ବୌଦ୍ଧ ୩୧/୮: ବୌଦ୍ଧ ଜିଲ୍ଲା କୁସଙ୍ଗ ବନ୍ୟପ୍ରାଣୀ ଅଞ୍ଚଳ ଅତଳସରା ଗାଁର ପଦ୍ମଚରଣ ନାୟକ । ଶନିବାର ସକାଳୁ ବିଲକୁ ଚାଷ କାମ ଦେଖିବାକୁ ଯାଇଥିଲେ । ହଠାତ ଜଙ୍ଗଲ ନିକଟରୁ ୩ ଟି ଭାଲୁ ପଦ୍ମଚରଣଙ୍କୁ ଆକ୍ରମଣ କରିଥିଲେ । ଜୀବନ ବଞ୍ଚାଇବାକୁ ଦୌଡି ପଳାଇବା ସମୟରେ ୩ଟି ଭାଲୁ ଘେରିଯାଇ ଆକ୍ରମଣ କରିଥିଲେ । ସାହସ ନ ହରାଇ ସେ ଭାଲୁଙ୍କ ସହ ଲଢିଥିଲେ । ପ୍ରାୟ ୩୦ ମିନିଟ୍ ଧରି ଚାଲିଥିଲା ଭାଲୁ-ମଣିଷ ଲଢେଇ ।ଶେଷରେ ଉପସ୍ଥିତ ବୁଦ୍ଧି ଖଟାଇ ବଡ ପଥର ଖଣ୍ଡ ଫିଙ୍ଗିବାରୁ ଜଙ୍ଗଲକୁ ପଳାଇଥିଲେ ୩ଟି ଭାଲୁ ।
ଭାଲୁ ଆକ୍ରମଣରେ ପଦ୍ମଚରଣଙ୍କର ଗୋଡ,ମୁଣ୍ଡ ଓ ହାତରେ ଗଭୀର ଆଘାତ ଲାଗିଛି । ତାଙ୍କୁ ଗୁରୁତର ଅବସ୍ଥାରେ ହରଭଙ୍ଗା ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଥିଲା । ସେଠାରେ ଟୀକା ନଥିବାରୁ ବୌଦ୍ଧ ସଦର ମେଡିକାଲକୁ ସ୍ଥାନାନ୍ତର କରାଯାଇଛି । ସ୍ଥାନୀୟ ଅଞ୍ଚଳରେ କିଛି ଦିନ ଧରି ଆତଙ୍କ ଖେଳାଇଛନ୍ତି ଜଙ୍ଗଲି ଭାଲୁ । ବାରମ୍ବାର ଅଭିଯୋଗ ପରେ ବି ବନବିଭାଗ କିଛି ପଦକ୍ଷେପ ନେଉନି । ଗୁରୁତର ପଦ୍ମଚରଣଙ୍କୁ ସରକାରୀ ସହାୟତା ଯୋଗାଇ ଦେବାକୁ ଦାବି ହୋଇଛି ।
