ନୂଆଦିଲ୍ଲୀ ୦୩।୦୫: ୧୪ ବର୍ଷୀୟ ପ୍ଲେୟର । ବର୍ତ୍ତମାନ ଖୁବ୍ ଚର୍ଚ୍ଚାରେ । ଟିମ୍ ପାଇଁ ସାଜିଛନ୍ତି ସଙ୍କଟ ମୋଚନ । ପଡିଆରେ ଲଗାଉଛନ୍ତି ଚୌକା-ଛକା । ପ୍ରଥମ ମ୍ୟାଚରେ ଲଗାଇଥିଲେ ଦମ୍ଦାର ଶତକ । ସେ ପୁଣି ୩୫ ବଲ୍ରେ । ଟୁର୍ଣ୍ଣାମେଣ୍ଟରେ ଶତକ ଲଗାଇବାରେ ସେ ହୋଇଛନ୍ତି ଦ୍ରୁତତମ ଭାରତୀୟ । ବୈଭବ ସୂର୍ଯ୍ୟବଂଶୀ । ନିଜ ବୟସକୁ ନେଇ ଆଲୋଚନାରେ । ଏବେ ତାଙ୍କ ସମ୍ପତ୍ତିକୁ ନେଇ ହେଉଛି ଚର୍ଚ୍ଚା ।
ତେବେ କେତେ ସମ୍ପତ୍ତିର ମାଲିକ ଅଟନ୍ତି ଯୁବ ସେନସେସନ୍ । ଆଇପିଏଲ୍ ୨୦୨୫ର ମେଗା ଅକ୍ସନ୍କୁ ଓହ୍ଲାଇଥିଲେ ବୈଭବ ସୂର୍ଯ୍ୟବଂଶୀ । ତାଙ୍କର ବେସ୍ ପ୍ରାଇସ୍ ଥିଲା ୩୦ ଲକ୍ଷ ଟଙ୍କା । ନିଲାମୀରେ ରାଜସ୍ଥାନ ସହିତ ଦିଲ୍ଲୀ କ୍ୟାପିଟାଲ୍ସ ମଧ୍ୟ ତାଙ୍କ ପାଇଁ ନିଲାମ ଲଗାଇଥିଲା । କିନ୍ତୁ ରାଜସ୍ଥାନ ରୟାଲ୍ସ ଟିମ୍ ତାଙ୍କୁ ନିଜ ସହ ଯୋଡିଥିଲା । ମାତ୍ର ୧୩ ବର୍ଷ ବୟସରେ ଟିମ୍ ତାଙ୍କୁ ୧ କୋଟି ୧ଲକ୍ଷରେ କରିଥିଲା ସାମିଲ୍ । ବୈଭବ ଗତ ମାସରେ ରାଜସ୍ଥାନ ଟିମ୍ ସହିତ ତାଙ୍କର ୧୪ତମ ଜନ୍ମଦିନ ପାଳନ କରିଥିଲେ । ଯାହାପରେ ତାଙ୍କୁ ଲକ୍ଷ୍ନୌ ବିପକ୍ଷରେ ଆଇପିଏଲ ଡେବ୍ୟୁ କରିବାର ମିଳିଥିଲା ସୁଯୋଗ ।
ରିପୋର୍ଟ ଅନୁସାରେ, IPLର ସବୁଠାରୁ ଯୁବ ଖେଳାଳିଙ୍କୁ ଏବେ ବ୍ରାଣ୍ଡ ଏଣ୍ଡୋର୍ସମେଣ୍ଟ ପାଇଁ ଅଫର ମିଳିବା ଆରମ୍ଭ ହୋଇଛି। କିନ୍ତୁ ଏ ବିଷୟରେ ଅଧିକ ସୂଚନା ଏପର୍ଯ୍ୟନ୍ତ ମିଳିନାହିଁ । କିନ୍ତୁ କୁହାଯାଉଛି କି ସେ ବ୍ରାଣ୍ଡ ଏଣ୍ଡୋର୍ସମେଣ୍ଟରୁ ମଧ୍ୟ କୋଟି କୋଟି ଟଙ୍କା ରୋଜଗାର କରିବେ। ବୈଭବଙ୍କ ମୋଟ ସମ୍ପତ୍ତିର ଏକ ବଡ ଅଂଶ ଆଇପିଏଲ୍ ରୋଜଗାରରୁ ଆସିଥାଏ । ସେ ବିହାର U-19 ଟିମ୍ ପାଇଁ ରଣଜୀ ଟ୍ରଫି ଏବଂ ଭିନୁ ମଙ୍କଡ ଟ୍ରଫିରେ ଖେଳିଛନ୍ତି। ରିପୋର୍ଟ ଅନୁସାରେ, ତାଙ୍କର ମୋଟ ସମ୍ପତ୍ତି ପ୍ରାୟ ୨ କୋଟି ଟଙ୍କା ବୋଲି କୁହାଯାଉଛି। କହିରଖୁ କି ୩୫ ବଲ୍ରେ ଶତକ ମାରିବା ପାଇଁ ବିହାର ର ମୁଖ୍ୟମନ୍ତ୍ରୀ ରାଜ୍ୟ ସରକାରଙ୍କ ପକ୍ଷରୁ ୧୦ ଲକ୍ଷ ଟଙ୍କାର ପୁରସ୍କାର ଘୋଷଣା କରିଛନ୍ତି।
ବୈଭବ ୨୭ ମାର୍ଚ୍ଚ ୨୦୧୧ରେ ବିହାର ସମସ୍ତିପୁର ଜିଲ୍ଲାର ମୋତିପୁର ଗାଁରେ ଜନ୍ମଗ୍ରହଣ କରିଥିଲେ । ସେ ୯ ବର୍ଷ ବୟସରେ କ୍ରିକେଟ ଖେଳିବା ଆରମ୍ଭ କରିଥିଲେ । ପ୍ରାରମ୍ଭରେ ତାଙ୍କ ବାପା ସଞ୍ଜୀବ ସୂର୍ଯ୍ୟବଂଶୀ ତାଙ୍କୁ ପ୍ରଶିକ୍ଷଣ ଦେଉଥିଲେ। ତାଙ୍କ ବାପା ଜଣେ ଚାଷୀ । ସେ ବୈଭବଙ୍କୁ ଭଲ କ୍ରିକେଟ ଶିଖାଇବା ପାଇଁ ସବୁ କିଛି କରିଥିଲେ । ରିପୋର୍ଟ ଅନୁସାରେ, ବୈଭବ ଯେତେବେଳେ ତାଲିମ ପାଇଁ ପାଟନା ଯାଉଥିଲେ ସେତେବେଳେ ଟଙ୍କାର ଆବଶ୍ୟକତା ପଡିଲା ତାଙ୍କ ବାପା ଜମି ବିକ୍ରି କରି ଦେଇଥିଲେ । କିନ୍ତୁ ଲକ୍ଷ୍ୟରୁ ବିଚ୍ୟୁତ ହେବାକୁ ଦେଇନଥିଲେ ।
