ଆସାମରେ ବହୁବିବାହ ବ୍ୟାନ: ବିଧାନସଭାରେ ବିଲ୍ ପାରିତ, ସିଏମ୍ ହିମନ୍ତ କହିଲେ-ଜିତିଲେ ୟୁସିସି ଲାଗୁ କରିବୁ

ନୂଆଦିଲ୍ଲୀ: ଆସାମ ବିଧାନସଭା ଗୁରୁବାର ବହୁବିବାହକୁ ନିଷିଦ୍ଧ କରିବା ପାଇଁ ଏକ ଐତିହାସିକ ବିଲ୍ ପାସ୍ କରିଛି । ଏହି ବିଲ୍ ପାସ୍ ହେବା ସହିତ ବହୁବିବାହକୁ ଏଣିକି ଏକ ଅପରାଧ ଅପରାଧ ଭାବେ ଗ୍ରହଣ କରାଯିବ । ଦୋଷୀ ସାବ୍ୟସ୍ତ ହେଲେ ସର୍ବାଧିକ ୧୦ ବର୍ଷ ଜେଲଦଣ୍ଡ ହେବ । ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଏହାକୁ ମହିଳା ସଶକ୍ତିକରଣ ଦିଗରେ ଏକ ଐତିହାସିକ ପଦକ୍ଷେପ ବୋଲି କହିଛନ୍ତି । ସେ ପ୍ରତିଶ୍ରୁତି ଦେଇଛନ୍ତି ଯେ ଯଦି ସେ ପୁନଃନିର୍ବାଚିତ ହୁଅନ୍ତି, ତେବେ ରାଜ୍ୟରେ ସମାନ ନାଗରିକ ସଂହିତା (UCC) ଲାଗୁ କରାଯିବ ।

ଗୁରୁବାର ଗୃହୀତ ହୋଇଥିବା ବିଲ୍ ସ୍ପଷ୍ଟ କରିଛି ଯେ ଏହି ଆଇନ ସମସ୍ତ ସମ୍ପ୍ରଦାୟ ପାଇଁ ଲାଗୁ ହେବ । ତେବେ ଅନୁସୂଚିତ ଜନଜାତି (ST) ଏବଂ ଷଷ୍ଠ ଅନୁସୂଚୀ କ୍ଷେତ୍ରଗୁଡ଼ିକୁ ବାଦ ଦିଆଯାଇଛି । ମୁଖ୍ୟମନ୍ତ୍ରୀ ଶର୍ମା ସ୍ପଷ୍ଟ ଭାବରେ କହିଛନ୍ତି ଯେ ଏହି ବିଲ୍ କୌଣସି ନିର୍ଦ୍ଦିଷ୍ଟ ଧର୍ମ ବିରୁଦ୍ଧରେ ନୁହେଁ ଏବଂ ସମସ୍ତ ସମାଜରେ ମହିଳାମାନଙ୍କର ସମାନତା ଏବଂ ସୁରକ୍ଷା ସୁନିଶ୍ଚିତ କରିବା ପାଇଁ ଲକ୍ଷ୍ୟ ରଖିଛି ।

ମୁଖ୍ୟମନ୍ତ୍ରୀ କହିଛନ୍ତି, ବହୁବିବାହ କେବଳ ମୁସଲିମ ସମ୍ପ୍ରଦାୟ ମଧ୍ୟରେ ସୀମିତ ନୁହେଁ । ଏପରି ମାମଲା ହିନ୍ଦୁ ସମାଜରେ ମଧ୍ୟ ଦେଖାଯାଏ ଏବଂ ଆଇନ ସମସ୍ତଙ୍କ ପାଇଁ ସମାନ ଭାବରେ ଲାଗୁ ହେବ । ସେ ଆହୁରି ମଧ୍ୟ କହିଛନ୍ତି ଯେ ଏହାକୁ ଇସଲାମ ବିରୋଧୀ ବିଲ୍ ବୋଲି କୁହାଯାଉଥିବା ଧାରଣା ଭୁଲ ।

ମୁଖ୍ୟମନ୍ତ୍ରୀ ବିରୋଧୀ ଦଳଗୁଡ଼ିକୁ ସଂଶୋଧନ ପ୍ରସ୍ତାବ ପ୍ରତ୍ୟାହାର କରିବାକୁ ଅନୁରୋଧ କରିଥିଲେ । ସରକାରଙ୍କ ଆବେଦନ ସତ୍ତ୍ୱେ, AIUDF ଏବଂ CPI(M) ସେମାନଙ୍କର ସଂଶୋଧନ ପ୍ରସ୍ତାବ ପ୍ରତ୍ୟାହାର କରିନଥିଲେ । ଭୋଟ ସମୟରେ ସେମାନଙ୍କର ପ୍ରସ୍ତାବଗୁଡ଼ିକ ଧ୍ୱନି ମତରେ କାଟ୍ ଖାଇଥିଲା । ସରକାର ଏହାକୁ ମହିଳାଙ୍କ ସ୍ୱାର୍ଥରେ ଏକ ସାମାଜିକ ସଂସ୍କାର ଭାବରେ ବର୍ଣ୍ଣନା କରିଥିଲେ । ଅନ୍ୟପଟେ ବିରୋଧୀ କିଛି ବ୍ୟବସ୍ଥା ଉପରେ ପ୍ରଶ୍ନ ଉଠାଇଥିଲେ ।

ୟୁସିସି କାର୍ଯ୍ୟକାରୀ କରିବା ପ୍ରତିଶ୍ରୁତି ଦେଇ ଶାର୍ମା ଗୃହରେ ଘୋଷଣା କରିଥିଲେ ଯେ ଯଦି ସେ ଆସନ୍ତା ବର୍ଷର ପୁଣି ଥରେ ମୁଖ୍ୟମନ୍ତ୍ରୀ ହୁଅନ୍ତି, ତେବେ କାର୍ଯ୍ୟକାଳର ପ୍ରଥମ ଅଧିବେଶନରେ ବିଲ୍ ଆଗତ କରାଯିବ ଏବଂ କାର୍ଯ୍ୟକାରୀ କରାଯିବ । ସେ କହିଛନ୍ତି ଯେ ବହୁବିବାହ ନିଷେଧ ୟୁସିସି ଦିଗରେ ଏକ ଦୃଢ଼ ପଦକ୍ଷେପ । ଲଭ୍ ଜିହାଦ ଉପରେ ଏକ ଆଇନ ପ୍ରଣୟନ ପାଇଁ ମଧ୍ୟ ପ୍ରସ୍ତୁତି ଚାଲିଛି ।