ଜଗତସିଂହପୁର 20/03 : 'ମିଠା ମିଠା କଥା କହିଲେ, ଷଷ୍ଠ ଶ୍ରେଣୀରୁ ମୋତେ ଭଲ ପାଇଲେ। ଦୀର୍ଘ ବର୍ଷ ହେଲା ସଂପର୍କରେ ରହିଲେ । ଲୁଚି ଛପି ବିବାହ କରିବା ସହ ଶାରୀରିକ ସମ୍ପର୍କ ରଖିଲେ । ଏମିତି କି ତିନି ତିନି ଥର ଜୋର ଜବରଦସ୍ତ ଗର୍ଭ ନଷ୍ଟ କରାଇଲେ। କିନ୍ତୁ ନିଜ ଘରକୁ କେବେ ଆଣୁ ନଥିଲେ। ତଥାପି ମୁଁ ଧର୍ଯ୍ୟ ଧରି ରହିଥିଲି। ହେଲେ ଓଏଏସ ପାଇବା ପରେ ସେ ଠକିଦେଲେ।  ବଡ଼ ବାବୁ ହୋଇଗଲେ ବୋଲି ସଚ୍ଚା ପ୍ରେମିକରୁ ପାଲଟି ଗଲେ ଧୋକାବାଜ୍।' ଏହା ଚଳଚ୍ଚିତ୍ର ଡାଇଲଗ୍ ପରି ଲାଗୁଥିବ। କିନ୍ତୁ ଇଏ  ଫିଲ୍ମର କାହାଣୀ ନୁହେଁ... ବାସ୍ତବ ଜୀବନର ଏ କାହାଣୀ। ଆଉ ଏଭଳି କିଛି ଅଭିଯୋଗ ଆଣିଛନ୍ତି ଜଣେ ଯୁବତୀ। ସେ ଆହୁରି ବି କହିଛନ୍ତି, ତାଙ୍କୁ ଗ୍ରହଣ କରୁନାହାନ୍ତି ଓଏଏସ ଅଫିସର ବାବୁ କିମ୍ବା ତାଙ୍କର ପରିବାର ଲୋକେ । ଏପରି ଘଟଣା ଦେଖିବାକୁ ମିଳିଛି ଜଗତସିଂହପୁର ଜିଲ୍ଲା ସଦର ଥାନା ମାର୍କଣ୍ଡପୁର ଗାଁରେ।

ପିଡୀତା ଜଣକ କେନ୍ଦୁଝର ଅଞ୍ଚଳର ଜଣେ ଆଦିବାସୀ ସମ୍ପ୍ରଦାୟର ଯୁବତୀ ହୋଇଥିବା ସହ ଓଏଏସ ବାବୁ ଜଣକ ମଧ୍ୟ ଜଣେ ଆଦିବାସୀ ସମ୍ପ୍ରଦାୟର । ଯୁବତୀଙ୍କୁ ପ୍ରେମଜାଲରେ ଫସାଇ ଲୁଚି ଛପି ବିବାହ କଲେ ଓଏଏସ ବାବୁ । ଏପରିକି ବାରମ୍ବାର  ଶାରୀରିକ ସମ୍ପର୍କ ରଖିବା ସହ ତିନି ଥର ଜୋର ଜବରଦସ୍ତ ଗର୍ଭ   ନଷ୍ଟ କରାଇଲେ ।  ଆଉ ଏବେ ଓଏଏସ ପାଇବା ପରେ ହାତ ଛାଡି ଦେଲେ ଧପାବାଜ ଓଏଏସ ବାବୁ ।  ଏ ବାବଦରେ ପିଡିତା ଜଗତସିଂହପୁର ସଦର ଥାନାରେ ଏତଲା ଦେଇଥିଲେ। ପୋଲିସ ଏତଲାକୁ ଗ୍ରହଣ କରି ପଞ୍ଜିକୃତ କରିଥିଲେ ମଧ୍ୟ କୌଣସି ତଦନ୍ତ ଆଗକୁ ନେଉନଥିବାର ଅଭିଯୋଗ କରିଛନ୍ତି ପୀଡିତା।

ଅଭିଯୁକ୍ତ ଓଏଏସ ଅଫିସର ବାବୁ ଜଣକ ହେଲେ ଜଗତସିଂହପୁର ମାର୍କଣ୍ଡପୁର ଅଂଚଳର ଗଣେଶ୍ବର ହାନ୍ସଦାଙ୍କ ପୁଅ ଆଲବର୍ଟ ହାନ୍ସଦା । ସେ ଦୁଇମାସ ତଳେ ଓଏଏସ ପାଇଥିଲେ। ଏବେ ମୟୂରଭଞ୍ଜରେ ନେଉଛନ୍ତି ତାଲିମ୍ ।   ଏ ବାବଦରେ ଜଗତସିଂହପୁର ଥାନା ଅଧିକାରୀଙ୍କ ଦୃଷ୍ଟି ଆକର୍ଷଣ କରିବାରୁ ତଦନ୍ତ ଚାଲିଛି ବୋଲି  କହିଛନ୍ତି ପୋଲିସ୍। କିନ୍ତୁ ଅଭିଯୁକ୍ତ ଯୁବକଙ୍କ ସହ ଯୋଗାଯୋଗ ସମ୍ଭବ ହୋଇପାରିନାହିଁ । କିନ୍ତୁ ଏହି ବାବଦରେ ଅଭିଯୁକ୍ତ ଯୁବକଙ୍କ ବାପା ପୀଡିତାଙ୍କ ଅଭିଯୋଗକୁ ଖଣ୍ଡନ କରିଛନ୍ତି। ସେ କହିଛନ୍ତି ତାଙ୍କ ପୁଅ ନାଁରେ ମିଛ ଅଭିଯୋଗ କରାଯାଇଛି। ପୀଡିତା ସଂପର୍କରେ  ମୋ ଭାଣିଜୀ । ଘରେ ତାଙ୍କୁ ସାବତ ମାଆ ଓ ନିଶାସକ୍ତ ଅବସ୍ଥାରେ ରହୁଥିବା ବାପା ନିର୍ଯାତନା ଦେଉଥିଲେ।  ସେଥିପାଇଁ ସେ ଏବେ ଅସହାୟ ହୋଇ ପଡିଛନ୍ତି। ଆଉ ମୋ ପୁଅ ସହ ରହିବାକୁ ଏଭଳି ମିଥ୍ୟା ଅଭିଯୋଗ ଆଣିଛନ୍ତି।   

ତେବେ ଜଗତସିଂହପୁରରେ ରଶିକିଆ ଥାନା ଅଧିକାରୀ ଓ ହୋମଗାର୍ଡ ଙ୍କ ଲଭ ସେକ୍ସ ଧୋକା ପରେ ପୁଣି ରସିକିଆ ଓଏସ ବାବୁଙ୍କ ନାଁରେ ଏପରି ସଙ୍ଗିନ ଅଭିଯୋଗ ସାରା ଜିଲ୍ଲାରେ ସୃଷ୍ଟି କରିଛି ଆଲୋଡନ । ପୋଲିସ ଘଟଣାର ସଠିକ ତଦନ୍ତ କରିବା ସହ ସତ୍ୟାସତ୍ୟ ଅନୁଧ୍ୟାନ କରି ପିଡିତାଙ୍କୁ ତୁରନ୍ତ ନ୍ୟାୟ ପ୍ରଦାନ କରିବା ଜରୁରୀ ହୋଇ ପଡିଛି ।