ବଡ଼ ଯୋଜନା କରୁଛନ୍ତି କି ମାଦୁରୋଙ୍କ ପୁଅ ? ଅଡିଓ ପଠାଇ ଦେଲେ ବଡ଼ ସନ୍ଦେଶ

ନୂଆଦିଲ୍ଲୀ: ଭେନେଜୁଏଲା ବିରୁଦ୍ଧରେ ଆମେରିକାର ସାମରିକ କାର୍ଯ୍ୟାନୁଷ୍ଠାନ ପରେ ନିକୋଲାସ ମାଦୁରୋଙ୍କ ପୁଅ ନିକୋଲାସ ମାଦୁରୋ ଗୁଏରା ଏକ ବିବୃତ୍ତି ଜାରି କରିଛନ୍ତି । ସ୍ଥାନୀୟ ଦୈନିକ ଏଲ୍ କୋଅପରେଟିଭ୍ରେ ପ୍ରକାଶିତ ଏକ ରିପୋର୍ଟ ଅନୁଯାୟୀ, ନିକୋଲାସ ମାଦୁରୋ ଗୁଏରା କହିଛନ୍ତି ଯେ, ଇତିହାସ କହିବ ବିଶ୍ୱାସଘାତକ କିଏ। ଆମେରିକୀୟ ସାମରିକ କାର୍ଯ୍ୟାନୁଷ୍ଠାନ ପରେ ଗୁଏରାଙ୍କ ଏହି ବିବୃତ୍ତି ଆସିଛି।

ନିକୋଲାସ ମାଦୁରୋ ଏବଂ ପତ୍ନୀ ସିଲିଆ ଫ୍ଲୋରେସଙ୍କୁ ଆମେରିକୀୟ ସେନା ଗିରଫ କରି ନ୍ୟୁୟର୍କ ନେଇଯାଇଛି । ସେଠାରେ ସେମାନଙ୍କୁ କୋର୍ଟରେ ହାଜର କରାଯାଇଛି । ସୋସିଆଲ ମିଡିଆରେ ପ୍ରସାରିତ ଏକ ଅଡିଓ ରେକର୍ଡିଂରେ, ମାଦୁରୋ ଗୁଏରା ଶାସକ ଆନ୍ଦୋଳନ ମଧ୍ୟରେ ସମ୍ଭାବ୍ୟ ବିଶ୍ୱାସଘାତକତା ବିଷୟରେ ଚେତାବନୀ ଦେଇଛନ୍ତି। ସେ କହିଛନ୍ତି ଯେ, ଇତିହାସ ଧୋକାବାଜଙ୍କ ପର୍ଦ୍ଦାଫାସ କରିବ। ସମୟ କହିବ ବିଶ୍ୱାସଘାତକ କିଏ ।

ଶାସକ ୟୁନାଇଟେଡ୍ ସୋସିଆଲିଷ୍ଟ ପାର୍ଟି ଅଫ୍ ଭେନେଜୁଏଲା (PSUV)ର ସଦସ୍ୟ ମାଦୁରୋ ଗୁଏରା କହିଛନ୍ତି ଯେ, ଦଳ ଏକତାର ସହ ରହିବ। ଦଳକୁ ମଜଭୁତ କରିବା ପାଇଁ ଜାନୁଆରୀ ୪ ଏବଂ ୫ ତାରିଖରେ ସମର୍ଥକମାନଙ୍କୁ ସେ ଏକାଠି ହେବାକୁ ଆହ୍ୱାନ କରିଛନ୍ତି। ସେ ବାହ୍ୟ ଆକ୍ରମଣର ଜବାବ ଦେବା ପାଇଁ ରାଜନୈତିକ ଏବଂ ସାମରିକ ସମନ୍ୱୟର ଆବଶ୍ୟକତା ଉପରେ ମଧ୍ୟ ଗୁରୁତ୍ୱାରୋପ କରିଛନ୍ତି ।

ସେ କହିଛନ୍ତି ଯେ, ନିକୋଲାସ୍ ମାଦୁରୋ ବର୍ତ୍ତମାନ ଆମେରିକାର ହେପାଜତରେ ଅଛନ୍ତି। ଶାସକ ଶିବିର ଦୃଢ଼ ସଂକଳ୍ପବଦ୍ଧ ଏବଂ ଆନ୍ଦୋଳନ କରିବାକୁ ପ୍ରସ୍ତୁତ। ଆମେ ଠିକ୍ ଅଛୁ, ଆମେ ଶାନ୍ତ। ତୁମେ ଆମକୁ ରାସ୍ତାରେ ଦେଖିବ, ଏହି ଲୋକମାନଙ୍କ ସହିତ। ସେମାନେ ଆମକୁ ଦୁର୍ବଳ ଦେଖିବାକୁ ଚାହୁଁଛନ୍ତି। ଆମେ ସମ୍ମାନର ସହ ବଢ଼ିବୁ । ଆମକୁ କଷ୍ଟ ହେଉଛି, କିନ୍ତୁ ସେମାନେ ଆମଙ୍କୁ ଭାଙ୍ଗିପାରିବେ ନାହିଁ ବୋଲି ଅଡିଓ ମାଧ୍ୟମରେ ସମର୍ଥକଙ୍କୁ ବାର୍ତ୍ତା ଦେଇଛନ୍ତି ଗୁଏରା । ଏପରିକି ସେ ନିଜ ମା’ଙ୍କ ନାଁ ନେଇ ଏଥିପାଇ ଶପଥ ମଧ୍ୟ କରିଛନ୍ତି ।