ଆର୍ଟିଫିସିଆଲ ଇଣ୍ଟେଲିଜେନ୍ସ ଏବେ ପ୍ରାରମ୍ଭିକ ଅବସ୍ଥାରେ ଅଛି, ଏହା କେଉଁ ଦିଗକୁ ଯିବ ଏବେଠାରୁ କହିହେବ ନାହିଁ

ଭୁବନେଶ୍ବର ୨୯।୧୧: ଆର୍ଟିଫିସିଆଲ ଇଣ୍ଟେଲିଜେନ୍ସ ଏବେ ପ୍ରାରମ୍ଭିକ ଅବସ୍ଥାରେ ଅଛି ଏହା କେଉଁ ଦିଗକୁ ଯିବ ଏବେଠାରୁ କହି ହେବ ନାହିଁ । ତେବେ ଏହା ସୃଜନଶୀଳତାକୁ ପ୍ରଭାବିତ କରିପାରବ ନାହିଁ । ଏହା କହିଛନ୍ତିପ୍ରଖ୍ୟାତ କବି, ସଂଳାପ ଲେଖକ, ଗୀତିକାରଜାଭେଦ ଅଖତର ।ତୃତୀୟ ସୋଆ ସାହିତ୍ୟ ଉତ୍ସବରେ‘କଲଚର କ୍ରିଏଟିଭିଟି ଆଣ୍ଡ ଆର୍ଟିଫିସିଆଲ ଇଣ୍ଟେଲିଜେନ୍ସ’ ଶୀର୍ଷକ ଆଲୋଚନାରେ ସେ ଭାଗନେଇ ଏଭଳି ମତ ଦେଇଛନ୍ତି ।

ସେ କହିଛନ୍ତି, ଆର୍ଟିଫିସିଆଲ ଇଣ୍ଟେଲିଜେନସ ବା ଏଆଇର ଗାର୍ଲଫ୍ରେଣ୍ଡ ତାକୁ ଛାଡିକି ଯାଇନି, ତାର ନିଜସ୍ବ ଚିନ୍ତନ ନାହିଁ ତେଣୁ ସେ ସୃଜନଶୀଳତାକୁ କେବେବି ସଂପୂର୍ଣ୍ଣ ଭାବେ ନିୟନ୍ତ୍ରଣ କରିପାରିବ ନାହିଁ । ବର୍ତ୍ତମାନ ସମୟରେ ଯେତେବେଳେ ସବୁ କାର୍ଯ୍ୟରେ ଏଆଇ ପ୍ରବେଶ କଲାଣି ତେବେ କ୍ରିଏଟିଭିଟି କ୍ଷେତ୍ରରେ ଏହା ପଶିପାରିବନି । ତଥାପି ବି ଏଆଇ ଏବେ ପ୍ରାରମ୍ଭିକ ପର୍ଯ୍ୟାୟରେ ରହିଛି ।

ତେବେ ଜାଭେଦ ଅଖତର ଚିନ୍ତା ପ୍ରକଟ କରିଥିଲେ ବର୍ତ୍ତମାନର ପୀଢ଼ି ନିଜର ସଂସ୍କୃତି ଓ ନିଜର ଭାଷାକୁ ନେଇ ଗୌରବାନ୍ବିତ ହେଉନାହାନ୍ତି । ନିଜ ଭାଷା, ନିଜ ସଂସ୍କୃତି ବାବଦରେ ଅଜ୍ଞ ରହିବା ହିଁ ଆଧୁନିକତା, ଏମିତି ଯେଉଁମାନେ ଭାବୁଛନ୍ତି ସେମାନଙ୍କୁ ସେ ସମାଲୋଚନା କରିଥିଲେ । ଗୋଟିଏ ସଂସ୍କୃତିର ଧାରା ସୃଷ୍ଟି ହେବା ପାଇଁ ଦୁଇଟି ପୀଢି ଲାଗିଥାଏ ବୋଲି ସେ ମତ ଦେଇଛନ୍ତି ।

ସେହିପରି ସମାଜ ହିଁ ସିନେମାକୁ ଭଲ କି ଖରାପ ଦିଗ ଦେଇଥାଏ । ଯୁଗ ଅନୁସାରେ ଚଳଚ୍ଚିତ୍ରର କାହାଣୀ ସୃଷ୍ଟି ହୋଇଥାଏ । ସମୟ ଅନୁସାରେ ଭିଲେନଙ୍କ ରୂପରେଖ ବଦଳିଛି । ହେଲେ ବର୍ତ୍ତମାନ ଫିଲ୍ମରେ ଭିଲେନ ହିଁ ନାହାନ୍ତି । ବର୍ତ୍ତମାନ ତ ଏମିତି ସମୟ ଆସିଛି ସିନେମାରୁ ସ୍ୟାଡ ସଙ୍ଗ ବି ହଜିଗଲାଣି ବୋଲି କହି ସେ ତୀର୍ଜକ ଆକ୍ଷେପ କରିଥିଲେ ।

ନିଜ ଶବ୍ଦର ଚାତୁରୀରେ ଜାଭେଦ ଅଖତର କିଛି ଏମିତି କଥା କହିଥିଲେ ଯେଉଁଥିରେ କଥା ଗୋଟିଏ କିନ୍ତୁ ଅର୍ଥ ବ୍ୟାପକ, ଯାହାର ଇଙ୍ଗିତ ଉପସ୍ଥିତ ଯୁବପୀଢି ବୁଝିବା ସହିତ କରତାଳି ମଧ୍ୟ ଦେଇଥିଲେ । ଏଥିସହିତ ସେ ତାଙ୍କର କବିତା ପାଠ କରି ମଧ୍ୟ ଦର୍ଶକଙ୍କୁ ମନ୍ତ୍ରମୁଗ୍ଧ କରିଦେଇଥିଲେ ।