ବଡ଼ ରେକର୍ଡ ! ଅଷ୍ଟମ ସପ୍ତାହର କଲେକ୍ସନରେ ପୁଷ୍ପା-୨କୁ ଟପିଲା ଏହି ଫିଲ୍ମ 

ମୁମ୍ବାଇ: ରାଜକୁମାର ରାଓ-ଶ୍ରଦ୍ଧା କପୁରଙ୍କ ସ୍ତ୍ରୀ- 2 ସର୍ବାଧିକ ଆୟକାରୀ ଫିଲ୍ମ ମଧ୍ୟରୁ ଗୋଟିଏ। ଏହା ସାରା ବିଶ୍ୱରେ ୮୫୭ କୋଟିରୁ ଅଧିକ ଆୟ କରିଥିଲା। କିନ୍ତୁ ଏବେ ପ୍ରଥମ ଦିନରେ କେବଳ ୨ ଲକ୍ଷ ଟଙ୍କା ରୋଜଗାର କରିଥିବା ଏକ ଗୁଜରାଟୀ ଫିଲ୍ମ, ସ୍ତ୍ରୀ- 2 ର ଆୟକୁ ପଛରେ ପକାଇ ଦେଇଛି। ଲାଲୋ: କୃଷ୍ଣ ସଦା ସହାୟତେ(Laalo: Krishna Sada Sahaayate) ନାମକ ଏହି ସିନେମା ମୁକ୍ତିଲାଭର ଅଷ୍ଟମ ସପ୍ତାହରେ ସବୁଠୁ ଅଧିକ ଆୟ କରିଥିବା ଫିଲ୍ମ ତାଲିକାର ଶୀର୍ଷରେ ପହଞ୍ଚିଛି ।  "ଲାଲୋ" ହେଉଛି ଗୁଜୁରାଟୀ ସିନେମା ଇତିହାସରେ ସର୍ବକାଳୀନ ସର୍ବାଧିକ ଆୟକାରୀ ଚଳଚ୍ଚିତ୍ର। ଯେତେବେଳେ ଏହି ଚଳଚ୍ଚିତ୍ରଟି ଅକ୍ଟୋବର ୧୦ ତାରିଖରେ ମୁକ୍ତିଲାଭ କରିଥିଲା, ସେତେବେଳେ ଏହା ମାତ୍ର ୨ ଲକ୍ଷ ଟଙ୍କା ରୋଜଗାର କରିଥିଲା। ହେଲେ ଦର୍ଶକୀୟ ଆଦୃତି ମିଳିବା ପରେ ଫିଲ୍ମଟି ଜବରଦସ୍ତ କଲେକ୍ସନ କରିଛି ।

ଏହି ଫିଲ୍ମ ୫୬ ଦିନ ପରେ ମଧ୍ୟ ଥିଏଟରରେ ଚାଲୁଛି। "ଲାଲୋ" ହେଉଛି ପ୍ରଥମ ଗୁଜୁରାଟୀ ଚଳଚ୍ଚିତ୍ର ଯାହା ବକ୍ସ ଅଫିସରେ ୧୦୦ କୋଟି ଟଙ୍କାରୁ ଅଧିକ ଆୟ କରିଛି। ଏହା ଘରୋଇ ସ୍ତରରେ ୧୦୩ କୋଟି ଟଙ୍କା ଆୟ କରିଛି । ବିଶ୍ୱବ୍ୟାପୀ, ଏହି ଆୟ ୧୦୯.୫ କୋଟି ଟଙ୍କା ଅତିକ୍ରମ କରିଛି।  ଏହି ଚଳଚ୍ଚିତ୍ରଟି ଗୋଟିଏ ପରେ ଗୋଟିଏ ରେକର୍ଡ ଭାଙ୍ଗି ଚାଲିଛି।  ଅଷ୍ଟମ ସପ୍ତାହରେ ଭାରତରେ ସର୍ବାଧିକ ଆୟ କରିଥିବା ଚଳଚ୍ଚିତ୍ର ବର୍ଗରେ ସାମିଲ ହୋଇଛି ଲାଲୋ। ରିପୋର୍ଟ ଅନୁଯାୟୀ, ଅଷ୍ଟମ ସପ୍ତାହରେ ଫିଲ୍ମ ୯.୦୫ କୋଟି ଆୟ କରିଛି। ପୂର୍ବରୁ, ଏହି ରେକର୍ଡ ସ୍ତ୍ରୀ-୨ ପାଖରେ ଥିଲା । ଫିଲ୍ମ ୪.୫୫ କୋଟି ଟଙ୍କା ଆୟ କରିଥିଲା । 

 'ଲାଲୋ' 'ଛାବା' ଏବଂ 'ପୁଷ୍ପା- 2'ର ଅଷ୍ଟମ ସପ୍ତାହର କଲେକ୍ସନକୁ ମଧ୍ୟ ପଛରେ ପକାଇ ଦେଇଛି। ଭିକି କୌଶଳଙ୍କ ଫିଲ୍ମ ୪.୧୦ କୋଟି ଟଙ୍କା ରୋଜଗାର କରିଥିଲା । ଆଲୁ ଅର୍ଜୁନଙ୍କ ସିନେମା ୨.୮୫  କୋଟି ଟଙ୍କା ଆୟ କରିଥିଲା। ଉଲ୍ଲେଖନୀୟ ଯେ, 'ସ୍ତ୍ରୀ 2', 'ଛାବା' ଏବଂ 'ପୁଷ୍ପା 2' ଦେଶର ସର୍ବାଧିକ ଆୟକାରୀ ଫିଲ୍ମ ମଧ୍ୟରେ ଅନ୍ତର୍ଭୁକ୍ତ। ତେଣୁ, ଏହି ଗୁଜରାଟୀ ଫିଲ୍ମ ସେମାନଙ୍କର ରେକର୍ଡ ଭାଙ୍ଗିବା ପ୍ରକୃତରେ ଆଶ୍ଚର୍ଯ୍ୟଜନକ। ଲାଲୋ ମାତ୍ର ୫୦ ଲକ୍ଷ ଟଙ୍କାରେ ନିର୍ମିତ ହୋଇଥିଲା । କିନ୍ତୁ ଏହା ବକ୍ସ ଅଫିସରେ ୧୦୯.୫ କୋଟି ଟଙ୍କା ଆୟ କରିସାରିଛି । ଏହାର ବଜେଟର ୨୧,୮୦୦ ପ୍ରତିଶତ ଲାଭ ବୋଲି ଅନୁମାନ କରାଯାଉଛି । ପୂର୍ବରୁ, ସର୍ବାଧିକ ଆୟକାରୀ ଗୁଜୁରାଟୀ ଫିଲ୍ମର ରେକର୍ଡ "ଚାଲ ଜୀବି ଲାଇୟେ" ନାମରେ ଥିଲା, ଏହା ପ୍ରାୟ ୫୦ କୋଟି ଟଙ୍କା ଆୟ କରିଥିଲା। "ଲାଲୋ"ର ନିର୍ଦ୍ଦେଶନା ଦେଇଛନ୍ତି ଅଙ୍କିତ ସାଖିୟା ଏବଂ ଏଥିରେ କରଣ ଜୋଶୀ, ରିଭା ରାଛ, ଶ୍ରୁହଦ ଗୋସ୍ୱାମୀ, ଅଂଶୁ ଜୋଶୀ ଏବଂ ପାରୁଲ ରାଜଗୁରୁ ପ୍ରମୁଖ ଅଭିନୟ କରିଛନ୍ତି।