ମୋହନା: ପୋଲିସକୁ ମିଳିଛି ବଡ଼ ସଫଳତା । ପାଟ୍ରୋଲିଂ ବେଳେ ପ୍ରାୟ ୧୦ କୁଇଣ୍ଟାଲ ଗଞ୍ଜେଇ ଜବତ କରିବା ସହ ୨ ଜଣକୁ ଗିରଫ କରିଛି ଗଜପତି ଜିଲ୍ଲା ଅଡ଼ବା ଥାନା l ଅଡ଼ବା ଥାନା କୁମ୍ଭାରପଦର- ରାମସିଂ ଗାଁ ନିକଟରେ ପେଟ୍ରୋଲିଂ କରୁଥିଲା ପୋଲିସ l ଏହି ସମୟରେ ଜଙ୍ଗଲ ରାସ୍ତା ମଝିରେ କିଛି ବ୍ୟକ୍ତି ବ୍ୟାଗ ସହ ଠିଆ ହୋଇଥିଲେ l ହେଲେ ପୋଲିସକୁ ଦେଖି ସେମାନେ ଦୌଡ଼ି ପଳାଇଥିଲେ l ପୋଲିସ ମଧ୍ୟ ସେମାନଙ୍କ ପିଛା କରିଥିଲା।

ତେବେ ପୋଲିସ ଉକ୍ତ ବ୍ୟାଗ ଗୁଡ଼ିକ ଯାଞ୍ଚ କରିବା ପରେ ସେଥିରେ ବିପୁଳ ପରିମାଣର ଗଞ୍ଜେଇ ଥିବା ଦେଖିବାକୁ ମିଳିଥିଲା l ଏହା ସହ ପୋଲିସ ଦୁଇ ଜଣ ଅଭିଯୁକ୍ତଙ୍କୁ କାବୁ କରିବାରେ ସକ୍ଷମ ହୋଇଥିଲା। ଗିରଫ ଅଭିଯୁକ୍ତମାନେ ହେଲେ ରାମସିଂ ଗାଁର ଅନନ୍ତ ମାଝୀ ଓ ଅସୀମ ମାଝୀ l ଅଭିଯୁକ୍ତମାନେ ବାହାର ରାଜ୍ୟକୁ ଗଞ୍ଜେଇ ଚୋରା ଚାଲାଣ ପାଇଁ ପ୍ରସ୍ତୁତ ହେଉଥିଲେ l ଜବତ ଗଞ୍ଜେଇର ଆନୁମାନିକ ମୂଲ୍ୟ ୧ କୋଟି ଟଙ୍କା ହେବ ବୋଲି ପୋଲିସ ସୂଚନା ଦେଇଛି l