ଜେଲରେ ମୋବାଇଲ ଫୋନ ବ୍ୟବହାର କରି ଧରାପଡିଲେ ଆଶାରାମ ବାପୁଙ୍କ ପୁଅ ନାରାୟଣ ସାଇଁ, FIR ରୁଜୁ

ସୁରଟ ୨୯।୧୧: ଆଶାରାମଙ୍କ ପୁଅ ନାରାୟଣ ସାଇଁଙ୍କ ସମସ୍ୟା କମ ହେବାର ନାଁ ନେଉନି। ଦୁଷ୍କର୍ମ ମାମଲାରେ ଆଜୀବନ ଜେଲଦଣ୍ଡ ଭୋଗୁଥିବା ନାରାୟଣ ସାଇଁଙ୍କ ବିରୋଧରେ ସୁରଟର ଲାଜପୁର ସେଣ୍ଟ୍ରାଲ ଜେଲରେ ମୋବାଇଲ ଫୋନ ରଖିବା ଓ ତାକୁ ବ୍ୟବହାର କରିବାର ନୂଆ ମାମଲା ରୁଜୁ ହୋଇଛି। ଏହି ମାମଲାର ଏଫଆଇଆର ସଚିନ ପୋଲିସ ଷ୍ଟେସନରେ ଦିଆଯାଇଛି। ଜେଲ ପ୍ରଶାସନ ଗୁରୁବାର ଗୁପ୍ତ ସୂଚନା ପାଇଥିଲା ଯେ ଉଚ୍ଚସୁରକ୍ଷିତ ବାରାକ ନମ୍ବର-୧ରେ ବନ୍ଦୀ ନାରାୟଣ ସାଇଁ ପାଖରେ ମୋବାଇଲ ଫୋନ ଅଛି।

ସୂଚନା ମିଳିବାମାତ୍ରେ ଜେଲ ସ୍କ୍ୱାଡ ତୁରନ୍ତ କାର୍ଯ୍ୟାନୁଷ୍ଠାନ କରିଥିଲା ଓ ନାରାୟଣ ସାଇଁ ରହୁଥିବା ସେଲ ନମ୍ବର-୧ର ଗହନ ତଲାସୀ ନିଆଯାଇଥିଲା। ଏହି ତଲାସୀ କାଳରେ ସେଲର ମୁଖ୍ୟ ଲୁହା ଫାଟକରେ ଏକ ସ୍ମାର୍ଟ ଫୋନ ଚୁମ୍ବକ ସହାୟତାରେ ଲାଗି ରହିଥିବାର ମିଳିଥିଲା। ଫୋନ ଛଡା ନରାୟଣ ସାଇଁ ନିକଟରୁ ଏକ ଜିଓ ସିମ୍ ମଧ୍ୟ ଜବତ ହୋଇଛି। ସେ ଏହି ସିମ୍ କୁ ତାଙ୍କ ଇନହେଲରରେ ଲୁଚାଇ ରଖୁଥିଲେ। ଯାଞ୍ଚରୁ ନାରାୟଣ ସାଇଁ ଅତ୍ୟନ୍ତ ସତର୍କତାର ସହ ଜେଲରେ ଫୋନ ବ୍ୟବହାର କରୁଥିବାର ଜଣାପଡିଛି। ସେ କଥାବାର୍ତ୍ତା ଶେଷ ହେବାମାତ୍ରେ ଫୋନରୁ ବ୍ୟାଟେରୀ ଓ ସିମ୍ କାର୍ଡ ଅଲଗା କରିଦେଉଥିଲେ।

ସେ ସିମ୍ କାର୍ଡକୁ ନିଜ ଇନହେଲରରେ ଲୁଚାଇ ରଖୁଥିବା ବେଳେ ବ୍ୟାଟେରୀକୁ ସେଣ୍ଟ୍ରି ରୁମରେ ଲୁଚାଇ ଦେଉଥିଲେ। ଜେଲ କର୍ମଚାରୀଙ୍କ ଚାଲାକି ଯୋଗୁ ସେଣ୍ଟ୍ରି ରୁମ ଦ୍ୱାରରେଥିବା କି ହୋଲରୁ ବ୍ୟାଟେରୀ ଜବତ ହୋଇଛି। ଜେଲ ପ୍ରଶାସନର ଅଭିଯୋଗ ଆଧାରରେ ସଚିନ ପୋଲିସ ନାରାୟଣ ସାଇଁ ବିରୋଧରେ ଭାରତୀୟ ନ୍ୟାୟ ସଂହିତା (ବିଏନଏସ୍) ସମ୍ବଦ୍ଧିତ ବିଭିନ୍ନ ଧାରାରେ ତଥା କୁଜରାଟ ଜେଲ ମାନୁଆଲ ନିୟମ ଉଲ୍ଲଂଘନ ଲାଗି ମାମଲା ରୁଜୁ ହୋଇଛି। ମାମଲାରେ ପୋଲିସ ପରବର୍ତ୍ତି ଯାଞ୍ଚ ଜାରି ରଖିଛି।

ନାରାୟଣ ସାଇଁ ଜେଲକୁ ମୋବାଇଲ ଫୋନ କେଉଁଠୁ ଓ କିପରି ଆଣିଲା ଏବଂ ଏହାକୁ ସେ କେଉଁ କେଉଁ ଲୋକଙ୍କ ସହ ସମ୍ପର୍କ କରିବା ପାଇଁ ବ୍ୟବହାର କରୁଥିଲା ତାର ଏବେ ଯାଞ୍ଚ ହେଉଛି। ଏସିପି ନୀରବ ଗୋହିଲ କହିଛନ୍ତି ଯେ ନାରାୟଣ ସାଇଁ ଜାହାଙ୍ଗିରପୁରା ପୋଲିସ ଷ୍ଟେସନ ରେପ୍ କେସ୍ ରେ ଦୋଷୀ କୈଦୀ ଅଛି। ତେବେ ଜେଲରେ ମୋବାଇଲ ଫୋନ ରଖିବା ଏକ ଗୁରୁତର ଅପରାଧ। ଏଥିରେ ନାରାୟଣ ସାଇଁ ସେଲରୁ ସେଲଫୋନ, ବ୍ୟାଟେରୀ ଓ ସୀମ୍ ଜବତ ହୋଇଛି। ଏଣୁ ଆମେ ଜେଲ ପ୍ରଶାସନର ଅଭିଯୋଗରେ ତୁରନ୍ତ ଏତଲା ରୁଜୁ କରିଛୁ ବୋଲି ଏସିପି କହିଛନ୍ତି।