ଟ୍ରମ୍ପଙ୍କୁ ଝଟକା : ରାଜନୈତିକ ଶତ୍ରୁଙ୍କ ବିରୋଧରେ କରିଥିଲେ ମିଛ ମାମଲା, ଖାରଜ କରିଦେଲେ କୋର୍ଟ

ନୂଆଦିଲ୍ଲୀ, ୨୫|୧୧: ଡୋନାଲ୍ଡ ଟ୍ରମ୍ପଙ୍କୁ ଝଟକା । ନିଜ ଦେଶରେ ବାରମ୍ବାର ଅପଦସ୍ଥ ହେଉଛନ୍ତି ଆମେରିକା ରାଷ୍ଟ୍ରପତି । ନିଜ ମନଇଚ୍ଛା ନିଷ୍ପତ୍ତି ଏବଂ ରାଜୁତିକୁ ଚେକ୍ ଦେଇଛନ୍ତି ୟୁଏସ ଫେଡେରାଲ ଜଜ୍ । ଏଫବିଆଇର ପୂର୍ବତନ ନିର୍ଦ୍ଦେଶକ ଜେମ୍ସ କୋମେ ଏବଂ ନ୍ୟୁୟର୍କର ଆଟର୍ଣ୍ଣି ଜେନେରାଲ ଲେଟିଟିଆ ଜେମ୍ସଙ୍କ ବିରୋଧରେ ଲାଗିଥିବା ମାମଲାକୁ ଖାରଜ କରିଛନ୍ତି କୋର୍ଟ । ଯାହା ନିଜ ପ୍ରତିଦ୍ୱନ୍ଦ୍ୱୀଙ୍କୁ ହଇରାଣ କରିବା ପାଇଁ ଟ୍ରମ୍ପଙ୍କ ଚାଲ୍ ଥିଲା ବୋଲି କୁହାଯାଉଛି ।

ତେବେ ଉଭୟଙ୍କ ବିରୋଧରେ ଲାଗିଥିବା ମାମଲାକୁ ଫେଡେରାଲ କୋର୍ଟ ଖାରଜ କରିଛନ୍ତି । ବିଚାରପତି କ୍ୟାମେରୁନ୍ କ୍ୟୁରି କହିଛନ୍ତି ଯେ, ମାମଲା ଦାଖଲ କରିଥିବା ବ୍ୟକ୍ତି ବେଆଇନ ଭାବେ ନିଯୁକ୍ତ ହୋଇଥିଲେ । ପ୍ରଥମେ ଲିଣ୍ଡସେ ହାଲିଗାନ୍ ମାମଲାକୁ କୋର୍ଟ ସମ୍ମୁଖରେ ରଖିଥିଲେ । କିନ୍ତୁ ତାଙ୍କୁ ପୂର୍ବରୁ ହ୍ୱାଇଟ୍ ହାଉସରୁ ସହାୟତା ମିଳୁଥିଲା । ତାଙ୍କ ପାଖରେ ଆଇନଜୀବୀ ହେବା ନେଇ ପୂର୍ବରୁ କୌଣସି ଅଭିଜ୍ଞତା ନାହିଁ । ଫେଡେରାଲ ଆଇନ ବା ୟୁଏସ ସଙ୍ଘୀୟ ନିୟମ ଅନୁସାରେ ବରିଷ୍ଠ ଆଇନଜୀବୀମାନଙ୍କୁ ସିନେଟରୁ ଅନୁମତି ମିଳିଥାଏ । ଲିଣ୍ଡସେଙ୍କ କ୍ଷେତ୍ରରେ ସେପରି କିଛି ଘଟିନଥିବା କୋର୍ଟ ପ୍ରକାଶ କରିଥିଲେ ।

କୋର୍ଟ ଆହୁରି କହିଥିଲେ ଯେ, ଲିଣ୍ଡସେଙ୍କ ନିଯୁକ୍ତି ବେଆଇନ ଥିଲା । ନିଜ କ୍ଷମତାର ସେ ଦୁରୁପଯୋଗ କରିଛନ୍ତି । ତାଙ୍କୁ କୌଣସି ବିଧିବଦ୍ଧ ଆଇନ ଦ୍ୱାରା ନିଯୁକ୍ତ କରାଯାଇନଥିଲା । ତେଣୁ ଅଭିଯୁକ୍ତଙ୍କ ବିରୋଧରେ ଲାଗିଥିବା ମାମଲାକୁ ଖାରଜ କରାଯାଇଛି । ଏହାସହ କୋର୍ଟ କୋମେ ଏବଂ ଲେଟିଟିଆଙ୍କୁ ଦୋଷମୁକ୍ତ କରିଥିଲେ ।

ରିପୋର୍ଟ ଅନୁସାରେ, ୬୪ ବର୍ଷୀୟ କୋମେଙ୍କ ବିରୋଧରେ ଗତ ସେପ୍ଟେମ୍ବର ମାସରେ ମାମଲା ଦାଖଲ ହୋଇଥିଲା । ସେ ୟୁଏସ କଂଗ୍ରେସକୁ ମିଛ ବୟାନ ଦେଇଥିବା ଅଭିଯୋଗରେ ଦର୍ଶାଇଯାଇଥିଲା । ସେହିପରି ଲେଟିଟିଆ ଯିଏ କି ଟ୍ରମ୍ପଙ୍କ ବିରୋଧରେ ଏକ ମାମଲା ଲଢୁଥିଲେ ତାଙ୍କ ବିରୋଧରେ ବ୍ୟାଙ୍କରେ ଜାଲିଆତି କରି ନେଣଦେଣ କରିଥିବା ଅଭିଯୋଗ ହୋଇଥିଲା ।

ଅନ୍ୟ ଦିଗରେ କୋମେ ଫେଡେରାଲ ଜଜଙ୍କ ରାୟକୁ ସ୍ୱାଗତ କରିଛନ୍ତି । ୟୁଏସ ରାଷ୍ଟ୍ରପତି ନିଜ ରାଜନୈତିକ ଶତ୍ରୁଙ୍କୁ ମାତ୍ ଦେବାକୁ ବେଆଇନ କାର୍ଯ୍ୟ କରିପାରିବେ ନାହିଁ ବୋଲି ପ୍ରମାଣିତ ହୋଇଛି । ଅନ୍ୟ ଦିଗରେ ଲେଟିଟିଆ ନିଜ ବିରୋଧରେ ଲାଗିଥିବା ଅଭିଯୋଗକୁ ମିଛ ଏବଂ ମନଗଢା ବୋଲି କହିଛନ୍ତି ।

ସୂଚନାଯୋଗ୍ୟ, ଗତ ଜାନୁଆରୀ ମାସକୁ ଟ୍ରମ୍ପ ନିଜ ରାଜନୈତିକ ଶତ୍ରୁ ଏବଂ ସମାଲୋଚକଙ୍କୁ ଟାର୍ଗେଟ୍ କରି ଆସୁଛନ୍ତି । ପୂର୍ବତନ ସୁରକ୍ଷା ପରାମର୍ଶଦାତା ଜନ୍ ବୋଲ୍ଟନ ପ୍ରଥମେ ଷଡଯନ୍ତ୍ରର ଶିକାର ହୋଇଥିଲେ । ତାଙ୍କ ବିରୋଧରେ ଗୁଇନ୍ଦା ତଥ୍ୟକୁ ସାର୍ବଜନୀନ କରିବା ଭଳି ସଙ୍ଗୀନ ଅଭିଯୋଗ ଲାଗିଥିଲା । ଅନ୍ୟ ଦିଗରେ ଆମେରିକାର ଜଣେ ଟ୍ରମ୍ପ ବିରୋଧି ବୈଜ୍ଞାନିକଙ୍କୁ ମଧ୍ୟ କାଠଗଡାର ସାମ୍ନା କରିବାକୁ ପଡିଛି ।