣ୍ଡ । ଦେଶରେ ବିଭିନ୍ନ ସଂସ୍କୃତି, ଭାଷାଭାଷୀର ଲୋକେ ବସବାସ କରନ୍ତି । ସମସ୍ତଙ୍କୁ ବାନ୍ଧି ରଖିବାରେ ସମ୍ବିଧାନ ସଫଳ ହୋଇଛି । ସମ୍ବିଧାନର ସମସ୍ତ ନୀତି ନିୟମକୁ ସମ୍ମାନ ଦେବା ଆବଶ୍ୟକ ।

ସେ ଆହୁରି କହିଛନ୍ତି ଯେ, ଏବେ ସମ୍ବିଧାନ ବିପଦରେ ରହିଛି । ଗଣତନ୍ତ୍ର ବିପଦରେ ପଡିଛି । ଧର୍ମନିରପେକ୍ଷତା ଶେଷ ହେବାକୁ ବସିଲାଣି । ଏପରି କଠିନ ସମୟରେ ଆମକୁ ସମ୍ବିଧାନର ସୁରକ୍ଷା କରିବାକୁ ପଡିବ । ଏହାଦ୍ୱାରା ସେ ପରୋକ୍ଷରେ କେନ୍ଦ୍ର ସରକାରଙ୍କୁ ସମାଲୋଚନା କରିଥିବା କୁହାଯାଉଛି ।

ତେବେ ମମତାଙ୍କ ପୂର୍ବରୁ ବିରୋଧୀ ଦଳ ନେତା ରାହୁଲ ଗାନ୍ଧୀ ମଧ୍ୟ ସମ୍ବିଧାନ କେବଳ ଏକ ସାଧାରଣ ବହି ନୁହେଁ ବୋଲି କହିଥିଲେ । ସମ୍ବିଧାନ ଆଗରେ ଧନି ଗରିବ, ସମସ୍ତ ଭାଷାଭାଷୀର ବ୍ୟକ୍ତି, ଜାତି ବର୍ଣ୍ଣ ନିର୍ବିଶେଷରେ ସମସ୍ତେ ସମାନ ବୋଲି ସେ ନିଜ ଏକ୍ସରେ ପୋଷ୍ଟ କରିଥିଲେ ।