ଯୁଦ୍ଧ ସମୟରେ ଓଲଟା ଚିତ୍ର, କମିଗଲା ସୁନା ଏବଂ ରୁପାର ଦାମ୍ : ଏବେ ଏତେ ଶସ୍ତା

ନୂଆଦିଲ୍ଲୀ, ୧୬ /୦୩: ଆମେରିକା ଏବଂ ଇରାନ ମଧ୍ୟରେ ଯୁଦ୍ଧ ଜାରି ରହିଛି । ସାରା ବିଶ୍ୱରେ ଏହାର ପ୍ରଭାବ ପଡୁଛି । ତୈଳ ଏବଂ ଗ୍ୟାସ୍ ସଙ୍କଟ ଦେଖାଗଲାଣି । ସମୁଦ୍ରରେ ଠିକ୍ ଭାବେ ପଣ୍ୟ ପରିବହନ ହୋଇପାରୁ ନାହିଁ । କିନ୍ତୁ ଏହି ସମୟରେ ସମସ୍ତଙ୍କୁ ଚକିତ କରିଛି ସୁନା ଏବଂ ରୁପାର ଦାମ୍ । ବିଶ୍ୱରେ କୌଣସି ସଙ୍କଟ ଦେଖାଗଲେ ସୁନା ଏବଂ ରୁପାର ଦାମ୍ ବୃଦ୍ଧି ପାଇଥାଏ । କିନ୍ତୁ ଇରାନ ଯୁଦ୍ଧରେ ଭିନ୍ନ ଚିତ୍ର ସାମ୍ନାକୁ ଆସିଛି ।

ରିପୋର୍ଟ ଅନୁସାରେ, ଯୁଦ୍ଧ ଆରମ୍ଭ ହେବା ପରଠୁ ଏବେଯାଏଁ ରୁପା ୨୩ ହଜାର ଟଙ୍କା ଶସ୍ତା ହୋଇଛି । ସୁନା ଦାମ୍ ମଧ୍ୟ ୩ ହଜାର ଟଙ୍କା କମିଛି ।

ଯୁଦ୍ଧ ଭିତରେ ରୁପା କ୍ରାସ୍

ଗତ ଫେବ୍ରୁଆରୀ ୨୮ ତାରିଖରେ ଆମେରିକା ଏବଂ ଇସ୍ରାଏଲ ଇରାନ ଉପରେ ଆକ୍ରମଣ କରିଥିଲେ । ସେହିଦିନ ଏମସିଏକ୍ସରେ ରୁପା ଦର କେଜି ପିଛା ୨ ଲକ୍ଷ ୮୨ ହଜାର ୬୪୪ ଟଙ୍କା ରହିଥିଲା । ଯାହା ଗତ ସପ୍ତାହର ଶେଷ କାରବାର ଦିନ ଅର୍ଥାତ ଶୁକ୍ରବାର ୨ ଲକ୍ଷ ୫୯ ହଜାର ୨୭୯ ଟଙ୍କାକୁ ଖସି ଆସିଛି । ଯୁଦ୍ଧ ଆରମ୍ଭ ହେବାର ୧୬ ଦିନ ବିତିଗଲାଣି । ଏହି ସମୟରେ ୧ କେଜି ରୁପାର ଦାମ୍ ପ୍ରାୟ ୨୩ ହଜାର ୩୬୫ ଟଙ୍କା ହ୍ରାସ ପାଇଛି ।

ସୁନା ବି କମିଲା

କେବଳ ରୁପା ନୁହେଁ ସୁନାର ଦାମ୍ ମଧ୍ୟ କମିଯାଇଛି । ଫେବ୍ରୁଆରୀ ୨୭ରେ ଏମସିଏକ୍ସରେ ସୁନା ୧୦ ଗ୍ରାମ୍ ପିଛା ୧ ଲକ୍ଷ ୬୨ ହଜାର ୧୦୪ ଟଙ୍କା ଥିଲା । ଯାହା ଏବେ ୩୭୦୪ ଟଙ୍କା ହ୍ରାସ ପାଇଛି । ଏବେ ସୁନାର ଦାମ୍ ଅଛି ୧ ଲକ୍ଷ ୫୮ ହଜାର ୪୦୦ । ଏହା ନିଜର ସର୍ବୋଚ୍ଚ ସ୍ତର ୧ ଲକ୍ଷ ୯୩ ହଜାର ୯୬ ଟଙ୍କାରୁ ପ୍ରାୟ ୩୪ ହଜାର ୬୯୬ ଟଙ୍କା ହ୍ରାସ ପାଇଛି ।

ଦାମ୍ କମିବା ପଛର କାରଣ

କୁହାଯାଉଛି ଯେ, କ୍ରୁଡ୍ ଅଏଲ୍ ଦାମ୍ ବଢିବା ସହ ଡଲାର ଶକ୍ତିଶାଳୀ ହେବାରେ ଲାଗିଛି । ତେଣୁ ସୁନା ଏବଂ ରୁପାର ଅଭିବୃଦ୍ଧି ଉପରେ ବ୍ରେକ୍ ଲାଗିଛି । କିନ୍ତୁ ଆଗାମି ଦିନରେ ଏହି ଦୁଇ ଧାତୁର ଦାମ୍ ବଢିବ ବୋଲି ବିଶେଷଜ୍ଞମାନେ ଆଶା କରୁଛନ୍ତି ।