ନୂଆଦିଲ୍ଲୀ: ୟେମେନର ସନାରେ ହୁତି ନିୟନ୍ତ୍ରିତ ସରକାରର ପ୍ରଧାନମନ୍ତ୍ରୀ ଅହମଦ ଅଲ-ରାହାୱିଙ୍କ ଇସ୍ରାଏଲ୍ ଆକ୍ରମଣରେ ମୃତ୍ୟୁ ହୋଇଛି । ପ୍ରଧାନମନ୍ତ୍ରୀ ରାହାୱିଙ୍କ ମୃତ୍ୟୁ ଖବରକୁ ହୁତି ସ୍ପଷ୍ଟ କରିଛି । ବିଦ୍ରୋହୀ ସଶସ୍ତ୍ର ଗୋଷ୍ଠୀ ହୁତି ଶନିବାର ଏକ ପ୍ରେସ୍ ବିବୃତ୍ତିରେ କହିଛି ଯେ ଗୁରୁବାର ହୋଇଥିବା ଆକ୍ରମଣରେ ଅଲ୍-ରାହାୱିଙ୍କ ମୃତ୍ୟୁ ହୋଇଛି । ଏହି ଆକ୍ରମଣରେ ଅନ୍ୟ କିଛି ମନ୍ତ୍ରୀଙ୍କ ମଧ୍ୟ ମୃତ୍ୟୁ ହୋଇଥିଲା । ହୁତି କହିଛି ଯେ ଏକ ସମୀକ୍ଷା କାର୍ଯ୍ୟକ୍ରମ ଚାଲିଥିବା ବେଳେ ଏହି ଆକ୍ରମଣ ହୋଇଥିଲା ।
ଇରାନ ସମର୍ଥିତ ସଶସ୍ତ୍ର ବିଦ୍ରୋହୀ ଗୋଷ୍ଠୀ ହୁତି ଅଗଷ୍ଟ ୨୮ରେ ୟେମେନରୁ ଇସ୍ରାଏଲ୍ ଉପରେ ମିସାଇଲ୍ ଓ ଡ୍ରୋନ୍ ଆଟାକ୍ କରିଥିଲା । ଏହାର ଜବାବରେ ଇସ୍ରାଏଲୀ ଏୟାରଫୋର୍ସ ହୁତି ନିୟନ୍ତ୍ରିତ ସନା ଉପରେ ବୋମା ବର୍ଷା କରିଥିଲା । ଏହି ଆକ୍ରମଣରେ ବିଦ୍ରୋହୀ ଗୋଷ୍ଠୀର ସୈନ୍ୟ ଠିକଣା ଓ ରାଷ୍ଟ୍ରପତି ଭବନକୁ ଟାର୍ଗେଟ୍ କରିଥିଲା । ରିପୋର୍ଟ ଅନୁସାରେ ଇସ୍ରାଏଲ୍ ଆକ୍ରମଣରେ ଅତି କମରେ ୧୦ ହୁତି କମାଣ୍ଡର ମୃତ ହୋଇଥିବା ବେଳେ ୯୦ରୁ ଅଧିକ ଆହତ ହୋଇଥିଲେ ।
ଗାଜାରେ ଚାଲିଥିବା ସଂଘର୍ଷରେ ହୁତି ବିଦ୍ରୋହୀ ପାଲେଷ୍ଟାଇନର ସବୁଠୁ ବଡ଼ ସମର୍ଥକ ମଧ୍ୟରୁ ଗୋଟିଏ । ଗତ କିଛି ମାସ ହେଲା ହୁତି ପକ୍ଷରୁ ଇସ୍ରାଏଲ୍ ଉପରେ ଲଗାତାର ମିସାଇଲ୍ ଓ ଡ୍ରୋନ୍ ଆକ୍ରମଣ କରାଯାଉଥିଲା । ପାଲେଷ୍ଟାଇନ୍ ସହ ଦୃଢତାର ସହ ଠିଆ ହୋଇଥିବା ଦର୍ଶାଇବାକୁ ଯାଇ ଏହି ଆକ୍ରମଣ କରାଯାଇଥିବା ହୁତି କହିଥିଲା ।
