ଭୁବନେଶ୍ଵର: ଆଉ କିଛି ସମୟ ପରେ ରାଜ୍ୟର ପରବର୍ତ୍ତୀ ମୁଖ୍ୟମନ୍ତ୍ରୀ କିଏ ହେବ ତା ଉପରୁ ପରଦା ହଟିବ। ଆରମ୍ଭ ହେଲା ବିଜେପିର ବିଧାୟକ ଦଳ ବୈଠକ। ଜଣେ ପରେ ଜଣେ ବିଧାୟକ ଭୁବନେଶ୍ଵର ସ୍ଥିତ ରାଜ୍ୟ ବିଜେପି କାର୍ଯ୍ୟାଳୟ ପହଞ୍ଚିଥିଲେ। ସବୁ ବିଧାୟକ ପହଞ୍ଚିବା ପରେ ପାର୍ଟି ଅଫିସରେ ପହଞ୍ଚିଥିଲେ ରାଜନାଥ। ସମସ୍ତ ନିର୍ବାଚିତ ବିଧାୟକଙ୍କ ସହ କେନ୍ଦ୍ରୀୟ ପର୍ଯ୍ୟବେକ୍ଷକ ରାଜନାଥ ସିଂ ଓ ଭୂପେନ୍ଦ୍ର ଯାଦବଙ୍କ ବୈଠକ ଆରମ୍ଭ ହୋଇ ଯାଇଛି। ଏହି ସମୟରେ ମୁଖ୍ୟମନ୍ତ୍ରୀ ନାଁ ଉପରେ ନିଷ୍ପତ୍ତି ନିଆଯିବ।
ଏହା ପୂର୍ବରୁ ହୋଟେଲରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କୁ ବିଜେପି ରାଜ୍ୟ ସଭାପତି ମନମୋହନ ସାମଲଙ୍କ ସହ ଅନେକ ବିଧାୟକ ଭେଟିଛନ୍ତି। ଏବେ ବିଧାୟକ ଦଳ ବୈଠକରେ ନବ ନିର୍ବାଚିତ ବିଧାୟକ ଓ ସାଂସଦଙ୍କ ସମେତ ବହୁ ବରିଷ୍ଠ ନେତାଙ୍କ ଉପସ୍ଥିତିରେ ମୁଖ୍ୟମନ୍ତ୍ରୀ ନାଁ ଉପରେ ମାନସ ମନ୍ଥନ କରାଯିବ। ଉଲ୍ଲେଖନୀୟ ବିଜେପି ପକ୍ଷରୁ ମୁଖ୍ୟମନ୍ତ୍ରୀଙ୍କ ନାଁ ଘୋଷଣା ହୋଇନଥିଲେ ମଧ୍ୟ ଅନେକ ନେତାଙ୍କ ନାଁକୁ ନେଇ ଜୋର୍ ଧରିଛି ଚର୍ଚ୍ଚା ଆଲୋଚନା। ପୂର୍ବରୁ ଧର୍ମେନ୍ଦ୍ର ପ୍ରଧାନଙ୍କ ନାଁକୁ ନେଇ ଜୋରଦାର ଚର୍ଚ୍ଚା ହେଉଥିଲା । ହେଲେ ସେ କେନ୍ଦ୍ର କ୍ୟାବିନେଟ୍ରେ ସାମିଲ ହେବା ପରେ ଏବେ ରାଜ୍ୟ ବିଜେପି ସଭାପତି ମନମୋହନ ସାମଲଙ୍କ ନାଁକୁ ନେଇ ଜୋର୍ ଧରିଛି ଚର୍ଚ୍ଚା । ନିର୍ବାଚନ ପୂର୍ବରୁ ମେଣ୍ଟକୁ ବିରୋଧ କରିବା ସହ ରାଜ୍ୟରେ ବିଜେପି ସରକାର ଆଣିବାରେ ମନମୋହନଙ୍କ ଭୂମିକା ଏଭଳି ଚର୍ଚ୍ଚାକୁ ଖୋରାକ୍ ଯୋଗାଇଛି ।
Also read: ମୁଖ୍ୟମନ୍ତ୍ରୀଙ୍କ ଶପଥ ଉତ୍ସବ, ମହାପ୍ରଭୁଙ୍କୁ ନିମନ୍ତ୍ରଣ ପାଇଁ ପୁରୀ ଗଲା ବିଜେପି ଟିମ୍
ସେହିଭଳି ବ୍ରଜରାଜନଗରରୁ ନବନିର୍ବାଚିତ ବିଧାୟକ ସୁରେଶ ପୂଜାରୀଙ୍କ ନାଁ ମଧ୍ୟ ମୁଖ୍ୟମନ୍ତ୍ରୀ ଚର୍ଚ୍ଚାରେ ରହିଛି । ପୂର୍ବତନ ରାଜ୍ୟ ବିଜେପି ସଭାପତି ତଥା ପୂର୍ବତନ ସାଂସଦ ସୁରେଶ ପୂଜାରୀ ରାଜ୍ୟ ବିଜେପିର ଜଣେ ବରିଷ୍ଠ ତଥା ଅଭିଜ୍ଞ ରାଜନେତା । ସେହିପରି ପାଟଣାଗଡ଼ ବିଧାୟକ ତଥା ପୂର୍ବତନ ମନ୍ତ୍ରୀ କନକ ବର୍ଦ୍ଧନ ସିଂହଦେଓ, ରଣପୁର ବିଧାୟିକା ତଥା ପୂର୍ବତନ ମନ୍ତ୍ରୀ ସୁରମା ପାଢ଼ୀଙ୍କ ନାଁ ମଧ୍ୟ ଚର୍ଚ୍ଚାରେ ରହିଛି ।
ରାଜ୍ୟରେ ପ୍ରଥମ ଥର ବିଜେପି ସରକାର ହେଉଛି । ସରକାରକୁ ପ୍ରଗତିଶୀଳ ଓ ଲୋକଙ୍କ ସରକାରରେ ପରିଣତ କରିବାକୁ ଏକ ଦକ୍ଷ ମନ୍ତ୍ରୀ ମଣ୍ଡଳ କରିବାକୁ ଯୋଜନା କରିଛି ଦଳ । ରାଜ୍ୟ ବିଜେପି ମନ୍ତ୍ରୀ ମଣ୍ଡଳରେ ଦୁଇ ଜଣ ଉପମୁଖ୍ୟମନ୍ତ୍ରୀ ରହିପାରନ୍ତି ବୋଲି କୁହାଯାଉଛି । ମହିଳା କୋଟାରେ ନିମାପଡ଼ା ବିଧାୟିକା ପ୍ରଭାତୀ ପରିଡ଼ା ଓ ଆଦିବାସୀ ଚେହେରା ତଥା କେନ୍ଦୁଝର ବିଧାୟକ ମୋହନ ମାଝି ଏହି ରେସ୍ରେ ଥିବା ଚର୍ଚ୍ଚା ହେଉଛି ।
ସେହିଭଳି ଯୁବ ଚେହେରା ଭାବେ ଚିଲିକା ବିଧାୟକ ପୃଥ୍ବୀରାଜ ହରିଚନ୍ଦନ, ଧାମନଗର ବିଧାୟକ ସୂର୍ଯ୍ୟବଂଶୀ ସୂରଜଙ୍କ ନାଁକୁ ନେଇ ମଧ୍ୟ ଆଲୋଚନା ହେଉଛି । ମନ୍ତ୍ରୀମଣ୍ଡଳରେ ସାମିଲ ପାଇଁ ୩୦ରୁ ଅଧିକ ବିଧାୟକ ଲବିରେ ଥିବା କୁହାଯାଉଛି । ଏବେ ଅପେକ୍ଷା କିଏ ହେବେ ଓଡ଼ିଶାର ନୂଆ ମୁଖ୍ୟମନ୍ତ୍ରୀ ।