ପିଚ୍ ରେ କେବେ କାର୍ ତ କେବେ ସାପ,  କ୍ରିକେଟ୍ ମ୍ୟାଚ୍ ଅଟକିଥିବାର ଅନେକ କାରଣ...

ନୂଆଦିଲ୍ଲୀ : ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଚତୁର୍ଥ ଟି-୨୦ ମ୍ୟାଚ୍ ଲକ୍ଷ୍ନୌର ଇକାନା ଷ୍ଟାଡିୟମରେ ଖେଳା ଯିବାର ଥିଲା। ମାତ୍ର ମଇଦାନରେ ଘନ କୁହୁଡ଼ି କାରଣରୁ ମ୍ୟାଚ୍ ଆରମ୍ଭ ହେବା ତ ଦୂରର କଥା ଟସ୍ ବି ପଡ଼ିଲାନି। ଶେଷରେ ମ୍ୟାଚ୍ କୁ କରାଯାଇଛି ରଦ୍ଦ ଘୋଷଣା । ଆଉ ଦର୍ଶକଙ୍କୁ ନିରାଶର ସହ ଫେରିବାକୁ ପଡ଼ିଛି। ଟସ୍ ସନ୍ଧ୍ୟା ୬ଟା ୩୦ରେ ପଡ଼ିବାର ଥିବାବେଳେ ମ୍ୟାଚ୍ ର ଆରମ୍ଭ ସମୟ ଥିଲା ୭ଟା। ମାତ୍ର ଷ୍ଟାଡିୟମରେ ଘନ କୁହୁଡ଼ିର ଚାଦର ପଡ଼ି ଯାଇଥିଲା। ହଟିବାର ନାଁ ବି ନେଇ ନ ଥିଲା। ମ୍ୟାଚ୍ ଅଧିକାରୀ ପୂରା ଚେଷ୍ଟା କରିଥିଲେ। ଛଅ ଥର ଟସ୍ ସମୟ ଘୁଞ୍ଚାଗଲା, ତଥାପି ମ୍ୟାଚ୍ ଖେଳା ଯାଇ ପାରିଲା ନାହିଁ। ଶେଷରେ ଏହାକୁ ରଦ୍ଦ କରିବାକୁ ପଡ଼ିଥିଲା। ଇଏ ପ୍ରଥମ ଥର ନୁହେଁ ପୂର୍ବରୁ ବି ଏମିତି ହୋଇଛି। ଇତିହାସରେ ଅନେକ ଥର କ୍ରିକେଟ ମ୍ୟାଚ୍ ଅଟକିଛି। ଆଉ ଏହାର କାରଣ ମଧ୍ୟ ବେଶ ଅଜବ ରହିଛି। ତେବେ ଆସନ୍ତୁ ଜାଣିବା।

ସୂର୍ଯ୍ୟକିରଣ- ସୂର୍ଯ୍ୟକିରଣ ଯୋଗୁଁ ମ୍ୟାଚ୍ କୁ ବନ୍ଦ୍ ରଖା ଯାଇଥିଲା । 2019 ମସିହାରେ ଭାରତ ବନାମ ନ୍ୟୁଜିଲ୍ୟାଣ୍ଡ ମ୍ୟାଚରେ ବି ଏପରି ଘଟିଥିଲା। ନାପିଅରର ମ୍ୟାକଲିନ୍ ପାର୍କରେ ଖେଳା ଯାଉଥିବା ଦିନିକିଆ ମ୍ୟାଚରେ ସୂର୍ଯ୍ୟକିରଣ ସିଧାସଳଖ ବ୍ୟାଟରଙ୍କ ଆଖିରେ ପଡ଼ୁଥିଲା। ଯେଉଁ କାରଣରୁ ମ୍ୟାଚ୍କୁ ଅଧ ଘଣ୍ଟା ପାଇଁ ଅଟକା ଯାଇଥିଲା।

ଉଡ଼ନ୍ତା ପୋକ- ପଡିଆରେ ପ୍ରବେଶ କରୁଥିବା ଉଡ଼ନ୍ତା ପୋକ ଯୋଗୁ ବନ୍ଦ୍ ହୋଇଥିଲା ମ୍ୟାଚ୍। ଗତ ବର୍ଷ, ସେଞ୍ଚୁରିଅନରେ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଏକ T20 ମ୍ୟାଚ୍ ଏହି କାରଣରୁ 30 ମିନିଟ୍ ପାଇଁ ବନ୍ଦ ରହିଥିଲା।

ପିଚ୍ ରେ କାର୍- ଦିଲ୍ଲୀ ଏବଂ ଉତ୍ତର ପ୍ରଦେଶ ମଧ୍ୟରେ ଏକ ରଣଜୀ ଟ୍ରଫି ମ୍ୟାଚ୍ ସମୟରେ, ଜଣେ ବ୍ୟକ୍ତି ପିଚ୍ ଉପରକୁ କାର୍ ନେଇ ଆସିଥିଲେ। ଖେଳାଳି ଏବଂ ଅମ୍ପାୟାରଙ୍କ ଦ୍ୱାରା ଚେତାବନୀ ଦିଆଯିବା ସତ୍ତ୍ୱେ, ଉକ୍ତ ବ୍ୟକ୍ତି ପିଚ୍ ଉପରେ କାର୍ ଚଲାଇବାକୁ ଚେଷ୍ଟା କରିଥିଲେ। ଫଳରେ କିଛି ସମୟ ପାଇଁ ମ୍ୟାଚ୍ ବନ୍ଦ୍ ରଖା ଯାଇଥିଲା। ଏହି ମ୍ୟାଚରେ ଗୌତମ ଗମ୍ଭୀର ବି ଥିଲେ। ଯିଏ ଏବେ ଟିମ୍ ଇଣ୍ଡିଆର୍ ହେଡ୍ କୋଚ୍। ମ୍ୟାଚ୍ ଟି ପାଲମରେ ଅନୁଷ୍ଠିତ ହୋଇଥିଲା।

ଅଗ୍ନିଶମବାହିନୀ- ଷ୍ଟାଡିୟମ୍ ରେ କୌଣସି ନିଆଁ ନଥିଲା କିନ୍ତୁ ପହଞ୍ଚିଥିଲା ଅଗ୍ନିଶମ ବାହିନୀ । କାରଣ ହେଉଛି ନାତନ ଲିଅନ୍ ଟୋଷ୍ଟ ଜାଳି ଦେଇଥିଲେ, ଯେଉଁଥିପାଇଁ ଷ୍ଟାଡିୟମରେ ବାଜିଥିଲା ଆଲାର୍ମ। ଫାୟାର ଆଲାର୍ମ ବାଜିବା ଯୋଗୁ ଅଗ୍ନିଶମବାହିନୀ ଷ୍ଟାଡିୟମରେ ପହଞ୍ଚିଥିଲା। ଆଉ ମ୍ୟାଚକୁ ସ୍ଥଗିତ ରଖିବାକୁ ପଡ଼ିଥିଲା। ଏହି ଘଟଣା ଜାନୁଆରୀ ୨୦୧୭ରେ ଖେଳାଯାଇଥିବା ନ୍ୟୁ ସାଉଥ୍ ୱେଲ୍ସ ବନାମ କ୍ୱିନ୍ସଲ୍ୟାଣ୍ଡ ମ୍ୟାଚ୍ ସମୟରେ ଘଟିଥିଲା। ୨୦୦୭ରେ ଏକ କାଉଣ୍ଟି ଚାମ୍ପିଅନସିପ୍ ମ୍ୟାଚ୍ ସମୟରେ ସମାନ ଘଟଣା ଘଟିଥିଲା। ପରେ ଜଣାପଡିଥିଲା ଯେ ରୋଷେଇ ଘରେ ଗ୍ରେଭି ଜଳିଯାଇଛି। ଯେଉଁଥିରୁ ଉଠୁଥିବା ଧୂଆଁ କାରଣରୁ ଫାୟର ଆଲାର୍ମ ବାଜିଥିଲା। ଏହି ଘଣାରେ, ଆଲାର୍ମ ବାଜିବା ପରେ ଷ୍ଟାଡିୟମକୁ ଖାଲି କରାଯାଇଥିଲା।

ମହୁମାଛି ଯୋଗୁଁ ମ୍ୟାଚ୍ ବନ୍ଦ୍ - ୨୦୧୭ରେ, ଜୋହାନ୍ସବର୍ଗରେ ଦକ୍ଷିଣ ଆଫ୍ରିକା ବନାମ ଶ୍ରୀଲଙ୍କା ୱାନଡେ ମ୍ୟାଚ୍ ସମୟରେ ଅନେକ ମହୁମାଛି ହଠାତ୍ ପଡ଼ିଆ ଭିତରକୁ ଚାଲି ଆସିଥିଲେ। ଯାହା ଫଳରେ ମ୍ୟାଚ୍ ଏକ ଘଣ୍ଟାରୁ ଅଧିକ ସମୟ ପାଇଁ ବନ୍ଦ କରିବାକୁ ପଡିଥିଲା।

ପଡ଼ିଆରେ ସାପ- ଶ୍ରୀଲଙ୍କାରେ ଅନେକ ଥର ପଡ଼ିଆରେ ସାପ ଦେଖିବାକୁ ମିଳିଛି। ଯାହା ଫଳରେ ମ୍ୟାଚ୍ ବନ୍ଦ କରିବାକୁ ପଡିଛି। କୁକୁର ଏବଂ ଅନ୍ୟାନ୍ୟ ପ୍ରାଣୀ ମଧ୍ୟ ପଡ଼ିଆପେ ପ୍ରବେଶ କରିବା ଯୋଗୁଁ ଅନେକ ମ୍ୟାଚ୍ ମଧ୍ୟ ବବନ୍ଦ କରାଯାଇଛି।

ବଲ ପିଚ୍ ରେ ଫସିଯିବା - ଏହି ଘଟଣା ମହିଳା ବିଗ୍ ବାଶ୍ ଲିଗ୍ ରେ ଘଟିଥିଲା। ଏହି ବର୍ଷ ଆରମ୍ଭରେ, ହୋବାର୍ଟ ହରିକେନ୍ସ ବନାମ ଆଡିଲେଡ୍ ଷ୍ଟ୍ରାଇକର୍ସ ମ୍ୟାଚ୍ ସମୟରେ, ଇନିଂସ ବିରତି ସମୟରେ ଏକ ବଲ ରୋଲର ତଳକୁ ଚାଲିଯାଇଥିଲା। ଯାହା ପିଚ୍ ରେ ଏକ ଗର୍ତ୍ତ ସୃଷ୍ଟି କରିଥିଲା। ଫଳସ୍ୱରୂପ, ମ୍ୟାଚଟିକୁ ବାତିଲ କରିବାକୁ ପଡିଥିଲା।