ରୋହିତ-ବିରାଟଙ୍କ ପାଇଁ ଆସନ୍ତା ବର୍ଷ ବଢିବ ମୁସ୍କିଲ, ଗିଲ୍‌ଙ୍କ ବୟାନ ବଢାଇଲା ଚିନ୍ତା !

ନୂଆଦିଲ୍ଲୀ: ରୋହିତ ଶର୍ମା ଓ ବିରାଟ କୋହଲି ଶନିବାର ଅଷ୍ଟ୍ରେଲିଆ ବିପକ୍ଷ ଶେଷ ଦିନିକିଆରେ ଦମଦାର ବ୍ୟାଟିଂ କରି ସମାଲୋଚକଙ୍କୁ ଉଚିତ୍ ଜବାବ ଦେଇଛନ୍ତି। ଏହା ସହ ଦୁଇ ତାରକା ବ୍ୟାଟର ସଙ୍କେତ ଦେଇଛନ୍ତି ଯେ, ସେମାନଙ୍କ ନିକଟରେ ଆହୁରି କ୍ରିକେଟ୍ ଖେଳ ବାକି ରହିଛି। ଏମିତିରେ ଭାରତୀୟ ଅଧିନାୟକ ଶୁଭମନ ଗିଲ୍ ମ୍ୟାଚ୍ ପରେ ସାମ୍ବାଦିକ ସମ୍ମିଳନୀରେ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଆଗାମୀ ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ୍ ପରେ ନିଷ୍ପତ୍ତି ନିଆଯିବ ଯେ, ଦୁଇ ବରିଷ୍ଠ କ୍ରିକେଟରଙ୍କୁ ଲଗାତାର କ୍ରିକେଟ୍ ଖେଳିବା ପାଇଁ କେମିତି ସୁଯୋଗ ଦିଆଯିବ।

କୋହଲି ଓ ରୋହିତ ଶେଷ ଦିନିକିଆରେ କ୍ରମଶଃ  ଅପରାଜିତ ୭୪ ରନ ଓ ୧୨୧ ରନର ଦମଦାର ଇନିଂସ ଖେଳିଛନ୍ତି।ଗିଲ୍‌ଙ୍କୁ ପ୍ରଶ୍ନ ହୋଇଥିଲା ଯେ, କଣ ଏହି ଦୁଇ ଖେଳାଳିଙ୍କ ସହିତ ଦକ୍ଷିଣ ଆଫ୍ରିକା ବିପକ୍ଷ ଓ ନ୍ୟୁଜିଲାଣ୍ଡ ବିପକ୍ଷ ଦିନିକିଆ ସିରିଜ୍ ପାଇଁ ଆଲୋଚନା କରିଛନ୍ତି।  ଗିଲ୍ କହିଛନ୍ତି ଏହି ବିଷୟରେ ଏବେ ଆଲୋଚନା ହୋଇନୁ। ମାତ୍ର ମୋତେ ଲାଗୁଛି ଦକ୍ଷିଣ ଆଫ୍ରିକା ସିରିଜ ଡିସେମ୍ବର ୬ରେ ସରିବା ପରେ ଜାନୁଆରୀ ୧୧ରେ ନ୍ୟୁଜିଲାଣ୍ଡ ବିପକ୍ଷରେ ସିରିଜ୍ ଖେଳାଯିବ। ଏହି ଦୁଇ ସିରିଜ ମଧ୍ୟରେ ଏକ ସମୟ ବ୍ୟବଧାନ ରହିଛି। ଏହି ସମୟରେ ଆମେ ଦେଖିବୁ ଦୁଇ ଖେଳାଳିଙ୍କୁ କେମିତି ଖେଳିବାକୁ ଅଧିକ ସୁଯୋଗ ମିଳିବ।

ଗିଲ୍ କହିଛନ୍ତି, ଏହି ସିଜିନରେ କେବଳ ଆଉ ଛଅଟି ଦିନିକିଆ ମ୍ୟାଚ୍ ରହିଛି। ଏଥିପାଇଁ ସେମାନଙ୍କ ପାଇଁ ଲଗାତାର  ମ୍ୟାଚ୍ ଖେଳିବା ଏକ ବଡ଼ ପ୍ରସଙ୍ଗ। ରୋହିତ  ଓ କୋହଲିଙ୍କ ପରବର୍ତ୍ତୀ ଅନ୍ତର୍ଜାତୀୟ ମ୍ୟାଚ୍ ନଭେମ୍ବର ୩୦ରୁ ରହିଛି। ଦଳ ଦକ୍ଷିଣ ଆଫ୍ରିକା ବିପକ୍ଷରେ ତିନୋଟି ଦିନିକିଆ ଖେଳିବ। ଏହା ପରେ ଜାନୁଆରୀ ୧୧ରେ ନ୍ୟୁଜିଲାଣ୍ଡ ବିପକ୍ଷରେ ଘରୋଇ ମାଟିରେ ଭାରତ ୩ଟି ଦିନିକିଆ ମ୍ୟାଚ୍ ଖେଳିବ। ତେବେ ଦକ୍ଷିଣ ଆଫ୍ରିକା  ଓ ନ୍ୟୁଜିଲାଣ୍ଡ ସିରିଜ୍ ମଝିରେ ଦୁଇ ଖେଳାଳି ନିଜ ନିଜର ଦଳ  ପକ୍ଷରୁ ବିଜୟ ହଜାରେ ଟ୍ରଫିରେ କିଛି ମ୍ୟାଚ୍ ଖେଳିବେ ବୋଲି ଆଶା କରାଯାଉଛି।

ଗିଲ୍ ପରି ଯୁବ ଅଧିନାୟକଙ୍କ ପାଇଁ ୩୮ ବର୍ଷୀୟ ରୋହିତ ଓ ୩୬ ବର୍ଷୀୟ କୋହଲିଙ୍କୁ ଲକ୍ଷ୍ୟର ପିଛା କରି ଦମଦାର ଇନିଂସ ଖେଳିବାର ଦୃଶ୍ୟ ଦେଖିବା ବେଶ ଆନନ୍ଦ ଦେଇଥିବ। ସେ କହିଛନ୍ତି ଦୁଇ ତାରକା ଖେଳାଳି ଗତ ୧୫ ବର୍ଷ ଧରି ଏମିତି କରି ଆସୁଛନ୍ତି। ସେମାନଙ୍କୁ ଏମିତି ଖେଳୁଥିବା ଏବଂ ଦେଖିବା ବାସ୍ତବରେ ସୁଖଦ ଅନୁଭବ ଥିଲା। ଦୁଇ ମହାନ ଖେଳାଳିଙ୍କ ପ୍ରଦର୍ଶନକୁ ନେଇ ତାଙ୍କ ମନରେ କୌଣସି ସନ୍ଦେହ ନ ଥିଲା। ଏହି ଦୁଇ ଖେଳାଳିଙ୍କ ବ୍ୟାଟିଂ ଦେଖି ବଡ଼ ହୋଇଛି। ତେଣୁ ଆଗକୁ ଦେଖିବା ଦୁଇ ଖେଳାଳି କେତେ ସକ୍ରିୟ କ୍ରିକେଟ୍ ଖେଳୁଛନ୍ତି। ​​​​​​​