ବିହାର ନିର୍ବାଚନରେ ବିଶ୍ୱ ବ୍ୟାଙ୍କ ଦେଇଥିବା ୧୪,୦୦୦ କୋଟି ପାଣ୍ଠିର ଦୁରୁପ ଯୋଗ ହୋଇଛି: ଜନ ସୁରାଜ ପାର୍ଟି

ପାଟନା:ବିହାର ନିର୍ବାଚନ ଶେଷ ହେବା ପରେ ବିରୋଧୀ ଦଳମାନଙ୍କର ଗୋଟିଏ ପରେ ଗୋଟିଏ ବଡ଼ ଅଭିଯୋଗ ସାମ୍ନାକୁ ଆସୁଛି। ପ୍ରଶାନ୍ତ କିଶୋରଙ୍କ ଜନ ସୁରାଜ ପାର୍ଟି ବିହାର ନୀତୀଶ ସରକାରଙ୍କର ବିରୁଦ୍ଧରେ ଏକ ବଡ଼ ଅଭିଯୋଗ ଆଣିଛି।ବିକାଶ ପ୍ରକଳ୍ପ ପାଇଁ ବିଶ୍ୱ ବ୍ୟାଙ୍କ ଦେଇଥିବା ୧୪,୦୦୦ କୋଟି ଟଙ୍କାକୁ ନୀତୀଶ ସରକାର ଦୁରୁପ ଯୋଗ କରିଛନ୍ତି। ବିହାର ବିଧାନସଭା ନିର୍ବାଚନ ପୂର୍ବରୁ ମହିଳାମାନଙ୍କୁ ଯେଉଁ ୧୦,୦୦୦ ଟଙ୍କା ନଗଦ ହସ୍ତାନ୍ତର କରାଯାଇଥିଲା ତାହା ଏହି ଟଙ୍କାରୁ ଦିଆଯାଇଥିଲା।ଏଥିପାଇଁ ନିର୍ବାଚନ ପ୍ରଭାବିତ ହେଲା ବୋଲି ଦଳ ଅଭିଯୋଗ କରିଛି।

ଦଳ ଅଭିଯୋଗ କରି କହିଛି ଯେ ଏହା ଲୋକଙ୍କ ଟଙ୍କାର ସ୍ପଷ୍ଟ ଅପବ୍ୟବହାର ଏବଂ ନିର୍ବାଚନ ପ୍ରକ୍ରିୟାକୁ ପ୍ରଭାବିତ କରିବାର ଏକ ଅନୈତିକ ପ୍ରୟାସ କରାଯାଇଛି। ତେଣୁ ଏହାର ପୁଙ୍ଖାନୁପୁଙ୍ଖ ତଦନ୍ତ ହେଉ ବୋଲି ଦଳ ଦାବି କରିଛି।

ନିର୍ବାଚନ ପୂର୍ବରୁ ନୀତିଶ କୁମାରଙ୍କ ସରକାର ମୁଖ୍ୟମନ୍ତ୍ରୀ ମହିଳା ରୋଜଗାର ଯୋଜନା ଅଧୀନରେ ୧.୨୫ କୋଟି ମହିଳା ଭୋଟରଙ୍କ ଆକାଉଣ୍ଟକୁ ୧୦,୦୦୦ ଟଙ୍କା ସ୍ଥାନାନ୍ତର କରିଥିଲେ।ଏହା ହିଁ ବିହାରରେ ଏନ୍ଡିଏ ସରକାରକୁ ଏଭଳି ବଡ଼ ବିଜୟ ଦେଇଥିଲା ବୋଲି ଅନେକ ରାଜନୈତିକ ବିଶ୍ଳେଷକ କହିଛନ୍ତି।

ଶନିବାର ଏନେଇ ଏକ ସାମ୍ବାଦିକ ସମ୍ମିଳନୀ କରି ଜନ ସୁରାଜ ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ଉଦୟ ସିଂହ କହିଛନ୍ତି“ଏହି ନିର୍ବାଚନର ଫଳାଫଳକୁ ପ୍ରଭାବଶାଳୀ ଭାବରେ କିଣାଯାଇଛି। ଜୁନ୍ ୨୧ତାରିଖରୁ ଭୋଟ୍ ଦିନ ପର୍ଯ୍ୟନ୍ତ,ଏହି ଜନାଦେଶକୁ ସୁରକ୍ଷିତ ରଖିବା ପାଇଁ ପ୍ରାୟ ୪୦,୦୦୦କୋଟି ଟଙ୍କା ଖର୍ଚ୍ଚ କରାଯାଇଥିଲା। ସାଧାରଣ ଲୋକଙ୍କ ଟଙ୍କା ବ୍ୟବହାର କରି,ସେମାନେ ମୂଳତଃ ଲୋକଙ୍କ ଭୋଟ୍ କିଣିଥିଲେ। ମୁଁ ଏହା ମଧ୍ୟ ଜାଣିବାକୁ ପାଇଛି ଯେ ବିଶ୍ୱ ବ୍ୟାଙ୍କରୁ ପ୍ରାପ୍ତ ପାଣ୍ଠିକୁ ଲୋକଙ୍କ ଆକାଉଣ୍ଟରେ ନଗଦ ସ୍ଥାନାନ୍ତର ପାଇଁ ବ୍ୟବହାର କରାଯାଇଥିଲା।”

ଜେଏସ୍ପି ନେତା ଆହୁରି ଦାବି କରିଛନ୍ତି ଯେ ବିହାରର ଅର୍ଥନୀତି ଏତେ ବିପୁଳ ପରିମାଣର ଟଙ୍କା ପୁନରୁଦ୍ଧାର କରିବାକୁ ସକ୍ଷମ ନୁହେଁ।ଏବଂ ସରକାର କ୍ଷମତାକୁ ଆସିବା ପରେ ଜନକଲ୍ୟାଣ ପାଇଁ ଖର୍ଚ୍ଚ କରିବା ପାଇଁ ଏବେ ଆଉ କିଛି ଟଙ୍କା ବାକି ନାହିଁ। ରାଜ୍ୟ ରାଜକୋଷ ଏବେ ଖାଲି ପଡ଼ିଛି ବୋଲି ଦଳର ପ୍ରବକ୍ତା ପବନ ବର୍ମା ଦାବି କରିଛନ୍ତି।

ସେ କହିଛନ୍ତି“ଆମ ପାଖରେ ସୂଚନା ଅଛି,ଏହା ଭୁଲ ବି ହୋଇପାରେ ଯେ ରାଜ୍ୟର ମହିଳାମାନଙ୍କୁ ଦିଆଯାଇଥିବା ୧୦,୦୦୦ ଟଙ୍କା ଅନ୍ୟ ଡେଭଲପ ପ୍ରକଳ୍ପ ପାଇଁ ବିଶ୍ୱ ବ୍ୟାଙ୍କରୁ ଆସିଥିବା ୨୧,୦୦୦ କୋଟି ଟଙ୍କାରୁ ଦିଆଯାଇଥିଲା। ନିର୍ବାଚନ ପାଇଁ ଆଚରଣ ସଂହିତା ଲାଗୁ ହେବାର ଗୋଟିଏ ଘଣ୍ଟା ପୂର୍ବରୁ,୧୪,୦୦୦ କୋଟି ଟଙ୍କା ବାହାର କରି ରାଜ୍ୟର ୧.୨୫ କୋଟି ମହିଳାଙ୍କୁ ବଣ୍ଟନ କରାଯାଇଥିଲା।”

ସେ ଆହୁରି ମଧ୍ୟ କହିଛନ୍ତି, "ଯଦି ଏହା ସତ,ତେବେ ପ୍ରଶ୍ନ ଉଠୁଛି ଯେ ଏହା କେତେଦୂର ନୀତିଗତ। ଏହା ସମ୍ଭବ ଯେ,ଆଇନଗତ ଭାବରେ,ଆପଣ କିଛି କରିପାରିବେ ନାହିଁ। ସରକାର ପାଣ୍ଠିକୁ ଅନ୍ୟତ୍ର ପଠାଇପାରନ୍ତି ଏବଂ ପରେ ସ୍ପଷ୍ଟୀକରଣ ଦେଇପାରନ୍ତି। ନିର୍ବାଚନ ପରେ ସ୍ପଷ୍ଟୀକରଣ ଆସିବ। ପଶ୍ଚିମବଙ୍ଗ,ତାମିଲନାଡୁ ଏବଂ ଅନ୍ୟ ବିଜେପି ଶାସିତ ରାଜ୍ୟରେ ଆଗାମୀ ନିର୍ବାଚନ ଅଛି। ଆପଣ ପ୍ରତିଶ୍ରୁତି ଦେଲେ କ’ଣ ହେବ,ଅନ୍ୟ ଦଳ ଟଙ୍କା ଦେଉଛନ୍ତି,ଯାହା ଭୋଟରଙ୍କୁ ଭିନ୍ନ ଭାବରେ ପ୍ରଭାବିତ କରୁଛି।"

ବିହାର ଦୁଃସ୍ଥିତି ସମ୍ପର୍କରେ ଦର୍ଶାଇ ବର୍ମା କହିଛନ୍ତି ଯେ ବିହାରର ସାର୍ବଜନୀନ ଋଣ ବର୍ତ୍ତମାନ ୪.୦୬ ଲକ୍ଷ କୋଟି ଟଙ୍କା ହୋଇଛି।ଦୈନିକ ୬୩ କୋଟି ଟଙ୍କା ସୁଧ ବୋଝ ରହିଛି। ତେଣୁ ବର୍ତ୍ତମାନ ରାଜ୍ୟ ରାଜକୋଷ ଖାଲି ପଡ଼ିଛି ବୋଲି ସେ କହିଛନ୍ତି।

ସୂଚନା ଥାଉକି ନଭେମ୍ବର ୧୪ ତାରିଖରେ ବିହାର ନିର୍ବାଚନ ଫଳାଫଳ ଘୋଷଣା ପରେ ପ୍ରଶାନ୍ତ କିଶୋରଙ୍କର ନବଗଠିତ ଜନସୁରାଜ ପାର୍ଟି ଗୋଟିଏ ବି ଆସନ ଜିତାପାରି ନଥିଲା। ଦଳ ୨୩୮ ଆସନରେ ଲଢ଼ିଥିଲେ ବି କୌଣସି ପ୍ରାର୍ଥୀ ଭୋଟରଙ୍କ ମନ ଆକର୍ଷିତ କରିପାରି ନଥିଲେ। ଅନ୍ୟପଟେ ନୀତୀଶ ନେତୃତ୍ୱରେ ଏନ୍ଡିଏ ୨୦୨ଟି ଆସନ ଜିତିଥିଲା। ଯେଉଁଥିରେ ବିଜେପି ୮୯ ଟି ଓ ଜେଡିୟୁ ୮୫ଟି ଆସନ ପାଇଥିଲେ। ସେହିପରି ଚିରାଗ ପାଶୱାନଙ୍କ ଏଲଜେପି ମଧ୍ୟ ଭଲ ପ୍ରଦର୍ଶନ କରିଥିଲା।

ଅନ୍ୟପଟେ ଆର୍ଜେଡି ଓ କଂଗ୍ରେସର ମହାଗଠବନ୍ଧନ ଭୟଙ୍କର ବିପର୍ଯ୍ୟୟର ସାମ୍ନା କରିଥିଲା। ଆର୍ଜେଡି ୨୫ ଆସନ ଜିତିଥିବା ବେଳେ କଂଗ୍ରେସ ମାତ୍ର ୬ଟି ଆସନରେ ସୀମିତ ରହିଥିଲା।