୩ ଦିନ ପରେ ସେୟାର ସବୁଜ ସଂକେତରେ ବନ୍ଦ ହେଲା ବଜାର, ନିବେଶକଙ୍କ ଲାଭ ୧.୮ ଲକ୍ଷ କୋଟି ଟଙ୍କା

ନୂଆଦିଲ୍ଲୀ: ଲଗାତାର ତିନି ଦିନର ହ୍ରାସ ପରେ ଭାରତୀୟ ସେୟାର ବଜାର ସୋମବାର ପୁଣି ଥରେ ସବୁଜ ସଂକେତରେ ବନ୍ଦ ହୋଇଛି । ଆମେରିକା ସରକାରର ଆଜି ଯାଏ ସବୁଠୁ ବଡ଼ ସଟ୍‌ଡାଉନ୍ ଶେଷ ହେବାର ସମ୍ଭାବନା ଖବରରୁ ବୈଶ୍ୱିକ ବଜାରରେ ବୃଦ୍ଧି ଘଟିଛି, ଯାହାର ପ୍ରଭାବ ଭାରତୀୟ ବଜାରରେ ମଧ୍ୟ ସ୍ପଷ୍ଟ ଭାବେ ଦେଖିବାକୁ ମିଳିଛି । କାରବାର ଶେଷରେ ବିଏସଇ ସେନସେକ୍ସ ୩୧୯.୦୭ ପଏଣ୍ଟ ବା ୦.୩୮ ପ୍ରତିଶତ ବଢି ୮୩,୫୩୬.୩୫ ସ୍ତରରେ ବନ୍ଦ ହୋଇଛି । ସେହିପରି ନିଫ୍ଟି ଇଣ୍ଡେକ୍ସ ୮୨.୦୫ ପଏଣ୍ଟ ବା ୦.୩୨ ପ୍ରତିଶତ ବଢି ୨୫,୫୭୪.୩୫ ସ୍ତରରେ ବନ୍ଦ ହୋଇଛି ।

ସୋମବାର କାରବାରରେ ସେକ୍ଟୋରାଲ ଇଣ୍ଡେକ୍ସରେ ମିଶ୍ରିତ ଆଭିମୁଖ୍ୟ ଦେଖିବାକୁ ମିଳିଥିଲା । ସବୁଠୁ ଅଧିକ ବୃଦ୍ଧି ଆଇଟି ସେୟାରରେ ରହିଥିଲା, ଯେଉଁଥିରେ ନିଫ୍ଟି ଆଇଟି ଇଣ୍ଡେକ୍ସ ପ୍ରାୟ ୨ ପ୍ରତିଶତ ବୃଦ୍ଧି ପାଇଥିଲା । ଗତ ୬ କାରବାର ଦିନରେ ଲଗାତାର ହ୍ରାସ ଦେଖୁଥିବା ଆଇଟି ସେୟାର ଆଜି ମଜଭୁତି ଦେଖିବାକୁ ମିଳିଥିଲା । ଏହା ବ୍ୟତୀତ ଅଟୋ, ଫାଇନାନସିଆଲ୍ ସର୍ଭିସେସ୍, ମେଟାଲ ଫାର୍ମା, ହେଲ୍ଥକେୟାର, କଞ୍ଜୁମର ଡ୍ୟୁରେବଲ୍ସ ଓ ଅୟଲ ଆଣ୍ଡ ଗ୍ୟାସ ସେକ୍ଟର ବି ସବୁଜ ସଂକେତରେ ବନ୍ଦ ହୋଇଛି । 

ବିଏସଇ ତାଲିକାଭୁକ୍ତ କମ୍ପାନୀଗୁଡ଼ିକର ମୋଟ ବଜାର ପୁଞ୍ଜି ଆଜି ୪୬୮.୧୨ ଲକ୍ଷ କୋଟିକୁ ବୃଦ୍ଧି ପାଇଛି, ଯାହା ପୂର୍ବ ବ୍ୟବସାୟ ଦିନରେ ୪୬୬.୩୧ ଲକ୍ଷ କୋଟି ଥିଲା । ଏହିପରି, ବିଏସଇ ତାଲିକାଭୁକ୍ତ କମ୍ପାନୀଗୁଡ଼ିକର ବଜାର ପୁଞ୍ଜି ଆଜି ପ୍ରାୟ ୧.୮୧ ଲକ୍ଷ କୋଟି ବୃଦ୍ଧି ପାଇଛି । ଅନ୍ୟ ଶବ୍ଦରେ କହିବାକୁ ଗଲେ ନିବେଶକଙ୍କୁ ୧.୮୧ ଲକ୍ଷ କୋଟି ଟଙ୍କା ଲାଭ ହୋଇଛି ।

ବିଏସଇ ସେନସେକ୍ସର ୩୦ଟି ସେୟାର ମଧ୍ୟରୁ ଆଜି କେବଳ ୧୮ଟି ସେୟାର ସବୁଜ ଚିହ୍ନରେ ବନ୍ଦ ହୋଇଛି । ଏଥିରେ, ଇନଫୋସିସ୍ ସେୟାର ସର୍ବାଧିକ ୨.୫୨ ପ୍ରତିଶତ ବୃଦ୍ଧି ପାଇଛି । ଏହା ପରେ, ଏଚସିଏଲ୍ ଟେକ୍, ବଜାଜ ଫାଇନାନ୍ସ, ଏସିଆନ୍ ପେଣ୍ଟ୍ ଏବଂ ଟାଟା ମୋଟର୍ସ ପାସେଞ୍ଜର ଭେଇକିଲର ସେୟାର ୧.୨୦ ପ୍ରତିଶତରୁ ୧.୮୦ ପ୍ରତିଶତ ବୃଦ୍ଧି ସହିତ ବନ୍ଦ ହୋଇଛି । ଅନ୍ୟପଟେ ୧୨ଟି ସେନ୍ସେକ୍ସ ଷ୍ଟକ୍ ଲାଲ ରଙ୍ଗରେ ବନ୍ଦ ହୋଇଛି । ଭାରତୀ ଟ୍ରେଣ୍ଟ ସେୟାର ସର୍ବାଧିକ ୭.୪୧ ପ୍ରତିଶତ ହ୍ରାସ ପାଇଛି ।