ପୋଲିସ SI ପରୀକ୍ଷା କେଳେଙ୍କାରୀ ମାମଲାର ସିବିଆଇ ତଦନ୍ତ, ଗ୍ରାଉଣ୍ଡ ଜିରୋରୁ ତନାଘନା ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ

ଭୁବନେଶ୍ବର ୧୫।୧୧: ପୋଲିସ ଏସ୍‌ଆଇ ନିଯୁକ୍ତି ପରୀକ୍ଷା କେଳେଙ୍କାରୀ ମାମଲା ତଦନ୍ତ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସିବିଆଇକୁ ହସ୍ତାନ୍ତର କରିବା ପରେ ଭୁବନେଶ୍ୱର ପହଞ୍ଚିଛନ୍ତି ସିବିଆଇର ଯୁଗ୍ମ ନିର୍ଦ୍ଦେଶକ ଅନୁରାଗ କୁମାର । ସମସ୍ତ ନଥିପତ୍ର ଯାଞ୍ଚ କରିବା ସହିତ ତନାଘନା ଆରମ୍ଭ କରିଛନ୍ତି । ଗ୍ରାଉଣ୍ଡ ଜିରୋରୁ ତଦନ୍ତ କରିବା ସହ ଅନୁରାଗ କୁମାରଙ୍କ ଅଧ୍ୟକ୍ଷତାରେ ବ୍ଲୁପ୍ରିଣ୍ଟ ପ୍ରସ୍ତୁତ ହୋଇଛି । ଅନୁରାଗ କାହାକୁ ଟିମ୍‌ରେ ସାମିଲ କରିବେ ଆଉ କାହାକୁ ବାଦ୍ ଦେବେ ତାକୁ ନେଇ ବଡ଼ ସସ୍‌ପେନ୍ସ ଥିଲା । ତେବେ ଶନିବାର ଠାରୁ ଟିମ୍‌ ପ୍ରସ୍ତୁତ କରିବା ସହିତ କେଉଁଠୁ ତଦନ୍ତ ଆରମ୍ଭ କରିବେ ସେ ନେଇ ପ୍ଲାନ୍ ପ୍ରସ୍ତୁତ କରିଛି ପୁରା ଟିମ୍ । ଆଉ ଯାହାର ମଙ୍ଗ ଧରିବେ ଅନୁରାଗ କୁମାର ।

ତେବେ ଯୁଗ୍ମ ନିର୍ଦ୍ଦେଶକ ଅନୁରାଗ କୁମାର ଭୁବନେଶ୍ୱର ଅଫିସ୍‌ରେ ପହଞ୍ଚିବା ପରେ ଚଳଚଞ୍ଚଳ ହୋଇପଡିଥିଲା ସିବିଆଇ ଅଫି । ଉପରିସ୍ଥ ଅଫିସର ମାନଙ୍କୁ ଡ଼କାଇବା ସହ କ’ଣ ତଦନ୍ତ ହୋଇଛି, କାହାର ହାତ ରହିଛି, କିଏ ଦେଉଥିଲା ସୁରକ୍ଷା, ସତରେ ରହିଛି କି ପୂର୍ବ ସରକାର ସମୟର ଭାନୁମତି ପେଡି ଏସବୁକୁ ବର୍ତ୍ତମାନ ଘଣ୍ଟୁଛି  ସିବିଆଇ । ତେବେ ବନ୍ଧା ହୋଇଥିବା ଅଭିଯୁକ୍ତଙ୍କ ତାଲିକା ପ୍ରସ୍ତୁତ କରିବା ସହ ସ୍କାମ୍‌ରେ ସମ୍ପୃକ୍ତି ଥିବା ଦଲାଲ ଓ ସହଯୋଗୀଙ୍କୁ ଭେଟିବାକୁ ଯାଇ ଜେଲ୍‌ରେ ପଚରା ଉଚରା କରିପାରେ ସିବିଆଇ । ଏ ନେଇ ବଡ଼ ସୁରାକ ମିଳିଛି ବୋଲି ମଧ୍ୟ କୁହାଯାଉଛି । ଏତଲା କପିରେ ଏ ସ୍କାମ ପଛରେ କିଏ ଥିଲେ, କିଏ ଖେଳୁଥିଲା ମାଷ୍ଟର ପ୍ଲାନ୍ ତାହା ଦେଖିବାକୁ ମିଳିଛି । କ’ଣ ଦଫା ଲଗାଯାଇଛି ? କାହାକୁ ମିଳିଛି ସର୍ତ୍ତମୂଳକ ଜାମିନ ତାହାର ବି ଖୋଲତାଡ଼ କରୁଛି ଟିମ୍ । ତେବେ ଜେଲ୍ ଯିବା ବେଳେ ଶଙ୍କର ପୃଷ୍ଟି ଦେଇଥିବା ବୟାନରେ କେତେ ସତ୍ୟତା ରହିଛି ତାକୁ ଖୋଜିବା ସହ ସମସ୍ତ ଅଭିଯୁକ୍ତକୁ ବାନ୍ଧିବାକୁ ଯୋଜନା ରଖିଛି ସିବିଆଇ ।