ନୂଆଦିଲ୍ଲୀ ୦୫।୦୫: ଆଇପିଏଲ ଆରମ୍ଭ ହେବାର ତିନି ବର୍ଷ ପରେ ଜନ୍ମ ହୋଇଥିଲେ ୧୪ ବର୍ଷୀୟ ବୈଭବ ସୂର୍ଯ୍ୟବଂଶୀ । ଯୁବ ପ୍ଲେୟର ଆଇପିଏଲ ୨୦୨୫ରେ ହାସଲ କରିଛନ୍ତି ବଡ କୀର୍ତ୍ତିନାମା । ଯାହା ବିରାଟ କୋହଲି, ଏମଏସ ଧୋନି, ରୋହିତ ଶର୍ମାଙ୍କ ଭଳି କିମ୍ବଦନ୍ତୀ ପ୍ଲେୟର ବର୍ଷ ବର୍ଷ ଧରି କରିପାରି ନଥିଲେ। ବୈଭବ ଏବେ ଟୁର୍ଣ୍ଣାମେଣ୍ଟରେ ଦ୍ରୁତତମ ଶତକ ହାସଲ କରିବାରେ ଦ୍ୱିତୀୟ ଏବଂ ପ୍ରଥମ ଭାରତୀୟ ଖେଳାଳି ହୋଇଛନ୍ତି ।
ଏବେ ପ୍ରଶ୍ନ ଆସୁଛି ବୈଭବ ସୂର୍ଯ୍ୟବଂଶୀଙ୍କ ଆଦର୍ଶ କିଏ ? ତାଙ୍କ ଆଦର୍ଶ ବିରାଟ, ଧୋନି ଏବଂ ରୋହିତ ନୁହଁନ୍ତି, କି କ୍ରିକେଟର ଗଡ୍ଫାଦର ସଚିନ୍ ତେନ୍ଦୁଲକର ନୁହଁନ୍ତି । ତାଙ୍କର ଆଦର୍ଶ ଜଣେ ୱେଷ୍ଟଇଣ୍ଡିଜ୍ କିମ୍ବଦନ୍ତୀ । ସେ ହେଉଛନ୍ତି ବ୍ରାଏନ୍ ଲାରା।
ବୈଭବ ସୂର୍ଯ୍ୟବଂଶୀ ୨୦୨୪ ଅଣ୍ଡର-୧୯ ଏସିଆ କପ୍ ସମୟରେ ଏକ ସାକ୍ଷାତକାରରେ କହିଥିଲେ କି ତାଙ୍କର ଆଇଡଲ୍ ବା ଆଦର୍ଶ ହେଉଛନ୍ତି ବ୍ରାଏନ୍ ଲାରା । ଯିଏ ତାଙ୍କ ପରି ଜଣେ ବାମହାତୀ ବ୍ୟାଟର ।
ସେ କହିଥିଲେ, "ମୁଁ ବର୍ତ୍ତମାନ ମୋ ଖେଳ ଉପରେ ଧ୍ୟାନ ଦେଉଛି । ମୋ ଚାରିପାଖରେ କଣ ଘଟୁଛି ତାହା ମୋତେ ବିରକ୍ତ କରେନି। ମୁଁ ପ୍ରଥମେ ଏସିଆ କପ୍ ଉପରେ ଧ୍ୟାନ ଦେବାକୁ ଚାହୁଁଛି ଏବଂ ତା'ପରେ ପ୍ରତ୍ୟେକ ମ୍ୟାଚ୍ ଉପରେ ଧ୍ୟାନ ଦେବି । "
"ବ୍ରାଏନ୍ ଲାରା ମୋର ଆଦର୍ଶ କ୍ରିକେଟର୍। ମୁଁ ତାଙ୍କ ପରି ଖେଳିବାକୁ ଚେଷ୍ଟା କରେ, ବିଶ୍ରାମ ନିଏ, ମୁଁ ମୋର ଦକ୍ଷତା ସହିତ ସ୍ୱାଭାବିକ ଭାବରେ ଖେଳିବାକୁ ଚେଷ୍ଟା କରେ ଏବଂ ମୁଁ ଏହା ଉପରେ କାମ କରିବାକୁ ଚାହେଁ।"
ସୂଚନା ଅନୁଯାୟୀ ବ୍ରାଏନ୍ ଲାରା ତାଙ୍କର ଶେଷ ଅନ୍ତର୍ଜାତୀୟ ମ୍ୟାଚ୍ ୨୦୦୮ରେ ଖେଳିଥିଲେ । ଯାହାର ପ୍ରାୟ ୩ ବର୍ଷ ପରେ ବୈଭବ ସୂର୍ଯ୍ୟବଂଶୀ ଜନ୍ମ ହୋଇଥିଲେ। ତେଣୁ ସୂର୍ଯ୍ୟବଂଶୀ ଲାରାଙ୍କୁ ଖେଳୁଥିବାର ଦେଖି ନଥିଲେ । କିନ୍ତୁ ସେ ତାଙ୍କର ପୁରୁଣା ଭିଡିଓ ଦେଖି ତାଙ୍କଠାରୁ ପ୍ରେରଣା ନେଇଥାନ୍ତି ।
