ନୂଆଦିଲ୍ଲୀ ୦୫।୦୫: ବଲିଉଡ୍ ଇଣ୍ଡଷ୍ଟ୍ରି । ଏଠାରେ ତିଷ୍ଟିବା ସମସ୍ତଙ୍କ ପାଇଁ ସହଜ ନୁହେଁ । କିଏ ହୁଏ ସୁପରଷ୍ଟାର ତ ଆଉ କିଏ ହୁଏ ଫ୍ଲପ୍ । ଏଠାରେ ସୁପରଷ୍ଟାରଙ୍କ ଅପେକ୍ଷା ଫ୍ଲପ୍ କଳାକାରଙ୍କ ସଂଖ୍ୟା ଅଧିକ । କିଏ ଫିଲ୍ମ ଇଣ୍ଡଷ୍ଟ୍ରି ଛାଡିବା ପରେ ଦାଣ୍ଡର ଭିକାରୀ ହୋଇଛନ୍ତି ତ, ଆଉ କେହି ଫ୍ଲପ୍ ଷ୍ଟାର ହେବା ପରେ ବି ଛାପନ୍ତି ମୋଟା ଅଙ୍କର ଟଙ୍କା । ବଲିଉଡ୍ରେ ଏପରି ଜଣେ ଷ୍ଟାର ଅଛନ୍ତି ଯିଏ ୧୯ଥର ହୋଇଛନ୍ତି ଫ୍ଲପ୍ ।
କିନ୍ତୁ ଏତେପରେ ବି ସେ କୋଟିକୋଟି ସମ୍ପତ୍ତିର ମାଲିକ । ସେ ଆଉ କେହି ନୁହଁନ୍ତି ସେ ହେଉଛନ୍ତି ଦବଙ୍ଗଖାନଙ୍କ ସାନ ଭାଇ ସୋହେଲ ଖାନ । ତାଙ୍କର ଅଧିକାଂଶ ଫିଲ୍ମ ଫ୍ଲପ୍ । ତଥାପି ସେ ଭଲ ଟଙ୍କା ରୋଜଗାର କରନ୍ତି । ଏବେ ସମସ୍ତଙ୍କ ମନରେ ପ୍ରଶ୍ନ ଆସୁଥିବ ଯେ କେଉଁଠୁ କରୁଛନ୍ତି ରୋଜଗାର ?
ସୋହେଲ ଖାନ କେବଳ ଜଣେ ଅଭିନେତା ନୁହଁନ୍ତି ବରଂ ଜଣେ ନିର୍ଦ୍ଦେଶକ ଏବଂ ପ୍ରଯୋଜକ ମଧ୍ୟ । ସୋହେଲ ଖାନ ୧୯୯୭ ବଲିଉଡ୍ରେ କରିଥିଲେ ଏଣ୍ଟ୍ରି । ତାଙ୍କର ପ୍ରଥମ ଫିଲ୍ମ ଆକ୍ସନ ଥ୍ରୀଲର ଫିଲ୍ମ 'ଆଜାର' ନିର୍ଦ୍ଦେଶନା ଜରିଆରେ କରିଥିଲେ ଡେବ୍ୟୁ । ଯେଉଁଥିରେ ତାଙ୍କ ଭାଇ ସଲମାନ ଏବଂ ସଞ୍ଜୟ କପୁର ମୁଖ୍ୟ ଭୂମିକାରେ ଅଭିନୟ କରିଥିଲେ । ସେ ୨୦୦୨ରେ "ମୈନେ ଦିଲ୍ ତୁଝକୋ ଦିଆ" ସହିତ ସ୍କ୍ରିପ୍ଟ ଲେଖିବା ଏବଂ ନିର୍ଦ୍ଦେଶନା ସହିତ ଅଭିନୟରେ ଡେବ୍ୟୁ କରିଥିଲେ ।
ଯାହା ବକ୍ସ ଅଫିସରେ ହାରାହାରି ବ୍ୟବସାୟ କରିଥିଲା। ଏହା ପରେ ସେ ଆଉ କିଛି ଫିଲ୍ମରେ ଅଭିନୟ କରିଥିଲେ, କିନ୍ତୁ ମୁଖ୍ୟ ଭୂମିକାରେ ଥିବା ସବୁ ଫିଲ୍ମ ହୋଇଥିଲା ଫ୍ଲପ୍ । ସୋହେଲ ଖାନ ଶେଷ ଥର ପାଇଁ ଦବଙ୍ଗ ୩ରେ ସଲମାନ ଖାନଙ୍କ ସହିତ ଦେଖିବାକୁ ମିଳିଥିଲେ । ଏହା ମଧ୍ୟ ଫ୍ଲପ୍ ହୋଇଥିଲା।
କିନ୍ତୁ ଏତେ ପରେ ସେ ହେଉଛନ୍ତି କୋଟି କୋଟି ସମ୍ପତ୍ତିର ମାଲିକ । ବାସ୍ତବରେ ସୋହେଲ ଜଣେ ସଫଳ ବ୍ୟବସାୟୀ । ଚଳଚ୍ଚିତ୍ର ନିର୍ମାଣ, ନିର୍ଦ୍ଦେଶନା ଏବଂ ଅଭିନୟ ବ୍ୟତୀତ, ସେ ସମ୍ପତ୍ତି ଭଡା ଦେଇଥାନ୍ତି ଏବଂ ମୋଟା ଅଙ୍କର ଆୟ କରିଥାନ୍ତି । ତାଙ୍କର କ୍ରିକେଟ୍ ଟିମ୍ ଏବଂ ଏକ ଜିମ୍ର ଫ୍ରାଞ୍ଚାଇଜ୍ ମଧ୍ୟ ରହିଛି । ତେବେ ସମ୍ପତ୍ତିକୁ ନେଇ ଚର୍ଚ୍ଚା ହେବାର କାରଣ ହେଉଛି କି ସୋହେଲ୍ ନିକଟରେ ମୁମ୍ବାଇର ବାନ୍ଦ୍ରାରେ ଥିବା ଏକ ସମ୍ପତ୍ତିକୁ ଭଡ଼ାରେ ଦେଇଛନ୍ତି । ସେ ଦି ଆଇରିଶ୍ ହାଉସ୍ ଫୁଡ୍ ଆଣ୍ଡ୍ ବେଭେରେଜେସ୍ ପ୍ରାଇଭେଟ୍ ଲିମିଟେଡ୍କୁ ଏକ ଦୋକାନ ସ୍ଥାନ ଭଡ଼ାରେ ଦେଇଛନ୍ତି ।
ଇନସ୍ପେକ୍ଟର ଜେନେରାଲ୍ ଅଫ୍ ରେଜିଷ୍ଟ୍ରେସନ୍ର ଦସ୍ତାବିଜ ଅନୁସାରେ ସୋହେଲଙ୍କ ଦୋକାନର କ୍ଷେତ୍ରଫଳ ୧,୨୯୦.୫୭ ବର୍ଗଫୁଟ । ଏହି ସ୍ଥାନର ଏଗ୍ରିମେଣ୍ଟ ପାଞ୍ଚ ବର୍ଷ ପାଇଁ ହୋଇଛି । ସିକ୍ୟୁରିଟି ପାଇଁ ୬୦ ଲକ୍ଷ ଟଙ୍କା ମଧ୍ୟ ଡିପୋଜିଟ୍ କରାଯାଇଛି । ଏହି ଜାଗା ପାଇଁ ସୋହେଲଙ୍କୁ ମାସିକ ମିଳିବ ୧୬ ଲକ୍ଷ ୮୯ ହଜାର ଟଙ୍କା । କିନ୍ତୁ ଅଭିନେତାଙ୍କ ପାଖକୁ ମାସିକ ଆସି ୧୦ ଲକ୍ଷ ୩୪ ହଜାର ଟଙ୍କା । ଆଉ ୫ବର୍ଷର ଭଡାକୁ ଆକଳନକୁ ନେଲେ ଏହା ୧୦ କୋଟି ଟଙ୍କାରୁ ଅଧିକ ।
୨୦୦୯ରେ ସୋହେଲେ ଏହି ଜାଗାଟିକୁ ୩ କୋଟିରେ କିଣିଥିଲେ । ଯାହା ଏବେ ତାଙ୍କୁ ଲାଭ ଦେଇଛି । ତେବେ ସୋହେଲ ଖାନଙ୍କ ସମ୍ପତ୍ତି ବିଷୟରେ କହିବାକୁ ଗଲେ, ସେ ୩୦୦ କୋଟି ଟଙ୍କାର ମାଲିକ । ସେ ତାଙ୍କ ବ୍ୟବସାୟରୁ ମୋଟା ଅଙ୍କର ରୋଜଗାର କରନ୍ତି । ଆଉ ଲଗଜୁରୀ ଲାଇଫ୍ଷ୍ଟାଇଲ୍ ମେଣ୍ଟେନ୍ କରନ୍ତି ।
