ପାରିବାରିକ କଳହର କରୁଣ ପରିଣତି : ସାନ ଭାଇ ମାଡ଼ରେ ବଡ ଭାଇର ମୃତ୍ୟୁ

ଭୋଗରାଇ ୧୮।୧୨: ପାରିବାରିକ କଳହର କରୁଣ ପରିଣତି । ସାନ ଭାଇ ମାଡରେ ବଡ ଭାଇର ମୃତ୍ୟୁ ହୋଇଛି । ବାଲେଶ୍ବର ଜିଲ୍ଲା ଭୋଗରାଇ ଥାନା ଅନ୍ତର୍ଗତ ମାନକୁଣ୍ଡା ଗ୍ରାମରେ ଘଟିଛି ଏଭଳି ଅଭାବନୀୟ ଘଟଣା । ମୃତକ ହେଲେ ସୁଦାମ ମାଝୀ ।

ସୂଚନାଯୋଗ୍ୟ ଯେ, ବାଲେଶ୍ବର ଜିଲ୍ଲା ଭୋଗରାଇ ଥାନା ଅନ୍ତର୍ଗତ ମାନକୁଣ୍ଡା ଗ୍ରାମର ବଡ ଭାଇ ସୁଦାମ ମାଝୀ ଏବଂ ସାନ ଭାଇ ସୁଧାକର ମାଝୀଙ୍କ ଭିତରେ କୌଣସି କଥାକୁ ନେଇ ପାଟି ତୁଣ୍ତ ହେବା ସହ ମାରପିଟ ହୋଇଥିଲା । ଏଥିରେ ଉତକ୍ଷିପ୍ତ ହୋଇ ସୁଧାକର ବଡ ଭାଇ ସୁଦାମଙ୍କୁ ଜୋରରେ ଧକ୍କା ମାରିବାରୁ ସୁଦାମ ତଳେ ପଡି ଯାଇଥିଲେ । ପରିବାର ଲୋକେ ସୁଦାମଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ପ୍ରଥମେ ଜଳେଶ୍ବରପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି  କରାଇଥିଲେ । ମାତ୍ର ଅବସ୍ଥା ସଙ୍କଟାପନ୍ନ ହେବାରୁ ବାଲେଶ୍ବର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଖବର ପାଇ ଘଟଣାସ୍ଥଳରେ ଭୋଗରାଇ ପୋଲିସ ପହଞ୍ଚି ସାନ ଭାଇ ସୁଧାକରଙ୍କୁ ଅଟକ ରଖି ଅଧିକ ତଦନ୍ତ ଜାରି ରଖିଛି ।