ଉନ୍ନାଓ ଦୁଷ୍କର୍ମ କାଣ୍ଡ: କୂଲଦୀପ ସେଙ୍ଗରକୁ ସୁପ୍ରିମକୋର୍ଟରୁ ଝଟକା, ହାଇକୋର୍ଟ ଆଦେଶ ଉପରେ ଲାଗିଲା ରୋକ୍

ନୂଆଦିଲ୍ଲୀ ୨୯।୧୨: ଭାରତର ପ୍ରଧାନ ବିଚାରପତି (ସିଜେଆଇ) ସୂର୍ଯ୍ୟକାନ୍ତଙ୍କ ଅଧ୍ୟକ୍ଷତାରେ ଗଠିତ ସୁପ୍ରିମକୋର୍ଟ ୩ ସଦସୀୟ ବେଞ୍ଚ ସୋମବାର ଉନ୍ନାଓ ଦୁଷ୍କର୍ମ ମାମଲାରେ ଦିଲ୍ଲୀ ହାଇକୋର୍ଟଙ୍କ ଆଦେଶ ଉପରେ ରୋକ ଲଗାଇ ଦେଇଛନ୍ତି। କେବଳ ଏତିକି ନୁହେଁ ସୁପ୍ରିମକୋର୍ଟ କୂଲଦୀପ ସେଙ୍ଗରକୁ ନୋଟିସ୍ ମଧ୍ୟ ଜାରି କରିଛନ୍ତି। ଉନ୍ନାଓ ଦୁଷ୍କର୍ମ ମାମଲାରେ ପୂର୍ବତନ ବିଧାୟକ କୂଲଦୀପ ସିଂହ ସେଙ୍ଗରର ଆଜୀବନ ଦଣ୍ଡାଦେଶକୁ ଦିଲ୍ଲୀ ହାଇକୋର୍ଟ ନିଲମ୍ବିତ କରିବା ସହ ଜାମିନ ମଧ୍ୟ ମଞ୍ଜୁର କରିଥିଲେ।

ତେବେ ସିଜେଆଇ କହିଛନ୍ତି ଯେ ହାଇକୋର୍ଟରେ ଯେଉଁ ଜଜ୍ ଏହି ରାୟ ଦେଇଛନ୍ତି ସେ ଜଣେ ବହୁତ ଭଲ ଜଜ୍। ତେବେ ଭୁଲ କାହାଦ୍ୱାରା ବି ହୋଇପାରେ। ପକସୋ ଆଧାରରେ ଯଦି କନଷ୍ଟେବଲ ଲୋକସେବକ ହୋଇ ପାରନ୍ତି ତେବେ ବିଧାୟକଙ୍କ ଲାଗି ଅଲଗା କାର୍ଯ୍ୟ ରଖା ଯାଇଛି ? ଏହା ବାସ୍ତବିକ୍ ଚିନ୍ତାର ବିଷୟ। ଉଲ୍ଲେଖଯୋଗ୍ୟ ଯେ ସିବିଆଇ ହାଇକୋର୍ଟଙ୍କ ଆଦେଶକୁ ଆଇନବିରୁଦ୍ଧ, ତୃଟିପୂର୍ଣ୍ଣ ତଥା ସମାଜ ଲାଗି ଭୟାନକ ବିପଦ ଦର୍ଶାଇ ସୁପ୍ରିମକୋର୍ଟରେ ଆବେଦନ ଦାଖଲ କରିଥିଲେ। ସିବିଆଇ ତାଙ୍କ ଆବେଦନରେ କହିଥିଲେ ଯେ ଦିଲ୍ଲୀ ହାଇକୋର୍ଟ ସେଙ୍ଗରର ଦଣ୍ଡକୁ ନିଲମ୍ବିତ କରି ପକସୋ ଆକ୍ଟର ଉଦ୍ଦେଶ୍ୟକୁ ଅଣଦେଖା କରିଛନ୍ତି।

ସୋମବାର ସୁପ୍ରିମକୋର୍ଟରେ ମାମଲାର ଶୁଣାଣି ଆରମ୍ଭ ହେବା ପୂର୍ବରୁ ପୀଡ଼ିତା ଗୁରୁତର ଅସୁସ୍ଥ ହୋଇପଡିଥିଲେ। ଏଣୁ ତାଙ୍କୁ ତୁରନ୍ତ ହସ୍ପିଟାଲ ନିଆଯାଇଥିଲା। ତେବେ ଶୁଣାଣି କାଳରେ ପୀଡ଼ିତା ମଧ୍ୟ ସୁପ୍ରିମକୋର୍ଟରେ ଉପସ୍ଥିତ ଥିଲେ। ଶୁଣାଣି କାଳରେ ସିବିଆଇ ପକ୍ଷରୁ ଉପସ୍ଥିତ ସୋଲିସିଟର ଜେନେରାଲ ତୁଷାର ମେହେଟ୍ଟା କହିଛନ୍ତି ଯେ ପିଲା ସହିତ ହୋଇଥିବା ଦୁଷ୍କର୍ମ ବାସ୍ତବିକ ଭୟାବହ ଥିଲା। ସେତେବେଳେ ପୀଡିତାଙ୍କୁ ୧୬ ବର୍ଷ ମଧ୍ୟ ହୋଇ ନଥିଲା। ଏଣୁ ଆଇପିସିର ଧାରା ୩୭୬ ଓ ପକସୋ ଆକ୍ଟର ଧାରା ୫ ଓ ୬ରେ ଅଭିଯୋଗ ନିର୍ଦ୍ଧାରିତ ହୋଇଥିଲା।

ଶୁଣାଣିରେ ସୋଲିସିଟର ଜେନେରାଲ କହିଛନ୍ତି ଯେ ଯଦି କେହି କନଷ୍ଟେବଲ ଡ୍ୟୁଟିରେ ଥାନ୍ତି ଓ ସେ ଏପରି କାମ କରିଥାନ୍ତି ତେବେ ଦୋଷୀ ସାବ୍ୟସ୍ତ ହେବେ। ଯଦି କେହି ଆର୍ମି ଅଫିସର ଏପରି କାମ କରେ ସେ ମଧ୍ୟ ଏଗ୍ରାଭେଟେଡ ସେକ୍ସୁଆଲ ଅସଲ୍ଟର ଦୋଷୀ ହେବେ। ଏଣୁ କେହି ଏପରି ବ୍ୟକ୍ତି ଯାହାଙ୍କୁ ପକସୋ ଧାରାରେ ପବ୍ଲିକ୍ ସର୍ଭେଣ୍ଟ କୁହାଯାଇନି ହେଲେ ତାଙ୍କ ପାଖରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ରହିଛି ତେବେ ସେ ମଧ୍ୟ ଦୋଷୀ ହୋବେ। ଏଥିରେ ସିଜେଆଇ ସୂର୍ଯ୍ୟକାନ୍ତ କହିଥିଲେ ଯେ ଆପଣଙ୍କ କହିବା କଥା ହେଉଛି ଯଦି କେହି ବଡ ପଦପଦବୀରେ ଅଛନ୍ତି ଓ କେହି ତାଙ୍କ ନିକଟକୁ ସହାୟତା ନିମନ୍ତେ ଆସନ୍ତି ଏବଂ ତାଙ୍କ ପ୍ରତି କୁଶ୍ଚିତ ଆଚରଣ କରାଯାଏ ଏହାକୁ ଅଗ୍ରାଭେଟେଡ ଆକ୍ଟ ମାନିବା ଉଚିତ।

ତର୍କ ଶୁଣିବା ପରେ ସିଜେଆଇ ସୂର୍ଯ୍ୟକାନ୍ତ କହିଥିଲେ ଯେ ଆମେ ଆଦେଶ ଉପରେ ରୋକ ଲଗାଇବା ପକ୍ଷରେ ଅଛୁ। ଏମିତିରେ ଯଦି ବ୍ୟକ୍ତି ଜେଲରୁ ବାହାରକୁ ଚାଲି ଯାଇଥାନ୍ତା ତେବେ ତା ସ୍ୱାଧୀନତାର ଧ୍ୟାନ ରଖା ଯାଇଥାନ୍ତା। ହେଲେ ଏହି ସ୍ଥିତି ଅତ୍ୟନ୍ତ ଖାସ ଓ ସେ ଏକ ଅନ୍ୟ ମାମଲାରେ ଜେଲରେ ରହିଛି। ଉନ୍ନାଓ ପୀଡ଼ିତା ୨୦୧୭ ମସିହାରେ ବିଜେପି ନେତା ତଥା ତତ୍କାଳୀନ ବିଧାୟକ କୂଲଦୀପ ସିଂହ ସେଙ୍ଗରଙ୍କ ଉପରେ ଦୁଷ୍କର୍ମ ଅଭିଯୋଗ ଆଣିଥିଲେ। ଏହି ମାମଲାରେ ପୋଲିସ ପ୍ରଥମେ ଏତଲା ଗ୍ରହଣ କରିବାକୁ ମନା କରିଦେଇଥିଲା। ତେବେ ୨୦୧୮ ମସିହାରେ ପୀଡ଼ିତା ଯେତେବେଳେ କାଳିଦାସ ମାର୍ଗସ୍ଥିତ ମୁଖ୍ୟମନ୍ତ୍ରୀଙ୍କ ବାସଭବନ ଆଗରେ ଆତ୍ମହୂତୀ ଉଦ୍ୟମ କଲେ ସେତେବେଳେ ମାମଲା ସିବିଆଇକୁ ଦେଇ ଦିଆଯାଇଥିଲା।

ତେବେ ଦିଲ୍ଲୀ ହାଇକୋର୍ଟ ସେଙ୍ଗରର ଅପିଲ ଲମ୍ବିତ ରହିବା ପର୍ଯ୍ୟନ୍ତ ଦଣ୍ଡ ନିଲମ୍ବିତ କରିଦେବା ସହ ସର୍ତ୍ତମୂଳକ ଜାମିନ ମଧ୍ୟ ମଞ୍ଜୁର କରିଦେଇଥିଲେ। କୋର୍ଟ ଯେଉଁ ସର୍ତ୍ତ ରଖିଥିଲେ ସେଥିରେ ସେଙ୍ଗରକୁ ପୀଡ଼ିତାଙ୍କ ଗାଁର ଆଖପାଖ ୫ କିଲୋମିଟର ଅଞ୍ଚଳକୁ ପ୍ରବେଶ ମନା କରିଥିଲେ। ଏହା ଛଡା ସେ ଯେପରି କାହା ଉପରେ ଚାପ ପକାଇବାକୁ ଚେଷ୍ଟା ନ କରନ୍ତି ସେ ନେଇ ମଧ୍ୟ ତାଗିଦ କରିଥିଲେ। ତେବେ ସେଙ୍ଗର ପୀଡ଼ିତାଙ୍କ ପିତାଙ୍କୁ ପୋଲିସ ହାଜତରେ ହତ୍ୟା କରିବା ମାମଲାରେ ୧୦ ବର୍ଷ ଜେଲଦଣ୍ଡ ଭୋଗୁଛି। ଏଣୁ ସେ ଏବେବି ଜେଲରେ ବନ୍ଦୀ ଅଛି।