ନୂଆଦିଲ୍ଲୀ ୨୯।୮: ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧି ନିର୍ବାଚନୀ ରାଜ୍ୟ ବିହାରରେ ‘ଭୋଟ ଅଧିକାର ଯାତ୍ରା’ ଚଳାଇଥିଲେ। ଏହି ଯାତ୍ରା କ୍ରମରେ ରାହୁଲ ଦରଭଙ୍ଗା ପହଞ୍ଚିଥିଲେ, ହେଲେ ଏଠାରେ ତାଙ୍କ ସଭାରେ ରାଜନୈତିକ ମର୍ଯ୍ୟଦା ଭଙ୍ଗ ହୋଇଛି। ସଭାରେ ପ୍ରଥମେ ରାହୁଲ ଗାନ୍ଧି ପ୍ରଧାନମନ୍ତ୍ରୀ ମୋଦିଙ୍କ ଉପରେ ବର୍ଷିଥିଲେ। ରାହୁଲ ମଞ୍ଚରୁ ଯିବା ପରେ ରିଜଭି ଓରଫ ରାଜା ନାମକ ଜନୈକ ବ୍ୟକ୍ତି ସବୁ ମର୍ଯ୍ୟଦା ଉଲ୍ଲଂଘନ କରି ମାଇକରେ ସର୍ବସାଧାରଣରେ ପ୍ରଧାନମନ୍ତ୍ରୀଙ୍କ ମାଙ୍କୁ ଗାଳି ଦେଇଛି। ଏହି ଭିଡିଓ ଏବେ ଭାଇରାଲ ହେଉଥିବା ବେଳେ ରିଜଭିକୁ ପୋଲିସ ଗିରଫ କରିଛି।
ତେବେ ଆସନ୍ତୁ ଜାଣିବା ସର୍ବସାଧାରଣରେ ପ୍ରଧାନମନ୍ତ୍ରୀଙ୍କ ପ୍ରତି ଅପଶବ୍ଦ ପ୍ରୟୋଗ କରିବା, ଏଥି ଲାଗି ଅଭଦ୍ରଭାଷା ବ୍ୟବହାର କଲେ ଆମ ଦେଶରେ ଦଣ୍ଡ କ’ଣ ହୋଇଥାଏ ?
ଭାରତୀୟ ସମ୍ବିଧାନ ଅନୁସାରେ ଆଇନ ଆଗରେ ସବୁ ନାଗରିକ ସମାନ। କାହିରିକୁ ବି ନିଜର କଥା ରଖିବାର ଅଧିକାର ରହିଛି। ହେଲେ ଯଦି କାହା କଥାରେ କେହି ଆହତ ହୁଅନ୍ତି ତେବେ ସେହି ବ୍ୟକ୍ତିଙ୍କ ବିରୋଧରେ ମାନହାନୀ ମୋକଦ୍ଦମା ରୁଜୁ ହୋଇ ପାରିବ। ଏଥିରେ ଯଦି ବ୍ୟକ୍ତି ପ୍ରଧାନମନ୍ତ୍ରୀ ହୋଇଥାନ୍ତି ଏହା ଆହୁରି ଗୁରୁତର ଅପରାଧ ଶ୍ରେଣୀର ମନେ କରାଯାଏ। ଏଥି ପାଇଁ ପ୍ରଧାନମନ୍ତ୍ରୀ ନିଜେ ମକଦ୍ଦମା କରନ୍ତିନି। ତାଙ୍କ ପାଇଁ ପ୍ରଶାସନ ଓ ପୋଲିସ କାର୍ଯ୍ୟାନୁଷ୍ଠାନ କରେ। କାରଣ ପ୍ରଧାନମନ୍ତ୍ରୀ ଜଣେ ବ୍ୟକ୍ତି ନୁହନ୍ତି ସେ ସାରା ଦେଶର ପ୍ରତିନିଧିତ୍ୱ କରନ୍ତି।
କିଛି କହି, ଲେଖି, ଇସାରା କରି ଅଥବା ଗଣମାଧ୍ୟମ ଜରିଆରେ କାହାର ଛବିକୁ ଖରାପ କରିବା ଅପରାଧ ଅଟେ। ଏଥି ପାଇଁ ଯଦି କେହି ଦୋଷୀ ସାବ୍ୟସ୍ତ ହୁଅନ୍ତି ଏଥି ପାଇଁ ବ୍ୟକ୍ତିଙ୍କୁ ୨ ବର୍ଷ ଜେଲ, ଜରିମନା ଅଥବା ଉଭୟ ଦଣ୍ଡ ଲାଗୁ ହୋଇପାରେ। ସର୍ବସାଧାରଣ ସ୍ଥାନରେ ପ୍ରଧାନମନ୍ତ୍ରୀଙ୍କୁ ଗାଳି ଦେବା ଅଥବା ଅଭଦ୍ର ଆଚରଣ କରିବା ମଧ୍ୟ ଘୋର ଅପରାଧ। ତେବେ ଦରଭଙ୍ଗା ମାମଲାରେ ପ୍ରଧାନମନ୍ତ୍ରୀଙ୍କୁ ମଞ୍ଚ ଉପରୁ ଅପଶବ୍ଦ କୁହାଯାଇଛି। ଏପରି ମାମଲାରେ ଅଭିଯୁକ୍ତ ଦୋଷୀ ସାବ୍ୟସ୍ତ ହେଲେ ୩ ମାସ ଜେଲ, ଜରିମନା ଅଥବା ଉଭୟ ଦଣ୍ଡ ହୋଇପାରେ।
ଏଥିରେ ଯଦି କେହି ସିଧା ପ୍ରଧାନମନ୍ତ୍ରୀଙ୍କୁ ଗାଳି ଗୁଲଜ କରେ ତେବେ କେବଳ ବିଏନଏସର ଧାରା ୩୫୨ ନୁହେଁ ବରଂ ସେକ୍ସନ ୩୫୬ ଓ ଅନ୍ୟ ଧାରା ମଧ୍ୟ ଯୋଡି ଦିଆଯାଏ।
