ମୁମ୍ବାଇ: ବୋଲର ଓ ବ୍ୟାଟରଙ୍କ ଦମଦାର ପ୍ରଦର୍ଶନ ବଳରେ ମୁମ୍ବାଇ ଇଣ୍ଡିଆନ୍ସ ଆଇପିଏଲ୍ ୨୦୨୫ର ୩୩ତମ ମ୍ୟାଚ୍ରେ ସନରାଇଜର୍ସ ହାଇଦ୍ରାବାଦକୁ ୪ ଓ୍ଵିକେଟ୍ରେ ହରାଇଛି। ପ୍ରଥମେ ବ୍ୟାଟିଂ କରିଥିବା ହାଇଦ୍ରାବାଦ ୫ ଓ୍ଵିକେଟ୍ ହରାଇ ୧୬୨ ରନ କରିଥିଲା। ଦଳ ପକ୍ଷରୁ ଅଭିଷେକ ଶର୍ମା ସର୍ବାଧିକ ୪୦ ରନ ଓ ହେନରିକ କ୍ଲାସେନ ୩୭ ରନ କରିଥିଲେ। ଜବାବରେ ମୁମ୍ବାଇ ୧୮.୧ ଓଭରରେ ୬ ଓ୍ଵିକେଟ୍ ହରାଇ ବିଜୟ ଲକ୍ଷ୍ୟ ହାସଲ କରି ନେଇଛି। ଓ୍ଵିଲ ଜ୍ୟାକ୍ସ ବୋଲିଂରେ ୨ ଓ୍ଵିକେଟ୍ ଓ ବ୍ୟାଟିଂରେ ୩୬ ରନ କରି ଦଳ ବିଜୟରେ ମୁଖ୍ୟ ଭୂମିକା ଗ୍ରହଣ କରିଛନ୍ତି। ମୁମ୍ବାଇ ସପ୍ତମ ମ୍ୟାଚ୍ରୁ ତୃତୀୟ ବିଜୟ ହାସଲ କରିଥିବା ବେଳେ ହାଇଦ୍ରାବାଦ ପଞ୍ଚମ ପରାଜୟ ଭୋଗିଛି।
Also read: Neeraj Chopra: ଦକ୍ଷିଣ ଆଫ୍ରିକାରେ ଚମକିଲେ ଭାରତର ସୁନା ପୁଅ, ୮୪.୫୨ମି. ଥ୍ରୋ ସହ ଜବରଦସ୍ତ କମ୍ବ୍ୟାକ୍
୧୬୩ ରନର ବିଜୟ ଲକ୍ଷ୍ୟ ପିଛା କରିଥିବା ମୁମ୍ବାଇର ଦୁଇ ଓପନର ରୋହିତ ଶର୍ମା ଓ ରିୟାନ ରିକଲଟନ ୩୨ ରନ ଯୋଡ଼ିଥିଲେ। ରୋହିତ ଶର୍ମା ୨୬ ରନ କରି ଆଉଟ୍ ହୋଇଥିଲେ। ରିୟାନ ରିକଲଟନ ୩୧ ରନର ଯୋଗଦାନ ଦେଇଥିଲେ। ଏହା ପରେ ଓ୍ଵିଲ ଜ୍ୟାକ୍ସ ଓ ସୂର୍ଯକୁମାର ଯାଦବ ତୃତୀୟ ଓ୍ଵିକେଟ୍ ପାଇଁ ୫୨ ରନ ଯୋଡ଼ି ଦଳର ବିଜୟ ନିଶ୍ଚିତ କରିଥିଲେ। ୧୨୧ ରନ ସ୍କୋରରେ ସୂର୍ଯ୍ୟକୁମାର ଯାଦବ ବ୍ୟକ୍ତିଗତ ୨୬ ରନ କରି ଆଉଟ୍ ହୋଇଥିଲେ। ତାଙ୍କ ପରେ ଓ୍ଵିଲ ଜ୍ୟାକ୍ସ ୩୬ ରନ କରି ପାଭିଲିୟନ ଫେରିଥିଲେ ହେଁ ଦଳ ବିଜୟରେ ପ୍ରମୁଖ ଯୋଗଦାନ ଦେଇଥିଲେ।
ହାର୍ଦ୍ଦିକ ପାଣ୍ଡ୍ୟା ଛକା ମାରି ଦଳକୁ ଜିତାଇବା ଉଦ୍ୟମରେ କ୍ୟାଚ୍ ଆଉଟ୍ ହୋଇଥିଲେ। ହେଲେ ସେ ୯ ବଲ୍ରୁ ୨୧ ରନର ବିସ୍ଫୋରକ ଇନିଂସ ଖେଳିଥିଲେ। ହାଇଦ୍ରାବାଦକୁ ଶେଷ ଆଡ଼କୁ ୩ ସଫଳତା ମିଳିଥିଲେ ହେଁ ସେତେବେଳକୁ ବହୁତ ବିଳମ୍ବ ହୋଇ ସାରିଥିଲା। ତିଳକ ବର୍ମା ବିଜୟ ସୂଚକ ଚୌକା ମାରି ମୁମ୍ବାଇ ବିଜୟର ଔପଚାରିକତା ପୂରଣ କରିଥିଲେ। ମୁମ୍ବାଇ ୧୮.୧ ଓଭରରେ ୬ ଓ୍ଵିକେଟ୍ ହରାଇ ସହଜରେ ମ୍ୟାଚ୍କୁ ଜିତି ନେଇଛି। ବୋଲିଂରେ ହାଇଦ୍ରାବାଦ ପକ୍ଷରୁ ଅଧିନାୟକ ପାଟ୍ କମିନ୍ସ ୨୬ ରନ ଦେଇ ୩ ଓ୍ଵିକେଟ୍ ଅକ୍ତିକାର କରିଛନ୍ତି। ଇଶାନ ମାଲିଙ୍ଗାଙ୍କୁ ୨ଟି ଓ୍ଵିକେଟ୍ ମିଳିଛି।
