ନୂଆଦିଲ୍ଲୀ: ଜମ୍ମୁ ଏବଂ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରଠାରୁ ଭାରତ ଏବଂ ପାକିସ୍ତାନ ମଧ୍ୟରେ ସମ୍ପର୍କ ତିକ୍ତତାର ଚରମସୀମାରେ। ପାକିସ୍ତାନର ଅନୁରୋଧ କ୍ରମେ ମିଳିତ ଜାତିସଂଘ ସୁରକ୍ଷା ପରିଷଦ (UNSC)ର ଏକ ବୈଠକ ଏକ ବନ୍ଦ କୋଠରୀରେ ଅନୁଷ୍ଠିତ ହୋଇଥିଲା। ହେଲେ ବୈଠକରେ ପାକିସ୍ତାନକୁ ଏକଘରିକିଆ କରିଦିଆଯାଇଥିଲା।
ସୂତ୍ର ଅନୁଯାୟୀ, ଏକ ରୁଦ୍ଧଦ୍ୱାର ବୈଠକରେ ଭାରତରେ ହମ୍ଲାକୁ ନେଇ ପାକିସ୍ତାନକୁ ପ୍ରଶ୍ନ କରିଥିଲେ UNSC ସଦସ୍ୟ। ଜାତିସଂଘର ସଦସ୍ୟମାନେ ପାକିସ୍ତାନର ‘ଫଲ୍ସ ଫ୍ଲାଗ୍’ କାହାଣୀକୁ ଭତ୍ସନା କରିଛନ୍ତି। ବରଂ ପହଲଗାମ ଆକ୍ରମଣରେ ପାକିସ୍ତାନର ଆତଙ୍କବାଦୀ ସଂଗଠନ ଲସ୍କର-ଏ-ତୈବାର ଭୂମିକା ଉପରେ ପ୍ରଶ୍ନ ଉଠିଥିଲା।
ଫଲ୍ସ ଫ୍ଲାଗ୍ ଏକ ସାମରିକ କାର୍ଯ୍ୟାନୁଷ୍ଠାନ। ଯେଉଁଠାରେ ଏକ ଦେଶ ଗୁପ୍ତ ଭାବରେ ଏବଂ ଉଦ୍ଦେଶ୍ୟମୂଳକ ଭାବରେ ନିଜର ସମ୍ପତ୍ତି ଏବଂ ନିଜ ଦେଶର ନାଗରିକଙ୍କ ଜୀବନକୁ କ୍ଷତି ପହଞ୍ଚାଏ।
ଏହି ବୈଠକ ସମୟରେ, ଜାତିସଂଘର ସଦସ୍ୟ ଦେଶମାନେ ପହଲଗାମ ଆତଙ୍କବାଦୀ ଆକ୍ରମଣକୁ ନିନ୍ଦା କରିଥିଲେ। କିଛି ସଦସ୍ୟ ଧର୍ମ ଆଧାରରେ ପର୍ଯ୍ୟଟକଙ୍କୁ ଟାର୍ଗେଟ କରିବାର ପ୍ରସଙ୍ଗ ଉଠାଇଥିଲେ। କିଛି ଦେଶ ପାକିସ୍ତାନର କ୍ଷେପଣାସ୍ତ୍ର ପରୀକ୍ଷଣ ଉପରେ ଚିନ୍ତା ପ୍ରକାଶ କରି ଏହାକୁ ଏକ ଉତ୍ତେଜନାମୂଳକ କାର୍ଯ୍ୟ ବୋଲି କହିଥିଲେ। ତେଣୁ, ବର୍ତ୍ତମାନର ପରିସ୍ଥିତିକୁ ଆନ୍ତର୍ଜାତୀୟକରଣ କରିବା ପାଇଁ ପାକିସ୍ତାନର ପ୍ରୟାସ ବିଫଳ ହୋଇଥିଲା। କେବଳ ଏତିକି ନୁହେଁ, ସଦସ୍ୟ ଦେଶମାନେ ପାକିସ୍ତାନକୁ ଭାରତ ସହିତ ଏହାର ସମସ୍ୟା ଦ୍ୱିପାକ୍ଷିକ ସ୍ତରରେ ସମାଧାନ କରିବାକୁ ପରାମର୍ଶ ଦେଇଥିଲେ। ବୈଠକ ସମୟରେ ଏବଂ ପରେ ପାକିସ୍ତାନ ସମ୍ପୂର୍ଣ୍ଣ ଭାବରେ ଏକାକୀ ହୋଇଯାଇଥିଲା।
ସୋମବାର UNSCରେ ଏକ ବନ୍ଦ କୋଠରୀରେ ହୋଇଥିବା ଦେଢ଼ ଘଣ୍ଟାର ବୈଠକର କୌଣସି ନିଷ୍କର୍ସ ବାହାରିନଥିଲା। ଏହି ବୈଠକ ପରେ, ଜାତିସଂଘ କୌଣସି ସରକାରୀ ବିବୃତ୍ତି ଜାରି କରିନଥିଲା କିମ୍ବା କୌଣସି ପ୍ରସ୍ତାବ ଗୃହୀତ ହୋଇନଥିଲା।
ବୈଠକ ସମୟରେ, ଜାତିସଂଘରେ ପାକିସ୍ତାନର ସ୍ଥାୟୀ ପ୍ରତିନିଧି, ରାଷ୍ଟ୍ରଦୂତ ଅସୀମ ଇଫତିଖାର କହିଥିଲେ ଯେ UNSC ବୈଠକର ଉଦ୍ଦେଶ୍ୟ ହାସଲ ହୋଇଥିବା ଦାବି କରିଥିଲେ। ଏହି ବୈଠକ ପୂର୍ବରୁ ଜାତିସଂଘର ମହାସଚିବ ଆଣ୍ଟୋନିଓ ଗୁଟେରେସ ପାକିସ୍ତାନକୁ ଚେତାବନୀ ଦେଇଥିଲେ।
