ନୂଆଦିଲ୍ଲୀ,୧୪/୦୨: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ଆମଦାନୀ ଶୁଳ୍କ ବା ଟାରିଫ୍ ନୀତି ଘୋଷଣା କରିଛନ୍ତି । ଅର୍ଥାତ୍ ଆମେରିକା ଉତ୍ପାଦ ଉପରେ ଯେଉଁ ଦେଶ ଯେତିକି ହାରରେ ଆମଦାନୀ ଶୁଳ୍କ ଲାଗୁ କରିଛନ୍ତି, ସେହି ଦେଶର ସାମଗ୍ରୀ ଉପରେ ଆମେରିକା ବି ଅନୁରୂପ ଢଙ୍ଗରେ ଶୁଳ୍କ ଲାଗୁ କରିବ । ଭାରତରୁ ଆମେରିକାକୁ ରତ୍ପାନି ହେଉଥିବା ବିଭିନ୍ନ ସାମଗ୍ରୀ ଉପରେ ସମାନ ଧରଣର ଆମଦାନୀ ଶୁଳ୍କ ଲାଗୁ ହେବ । ଟ୍ରମ୍ପ୍ କହିଛନ୍ତି, ଅନ୍ୟ ସମସ୍ତ ଦେଶ ତୁଳନାରେ ଭାରତର ଆମଦାନୀ ଶୁଳ୍କ ସବୁଠୁ ଅଧିକ । ଏଣୁ ଟାରିଫ୍ ନୀତିରେ କୌଣସି ପ୍ରକାର ବୁଝାମଣା କରାଯିବ ନାହିଁ ।
ଆମେରିକାର ଅଟୋମୋବାଇଲ ହାର୍ଲେ ଡ୍ୟାଭିଡ୍ସନ୍ ମୋଟର ସାଇକେଲ କିମ୍ବା କାର୍ ଉପରେ ଭାରତ ୧୦୦% ଅଧିକ ଆମଦାନୀ ଶୁଳ୍କ ଆଦାୟ କରୁଛି । ଭାରତର ଅଟୋମୋବାଇଲ୍ ରତ୍ପାନି ଉପରେ ବି ସେହି ହାରରେ ଆମଦାନୀ ଶୁଳ୍କ ଲାଗୁ କରିବ ଆମେରିକା । ଯେସାକୁ ତେସା ଶୁଳ୍କ ନୀତିରୁ ବଞ୍ଚିବା ପାଇଁ ଭାରତ ୩୦ ଆମେରିକୀୟ ଉତ୍ପାଦରେ ଟାରିଫ୍ କମାଇବାକୁ ବିଚାର କରୁଛି । ଏଥିରେ ଇଭି, ପ୍ରିମିୟମ୍ କାର୍, ମୋଟରସାଇକେଲ, ୱାଇନ୍, ହ୍ୱିସ୍କି ଆଦି ଉପରୁ ଶୁଳ୍କ କମିପାରେ ବୋଲି ଅନୁମାନ କରାଯାଉଛି । ଏସବୁ ସାମଗ୍ରୀ ଉପରେ ଭାରତ ୧୦୦ରୁ ୧୫୦% ପର୍ଯ୍ୟନ୍ତ ଶୁଳ୍କ ଲଗାଉଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, ଯେଉଁ ରାଷ୍ଟ୍ର ଯେତିକି ଟାରିଫ୍ ଲଦିବେ ଆମେରିକା ବି ସମାନ ମାତ୍ରାରେ ଶୁଳ୍କ କଷିବ ।
ତେବେ ଟ୍ରମ୍ପଙ୍କ ପାଲଟା ଟାରିଫ୍ ବାଣରୁ ମୁକୁଳିବା ପାଇଁ ଭାରତ ରଣନୀତି ପ୍ରସ୍ତୁତ କରିଥିବା ଜଣାପଡ଼ିଛି । ସେତିକି ନୁହେଁ, ଆମେରିକାରୁ ପ୍ରତିରକ୍ଷା ଏବଂ ଶକ୍ତି ଉତ୍ପାଦ ଆମଦାନୀକୁ ବଢ଼ାଇବା ପାଇଁ ବି ବିଚାର କରାଯାଉଛି । ଆମେରିକା ସହ ବାଣିଜ୍ୟିକ ସମ୍ପର୍କକୁ ଭାରତ ଖରାପ କରିବାକୁ ଚାହେଁନାହିଁ । ବଜେଟରେ ସରକାର ଇଲେକ୍ଟ୍ରୋନିକ୍ସ, ବୟନ ସାମଗ୍ରୀ ଏବଂ ପ୍ରିମିୟମ ମୋଟର୍ସାଇକେଲ ଭଳି କେତେକ ସାମଗ୍ରୀ ଉପରୁ ଆମଦାନୀ ଶୁଳ୍କ କମାଇଛନ୍ତି । ଏହା ମଧ୍ୟ ଆମେରିକାକୁ ଖୁସି କରିବା ପାଇଁ ଏକ ଉଦ୍ୟମ ବୋଲି କୁହାଯାଇପାରିବ । ବର୍ତ୍ତମାନ ଭାରତ ସରକାର ବିଳାସପୂର୍ଣ୍ଣ କାର, ସୋଲାର ସେଲ୍ ଏବଂ କେମିକାଲ ଆଦି ଉପରେ ଅତିରିକ୍ତ ଟାରିଫ୍ କମାଇବା ପାଇଁ ବିଚାର କରୁଛନ୍ତି ।
ରିପୋର୍ଟ ଅନୁସାରେ, ଆମେରିକାରୁ ଭାରତ ଆସୁଥିବା ୮୦%ରୁ ଊର୍ଦ୍ଧ୍ୱ ସାମଗ୍ରୀରେ ୨୦%ରୁ କମ୍ ଟାରିଫ୍ ଲାଗୁଥିବା ବେଳେ ୨୦ଟି ସାମଗ୍ରୀରେ ୧୦୦%ରୁ ଅଧିକ ଟାରିଫ୍ ଲାଗୁଛି । ଏଲନ୍ ମସ୍କଙ୍କ ଟେସ୍ଲା ମଧ୍ୟ ଏହି ଉଚ୍ଚ ଟାରିଫ୍ ଯୋଗୁ ଭାରତକୁ ଆସିପାରିନାହିଁ । ଆମେରିକାରୁ ଆସୁଥିବା ପ୍ରିମିୟମ କାର ଏବଂ ମୋଟର୍ସାଇକେଲ ଉପରେ ତଗ୍ଡା ଶୁଳ୍କ ଲଗାଉଛି ଭାରତ । ପୂର୍ବ କାର୍ଯ୍ୟକାଳରେ ହାର୍ଲେ-ଡେଭିଡ୍ସନ୍ ମୋଟରସାଇକେଲ ଉପରେ ଲାଗୁଥିବା ମୋଟା ଟାରିଫକୁ ସମାଲୋଚନା କରିଥିଲେ ଟ୍ରମ୍ପ । ଆମେରିକାରୁ ଆସୁଥିବା ଇଭିଗୁଡ଼ିକ ଉପରେ ଭାରତ ୧୨୫% ଶୁଳ୍କ ଲଗାଉଛି । ସେଠାରୁ ଆସୁଥିବା ୱାଇନ୍, ହ୍ୱିସ୍କି, ରମ୍ ଏବଂ ଅନ୍ୟାନ୍ୟ ମାଦକ ଦ୍ରବ୍ୟ ଉପରେ ୧୫୦%ର ସର୍ବୋଚ୍ଚ ଟାରିଫ୍ ଲାଗୁଛି । ଆଉ ୪୨ଟି ସାମଗ୍ରୀ ଉପରେ ୬୦ରୁ ୧୦୦% ଟାରିଫ୍ ଲାଗୁଥିବାବେଳେ ୧.୯% ଉତ୍ପାଦରେ ୩୦ରୁ୬୦% ଶୁଳ୍କ ଲାଗୁ ହେଉଛି । ମୂଲ୍ୟ ହିସାବରେ ଏସବୁ ବର୍ଗରେ ୨୦୨୩-୨୪ରେ ଭାରତକୁ ଆସିଥିବା ମୋଟ ସାମଗ୍ରୀ ମୂଲ୍ୟର ମାତ୍ର ୦.୪% । ତେବେ ଅନୁମାନ କରାଯାଉଛି ଭାରତ ଏହି ବର୍ଗଗୁଡ଼ିକରେ ଟାରିଫ୍ କମାଇପାରେ ।
