ନୂଆପଡ଼ା ଉପ-ନିର୍ବାଚନ କସରତ: ଆଜି ନାମାଙ୍କନ ପ୍ରତ୍ୟାହାରର ଶେଷ ତାରିଖ

ନୂଆପଡା ୨୪/୧୦: ନଭେମ୍ବର ୧୧ ରେ ନୂଆପଡା ଉପ-ନିର୍ବାଚନ । ଆଜି ନାମାଙ୍କନ ପ୍ରତ୍ୟାହାରର ଶେଷ ତାରିଖ । ୧୯ ଜଣ ପ୍ରାର୍ଥୀ ୨୮ ଗୋଟି ନାମାଙ୍କନ ଦାଖଲ କରିଥିଲେ। ଯେଉଁଥିରୁ ପାଞ୍ଚ ଜଣ ପ୍ରାର୍ଥୀଙ୍କ ନାମାଙ୍କନ ପତ୍ର ନାକଚ ହୋଇଥିବା ବେଳେ ଏବେ ରଣକ୍ଷେତ୍ରରେ ରହିଲେ ୧୪ ଜଣ ପ୍ରାର୍ଥୀ । ବିଜେପି, ବିଜେଡି ଓ କଂଗ୍ରେସ ଏଇ ତିନି ପ୍ରମୁଖ ଦଳ ଉପରେ ସମସ୍ତଙ୍କ ନଜର ରହିଛି ।

କଂଗ୍ରେସ ପ୍ରାର୍ଥୀ ଘାସିରାମ ମାଝୀ ସମସ୍ତଙ୍କ ଆଗରୁ ପ୍ରଚାର ମଇଦାନକୁ ଓଲ୍ହାଇଥିବା ବେଳେ ଲୋକଙ୍କ ପାଖରେ ପହଞ୍ଚି କରୁଛନ୍ତି ସାଇଲେଣ୍ଟ ପ୍ରଚାର । ସେପଟେ ଆଜି ବିଜେପିରୁ ପ୍ରାର୍ଥୀ ଜୟ ଢୋଲକିଆ କୋମନା ବ୍ଲକର ୩ ନମ୍ବର ଜୋନରେ ପ୍ରଚାର କରିବା କାର୍ଯ୍ୟକ୍ରମ ରହିଛି । ଏହାସହ ସ୍ବର୍ଗତ ରାଜେନ୍ଦ୍ର ଢୋଲକିଆଙ୍କ ପତ୍ନୀ କଳ୍ପନା ଢୋଲକିଆ ନୂଆପଡା ବ୍ଲକର ୯ ନମ୍ବର ଜୋନରେ ପ୍ରଚାର ଆରମ୍ଭ କରିବେ । ସେପଟେ ବିଜେଡି ମଧ୍ୟ ଆଜି କୋମନା ବ୍ଲକର ୩ ନମ୍ବର ଜୋନର ତିନୋଟି ପଞ୍ଚାୟତରେ ପ୍ରଚାର ଆରମ୍ଭ କରିବ ।  

ଅନ୍ୟପଟେ ନୂଆପଡ଼ାରେ ଜମୁଛି ପ୍ରଚାର । ତିନିଦଳ ମତଦାତାଙ୍କୁ ନିଜ ନିଜ ସପକ୍ଷରେ କରିବା ପାଇଁ ଦିନରାତି ଏକ କରିଦେଇଛନ୍ତି । ଘରକୁ ଘର ବୁଲି ପ୍ରଚାର କରୁଛନ୍ତି । ଭୋଟରଙ୍କୁ ନିଜଆଡ଼କୁ ଆକର୍ଷଣ କରିବା ପାଇଁ ଜୋରଦାର ପ୍ରୟାସ କରୁଛନ୍ତି । ବିରୋଧୀ ସରକାରଙ୍କ ମିଛ ପ୍ରତିଶ୍ରୁତି, ଅପାରଗତା ବାବଦରେ ଲୋକଙ୍କୁ ଜଣାଇବା ସହ ରାଜ୍ୟରେ ମହିଳା କିପରି ନିର୍ଯାତିତ ହେଉଛନ୍ତି ସେହି ପ୍ରସଙ୍ଗ ଉଠାଇ ଲୋକଙ୍କ ନିକଟତର ହେଉଥିବା ବେଳେ ଶାସକ ଦଳ ବି ପ୍ରଚାର ମଇଦାନରେ ପଛରେ ପଡ଼ିନି ।

ଭିନ୍ନ ପ୍ରସଙ୍ଗ ଉଠାଇ ବିରୋଧୀଙ୍କୁ ଟାର୍ଗେଟ୍ କରୁଛି ଶାସକ ଦଳ । ପୂର୍ବ ସରକାରରେ କିପରି ପ୍ରତିଶ୍ରୁତି ଦିଆଯାଇ ପାଳନ ହୋଇନି । କିପରି ପଦ୍ମପୁରକୁ ସ୍ବତନ୍ତ୍ର ଜିଲ୍ଲା ମାନ୍ୟତା ଦେବା କହି ପୂର୍ବ ସରକାର ଭୁଲିଯାଇଛନ୍ତି ସେ ସବୁ ପ୍ରସଙ୍ଗ ଉଠାଇ ବିରୋଧୀ ଦଳ ତଥା ପୂର୍ବ ସରକାରଙ୍କୁ ଘେରିଛି ଶାସକ ଦଳ ବିଜେପି ।

କଂଗ୍ରେସ ବି ଉଭୟ ବିଜେଡି ଏବଂ ବିଜେପିକୁ ଗୋଟିଏ କଏନର ଦୁଇ ପାର୍ଶ୍ୱ, ବିଜେପି-ବିଜେଡି ଭାଇ ଭାଇ କଥା କହି ଲୋକଙ୍କ ବିଶ୍ବାସ ଜିତିବାକୁ ଚେଷ୍ଟା ଜାରି ରଖିଛି । ତିନି ଦଳ ଲୋକଙ୍କ ଭୋଟ ହାତେଇବା ପାଇଁ ଜୋରଦାର ପ୍ରୟାସ କରୁଥିବା ବେଳେ ଦେଖିବାକୁ ବାକି ରହିଲା, ଏହି ନିର୍ବାଚନରେ ଭୋଟର କାହାକୁ ନିଜର ନେତା ବାଛୁଛନ୍ତି ।